ອີງຕາມແຈ້ງການ ຂອງກະຊວງອຸດສາຫະກຳ ແລະ ການຄ້າ ເລກທີ 0147 ລົງວັນທີ 7 ກຸມພາ 2020 ເລື່ອງ ເອົາໃຈໃສ່ຕິດຕາມ, ກວດກາການຈຳໜ່າຍອຸປະກອນການແພດ,ເປັນຕົ້ນ ແມ່ນຜ້າອັດປາກ-ດັງ(ແຜນຕອງ 3 ຊັ້ນ) ຊະນິດສາຍຢາງຢືດທຸກລຸ້ນ ແລະ ນໍ້າຢາລ້າງມື ອີງຕາມ ແຈ້ງການສະບັບເລກທີ 142/ຫສນຍ, ລົງວັນທີ 5 ກຸມພາ 2020 ວ່າດ້ວຍທິດຊີ້ນຳໃຊ້ເຂົ້າໃນການປ້ອງກັນພະຍາດ ອັກເສບປອດຈາກເຊື້ອຈຸລະໂລກ ສາຍພັນໃໝ່.
ກະຊວງ ອຸດສາຫະກຳ ແລະ ການຄ້າ ຂໍຖືເປັນກຽດແຈ້ງມາຍັງ ພະແນກອຸດສາຫະກຳ ແລະການຄ້າແຂວງ, ນະຄອນຫຼວງ, ຫ້ອງການອຸດສາຫະກຳ ແລະການຄ້າບັນດາເມືອງ, ນະຄອນໃນຂອບເຂດ ທົ່ວປະເທດ ໃຫ້ເອົາໃຈໃສ່ຊີ້ນຳ ແລະແຕ່ງຕັ້ງເຈົ້າໜ້າທີກວດກາການຄ້າ ລົງຕິດຕາມກວດກາ ການສວຍໂອກາດຂຶ້ນລາຄາ ແລະ ກັກຕຸນສິນຄ້າ ອຸປະກອນການແພດ ປະເພດຜ້າອັດປາກ-ດັງ(ໜ້າກາກອານາໄມ), ນ້ຳຢາລ້າງມື ເກີນລາຄາທີ່ກຳນົດໄວ້ ໃນຂໍ້ 2 ຂອງແຈ້ງການລະບັບເລກທີ 0142/ອຄ,ກຄພນ, ລົງວັນທີ 7 ກຸມພາ2020, ຖ້າກວດພົບເຫັນມີການລະເມີດແມ່ນໃຫ້ປະຕິບັດມາດຕະການຕໍ່ຜູ້ລະເມີດດັ່ງນີ້:
1 ໃຫ້ປະຕິບັດຕາມ ຂໍ້ 5 ມາດຕາ26 ຂອງດຳລັດ ວ່າດ້ວຍການຄຸ້ມຄອງລາຄາສິນຄ້າ ແລະຄ່າບໍລິການ ສະບັບເລກທີ 474/ນຍ, ລົງວັນທີ 18 ພະຈິກ 2010, ການຢຸດ,ປະຕິເສດຫຼືແກ່ຍາວເວລາ ການຈຳໜ່າຍ ຫຼືການບໍລິຫານ ບໍ່ມີເຫດຜົນ ໃນເມື່ອຄຳສັ່ງຈາກອົງການການຄຸ້ມຄອງລາຄາ (ການສວຍໂອກາດຂຶ້ນລາຄາສິນຄ້າ ຈະມີໂທດປັບໃໝ່ ດັ່ງນີ້:
ຄັ້ງທີ1 ຈະຖືກໂທດປັບໃໝທາງດ້ານບໍລິຫານ 1.000.000 ກີບຕໍ່ລາຍການ ແລະ ເຮັດບົດບັນທຶກກ່າວເຕືອນ.
ຄັ້ງທີ2 ຈະຖືກໂທດປັບໃໝທາງດ້ານບໍລິຫານ 2.000.000 ກີບຕໍ່ລາຍການ ແລະ ເຮັດບົດບັນທຶກກ່າວເຕືອນ.
ຄັ້ງທີ3 ຈະຖືກໂທດປັບໃໝທາງດ້ານບໍລິຫານ 3.000.000 ກີບຕໍ່ລາຍການ ພ້ອມທັງຖອນໃບອະນຸຍາດດຳເນີນທຸລະກິດ ແລະ ທະບຽນວິສາຫະກິດຢ່າງຖາວອນ.
2 ໃນກໍລະນີຫາກຖອນໃບອະນຸຍາດດຳເນີນທຸລະກິດ ແລະທະບຽນວິສາຫະກິດແລ້ວ ຍັງສືບຕໍ່ລະເມີດ ຫຼື ເຈດຕະນາລະເມີດ ແມ່ນໃຫ້ປະຕິບັດຕາມປະມວນກົດໝາຍອາຍາ ເລກທີ 26/ສພຊ, ລົງວັນທີ 17 ພຶດສະພາ 2017, ມາດຕາ277 ການສວຍໂອກາດ ຂຶ້ນລາຄາສິນຄ້າ ແລະ ຄ່າບໍລິການ: ບຸກຄົນໃດຫາກສວຍໂອກາດຂຶ້ນລາຄາສິນຄ້າ, ຄ່າບໍລິການ ຫຼື ໄດ້ຂາຍສິນຄ້າແພງເກີນຂອບເຂດ ໃນເວລາເກີດໄຟແຫ້ງແລ້ງ, ໄພນ້ຳຖ້ວມ ຫຼື ໃນສະພາບຄວາມຫຍຸ້ງຍາກເກຮດຂຶ້ນໃນທ້ອງຖິ່ນໃດໜຶ່ງ ຈະຖືກລົງໂທດຕັດອິດສະຫຼະພາບ ແຕ່ຫົກເດືອນຫາ ສອງປີ ແລະ ຈະຖືກປັບໃໝແຕ່ 3.000.000ກ ກີບ ຫາ10.000.000 ກີບ.
3 ປະຕິບັດຕາມປະມວນກົດໝາຍອາຍາ ເລກທີ 26/ສພຊ, ລົງວັນທີ 17 ພຶດສະພາ 2017, ມາດຕາ287 ການກັກຕຸນສິນຄ້າ: ບຸກຄົນໃດຫາກໄດ້ກັກຕຸນ, ຊຸກເຊື່ອງສິນຄ້າໄວ້ໃນວິສາຫະກິດ, ບໍລິສັດ, ຫ້າງຮ້ານຂອງຕົນ ຫຼື ບ່ອນອື່ນ ເພື່ອສ້າງຄວາມປັ່ນປ່ວນທາງດ້ານເສດຖະກິດ ແລະ ຊີສິດການເປັນຢູ່ຂອງປະຊາຊົນ ຈະຖືກລົງໂທດຕັດອິດສະຫຼະພາບແຕ່ 1 ປີ ຫາ 4 ປີ ແລະ ຈະຖືກປັບໃໝແຕ່ 10.000.000ກີບ ຫາ 50.000.000 ກີບ.
