ພະນັກງານແພດທະຫານ ໂຮງໝໍບໍລິເວນ 109 ແຂວງສະຫວັນນະເຂດ ໄດ້ລົງເຄື່ອນໄຫວປິ່ນປົວພະຍາດ, ສຸຂະພາບໃຫ້ແກ່ພໍ່ແມ່ປະຊາຊົນ ຜູ້ປະສົບໄພນໍ້າຖ້ວມຢູ່ເມືອງຄົງເຊໂດນ ແຂວງ ສາລະວັນ ໄດ້ວ່ອງໄວ ແລະ ມີປະສິດທິພາບ. ຮອດຂະນະນີ້ມີ ຜູ້ປະສົບໄພຫຼາຍກວ່າ 600 ຄົນ ໄດ້ຮັບການເບິ່ງແຍງປິ່ນປົວສຸຂະພາບແລ້ວ.
ພັນໂທ ສຸພານິມິດ ອິນທະຜົນ ຫົວໜ້າຮັບຜິດຊອບ ທີມງານແພດຈາກໂຮງໝໍບໍລິເວນ 109 ປະຈໍາຢູ່ສູນພັກສຸກເສີນສໍານັກງານປົກຄອງ ເມືອງຄົງເຊໂດນ ແຂວງສາລະວັນ ກ່າວວ່າ: ໂດຍປະຕິບັດຕາມຄໍາສັ່ງ ຈາກກົມເສນາຮັກກົມໃຫຍ່ພະລາທິການກອງທັບ ໃຫ້ຮີບຮ້ອນລົງ ໃຫ້ການບໍລິການປິ່ນປົວດ້ານສຸຂະພາບໃຫ້ແກ່ພໍ່ແມ່ປະຊາຊົນ ຜູ້ປະສົບໄພນໍ້າຖ້ວມຢ່າງໜັກໜ່ວງຢູ່ສູນພັກສຸກເສີນ ຕາມແຕ່ລະຈຸດ ຂອງເມືອງຄົງເຊໂດນ ແຂວງສາລະວັນ ເຊິ່ງໄດ້ເຮັດໃຫ້ຊັບສິນຖືກເສຍຫາຍ, ຊີວິດການເປັນຢູ່ພົບຄວາມຫຍຸ້ງຍາກລໍາບາກ ແລະ ປະເຊີນກັບພະຍາດລະບາດຕ່າງໆທີ່ອາດຈະເກີດຂຶ້ນ.
ດັ່ງນັ້ນ, ເພື່ອຮັບປະກັນດ້ານສຸຂະພາບໃຫ້ພໍ່ແມ່ປະຊົນ ຄະນະພັກ-ຄະນະບັນຊາໂຮງໝໍ ບໍລິເວນ 109 ຈຶ່ງໄດ້ຈັດຕັ້ງກໍາລັງແພດໝໍລົງບໍລິການປິ່ນປົວສຸຂະພາບໃຫ້ແກ່ພໍ່ແມ່ປະຊາຊົນ ຢູ່ຕາມສູນພັກສຸກເສີນແຕ່ລະຈຸດຢ່າງຮີບດ່ວນ ໂດຍໄດ້ປິ່ນປົວ, ແຈກຢາຍຢາປ້ອງກັນພະຍາດ ພ້ອມທັງໃຫ້ຄໍາແນະນໍາ ການກິນການຢູ່ຖືກກັບຫຼັກອະນາໄມ ແລະ ທຳຄວາມສະອາດສະຖານທີ່ສູນພັກສຸກເສີນຕາມແຕ່ລະຈຸດ ໃຫ້ປາສະຈາກເຊື້ອພະຍາດຕ່າງໆອີກດ້ວຍ.
ພັນໂທ ສຸພານິມິດ ອິນທະຜົນ ກ່າວຕື່ມວ່າ: ສະເພາະ ຢູ່ສູນພັກສຸກເສີນສໍານັກງານປົກຄອງເມືອງ ຄົງເຊໂດນມີປະຊາຊົນຈໍານວນ 3.000 ກວ່າຄົນ ຮັບຜົນກະທົບທາງດ້ານຈິດໃຈ ແລະ ສຸຂະພາບ. ຕໍ່ສະພາບການ ດັ່ງກ່າວນັ້ນ, ກໍາລັງອ້າຍນ້ອງແພດໝໍຈໍານວນ 23 ສະຫາຍ ທີ່ປະຈໍາການຢູ່ຈຸດດັ່ງກ່າວຕະຫຼອດ 24 ຊົ່ວໂມງ ໄດ້ສຸມທຸກເຫື່ອແຮງເລັ່ງໃສ່ການປິ່ນປົວປະຊາຊົນຜູ້ທີ່ໄດ້ຮັບເຊື້ອພະຍາດຕ່າງໆເປັນຕົ້ນ: ພະຍາດຕີນເປື່ອຍ, ຖອກທ້ອງ, ໄຂ້ຫວັດ ແລະ ອື່ນໆອີກ ໄດ້ຈໍານວນ 600 ກວ່າຄົນ, ແຈກຢາຍຢາປິ່ວປົວສຸຂະພາບ ແລະ ຢາບໍາລຸງຮ່າງກາຍ ເຮັດໃຫ້ສຸຂະພາບແຂງແຮງຂຶ້ນຕາມລໍາດັບ.
ມາຮອດປັດຈຸບັນຜູ້ປະສົບໄພດັ່ງກ່າວໄດ້ຍົກຍ້າຍກັບຄືນສູ່ພູມລໍາເນົາຕົນເອງທັງໝົດແລ້ວ ດ້ວຍຄວາມປອດໄພ. ເຖິງຢ່າງໃດກໍ່ຕາມພະນັກງານແພດໝໍພວກເຮົາ ຍັງຈະສືບຕໍ່ເຄື່ອນໄຫວໃຫ້ບໍລິການປິ່ນປົວພໍ່ແມ່ປະຊາຊົນຕາມ ແຕ່ລະຈຸດເຂດບ້ານຕື່ມອີກ.
