ກະຊວງປ້ອງກັນຄວາມສະຫງົບ (ປກສ) ນຳເງິນ 300ລ້ານກີບ ມາມອບໃຫ້ອົງການປົກຄອງນະຄອນຫຼວງວຽງຈັນ (ນວ) ເພື່ອປະກອບສ່ວນໃນການປ້ອງກັນ ສະກັດກັ້ນ ແລະ ຕ້ານການລະບາດຂອງພະຍາດປອດອັກເສບສາຍພັນໃໝ່ ໄວຣັສໂຄໂຣນາ (Covid-19).
ພິທີມອບຮັບເງິນດັ່ງກ່າວ ຈັດຂຶ້ນວັນທີ 20 ກຸມພາ 2020 ຢູ່ຫ້ອງວ່າການປົກຄອງ ນວ ເຊິ່ງມອບໂດຍທ່ານພົນຕີ ສົມຫວັງ ທຳມະສິດ ຮອງລັດຖະມົນຕີກະຊວງ ປກສ ແລະ ຮັບໂດຍທ່ານ ສີຫຸນ ສິດທິລືໄຊ ຮອງເຈົ້າຄອງ ນວ ມີພາກສ່ວນກ່ຽວຂ້ອງ ເຂົ້າຮ່ວມ.
ໂອກາດນີ້ ທ່ານ ສີຫຸນ ສິດທິລືໄຊ ກໍໄດ້ສະແດງຄວາມຂອບໃຈກະຊວງ ປກສ ທີ່ເຫັນຄວາມສຳຄັນ ເປັນຫ່ວງເປັນໃຍ ແລະ ນຳເງິນມາມອບເພື່ອປະກອບສ່ວນສະກັດກັ້ນ ແລະ ປ້ອງກັນການລະບາດຂອງພະຍາດດັ່ງກ່າວ ເຊິ່ງເງິນຈຳນວນນີ້ຈະນຳໄປມອບຕໍ່ໃຫ້ຄະນະກຳມະການລະດັບຊາດ ເພື່ອມອບຕໍ່ໃຫ້ລັດຖະບານ ສປ ຈີນ.