ລັດຖະບານໄດ້ລົງທຶນ 100 ກວ່າຕື້ກີບ ເຂົ້າໃນວຽກງານພັດທະນາຊົນນະບົດ ແລະ ແກ້ໄຂ ຄວາມທຸກຍາກ ເຮັດໃຫ້ໃນໄລຍະ 9 ເດືອນຂອງປີ 2019 ສາມາດລຶບລ້າງບ້ານທຸກຍາກໄດ້ 112 ບ້ານ ແລະ ລຶບລ້າງຄອບຄົວທຸກຍາກໄດ້ 2.209 ຄອບຄົວ ໝົດປີ 2019 ຄາດວ່າ ຈະບັນລຸຕາມມະຕິສະພາ.
ພາບປະກອບຂ່າວເທົ່ານັ້ນ
ທ່ານ ສອນໄຊ ສີພັນດອນ ຮອງນາຍົກລັດຖະມົນຕີ, ລັດຖະມົນຕີກະຊວງແຜນການ ແລະ ການລົງທຶນ ກ່າວຢູ່ກອງປະຊຸມສະພາໃນເດືອນພະຈິກ 2019 ຜ່ານມາວ່າ: ເພື່ອສືບຕໍ່ວຽກງານພັດທະນາຊົນນະບົດຕາມ 4 ເນື້ອໃນ 4 ຄາດໝາຍ ຕິດພັນກັບວຽກງານ 3 ສ້າງກ້າວເຂົ້າສູ່ລວງເລິກ ສຸມໃສ່ 91 ຈຸດສຸມ ໃນ 70 ເມືອງຢູ່ 18 ແຂວງທົ່ວປະເທດ ໂດຍສຸມໃສ່ພັດທະນາພື້ນຖານໂຄງລ່າງ ເຊັ່ນ: ກໍ່ສ້າງ ແລະ ສ້ອມແປງເສັ້ນທາງ, ສ້າງຊົນລະປະທານຂະໜາດນ້ອຍ, ໂຮງຮຽນ, ສຸກສາລາ, ວິດຖ່າຍ ແລະ ອື່ນໆ ພ້ອມທັງຝຶກອົບຮົມດ້ານວິຊາການປູກຝັງ, ສົ່ງເສີມການລ້ຽງສັດ ແລະ ເຂົ້າເຖິງສິນເຊື່ອ ແນໃສ່ຊຸກຍູ້ການຜະລິດເປັນສິນຄ້າເພື່ອສ້າງລາຍຮັບແກ່ປະຊາຊົນຜູ້ທຸກຍາກ.
ພາບປະກອບຂ່າວເທົ່ານັ້ນ
ປີ 2019 ຜ່ານມາ ພາກລັດຈັດສັນງົບປະມານລົງທຶນເຂົ້າໃນວຽກງານພັດທະນາຊົນນະບົດ ແລະ ແກ້ໄຂຄວາມທຸກຍາກ ຈຳນວນ 112 ຕື້ກີບ ມີທັງໝົດ 659 ໂຄງການ. ໄດ້ປ່ອຍສິນເຊື່ອ 136,96 ຕື້ກີບ; ໃນນັ້ນ, ປ່ອຍໃຫ້ເມືອງເປົ້າໝາຍ 89,15 ຕື້ກີບ, ຈຸດສຸມລັດຖະບານ 21,52 ຕື້ກີບ ແລະ ບ້ານສາມສ້າງ 26,29 ຕື້ກີບ ແລະ ອື່ນໆ ເຮັດໃຫ້ມາຮອດເດືອນກັນຍາ 2019 ສາມາດລຶບລ້າງຄອບຄົວທຸກຍາກ ໄດ້ 2.209 ຄອບຄົວ ເທົ່າກັບ 47,52% ຂອງແຜນການ
ສາມາດລຶບລ້າງບ້ານທຸກຍາກ ໄດ້ 112 ບ້ານ ເທົ່າກັບ 56% ຂອງແຜນການ, ສາມາດສ້າງບ້ານພັດທະນາໄດ້ 167 ບ້ານ ລື່ນແຜນ 67 ບ້ານ ເຮັດໃຫ້ປັດຈຸບັນມີບ້ານພັດທະນາທັງໝົດ 4.305 ບ້ານ ແລະ ສ້າງບ້ານໃຫຍ່ໃຫ້ເປັນເມືອງນ້ອຍໄດ້ 12 ບ້ານ ເຮັດໃຫ້ທົ່ວປະເທດມີບ້ານ ໃຫຍ່ເປັນຕົວເມືອງນ້ອຍ 68 ບ້ານ. ເຖິງຢ່າງໃດກໍຕາມ, ໝົດປີ 2019 ຈະລຶບລ້າງບ້ານທຸກຍາກໃຫ້ບັນລຸ 200 ບ້ານຕາມມະຕິສະພາ.
ພາບປະກອບຂ່າວເທົ່ານັ້ນ
ເພື່ອສືບຕໍ່ພັດທະນາຊົນນະບົດ ແລະ ແກ້ໄຂຄວາມທຸກຍາກຂອງປະຊາຊົນໃຫ້ມີ ຄວາມໜັກແໜ້ນ, ເລິກເຊິ່ງ ແລະ ທົ່ວເຖິງຕາມທິດ 3 ສ້າງ ໃນປີ 2020 ລັດຈະສຸມໃສ່ 5 ຄາດໝາຍຫຼັກ ເຊັ່ນ:
1 ສູ້ຊົນສ້າງຄອບຄົວໃຫ້ມີເງື່ອນໄຂບັນລຸມາດຕະຖານຄອບຄົວພົ້ນທຸກ ໃຫ້ໄດ້ 3.234 ຄອບຄົວ.
2 ສູ້ຊົນສ້າງບ້ານໃຫ້ມີເງື່ອນໄຂບັນລຸມາດຕະຖານບ້ານພົ້ນທຸກ ໃຫ້ໄດ້ 220 ບ້ານ.
3 ສ້າງເມືອງໃຫ້ມີເງື່ອນໄຂບັນລຸມາດຕະຖານພົ້ນທຸກໃຫ້ໄດ້ 2 ເມືອງ ຄື: ເມືອງນອງ ສະຫວັນນະເຂດ ແລະ ເມືອງຊ່ອນ ແຂວງຫົວພັນ.
ພາບປະກອບຂ່າວເທົ່ານັ້ນ
4 ສູ້ຊົນຈັດພູມລຳເນົາ ແລະ ອາຊີບໃຫ້ປະຊາຊົນທີ່ບໍ່ມີພູມລຳເນົາຄົງທີ່ ແລະ ບໍ່ມີອາຊີບໝັ້ນຄົງໃຫ້ໄດ້ 163 ບ້ານ ແລະ ແກ້ໄຂບັນຫາການເຄື່ອນຍ້າຍຂອງພົນລະເມືອງແບບຊະຊາຍໃຫ້ສຳເລັດໂດຍພື້ນຖານ.
5 ສູ້ຊົນສ້າງບ້ານພັດທະນາທີ່ເປັນຕົວແບບບັນລຸມາດຕະຖານພັດທະນາໃຫ້ໄດ້ 100 ບ້ານ ແລະ ສ້າງຕົວແບບບ້ານໃຫຍ່ກາຍເປັນເມືອງນ້ອຍໃນຊົນນະບົດ ໃຫ້ໄດ້ຕື່ມອີກ 18 ບ້ານ.
( ຂ່າວ: ກາວຊົ່ງ, ຂໍ້ມູນຈາກສະພາແຫ່ງຊາດ )
