ປີນີ້ອັດຕະປືມີໂຄງການລົງທຶນຂອງລັດທັງໝົດ 150 ໂຄງການ ທີ່ສະພາຮັບຮອງ ມູນຄ່າ 700 ກວ່າຕື້ກີບ ມາຮອດປັດຈຸບັນສຳເລັດແລ້ວ 30 ກວ່າໂຄງການ ມູນຄ່າ 200 ກວ່າຕື້ກີບ. ດ້ານສັງຄົມຍັງຂ້ອງໃຈຫຼາຍໂຄງການມີການທຸດຈະລິດເກີດຂຶ້ນ ຂະນະທີ່ຫົວໜ້າພະແນກແຜນການ ແລະ ການລົງທຶນຢືນຢັນວ່າທຸກໂຄງການມີຄວາມໂປ່ງໃສ ຖືກຕ້ອງຕາມສັນຍາ.
ທ່ານ ສຸລິຈັນ ພອນແກ້ວ ຫົວໜ້າພະແນກແຜນການ ແລະ ການລົງທຶນ ແຂວງ ອັດຕະປື ໄດ້ໃຫ້ສຳພາດກັບນັກຂ່າວທ້ອງຖິ່ນເມື່ອບໍ່ດົນມານີ້ ວ່າ: ການຄຸ້ມຄອງການຈັດຕັ້ງປະຕິບັດແຜນພັດທະນາເສດຖະກິດ – ສັງຄົມ ໂດຍມີການລົງທຶນຂອງລັດ, ການລົງທຶນຂອງພາກເອກະຊົນທັງໝົດພາຍໃນ ແລະ ຕ່າງປະເທດ ເພື່ອການພັດທະນາຕາມແຜນນະໂຍບາຍຂອງພັກ ແລະ ລະບຽບກົດໝາຍຂອງລັດວາງອອກນັ້ນ ມາຮອດໃນປີ 2019 ນີ້ ທົ່ວແຂວງມີໂຄງການລົງທຶນທີ່ສະພາຮັບຮອງທັງໝົດ 150 ໂຄງການ ມີມູນຄ່າ 727,14 ຕື້ກີບ. ໃນນັ້ນ, ເມືອງຄຸ້ມຄອງ 49 ໂຄງການ ມູນຄ່າ 117,51 ຕື້ກີບ ແລະ ໄດ້ແບ່ງອອກເປັນ 4 ບ້ວງ ປະກອບດ້ວຍດັ່ງນີ້: ບ້ວງປົກກະຕິ 109 ໂຄງການ ມີມູນຄ່າ 648,27 ຕື້ກີບ; ບ້ວງຈັດສັນພູມລໍາເນົາ ແລະ ບ່ອນທຳມາຫາກິນແບບຖາວອນ ມີທັງໝົດ 4 ໂຄງການ ມູນຄ່າ 18,94 ຕື້ກີບ; ບ້ວງພັດທະນາຊົນນະບົດ ແລະ ລຶບລ້າງຄວາມທຸກຍາກ ມີທັງໝົດ 7 ໂຄງການ ມູນຄ່າ 27,03 ຕື້ກີບ ແລະ ບ້ວງຟື້ນຟູໄພພິບັດ ມີທັງໝົດ 30 ໂຄງການ ມູນຄ່າ 22,90 ຕື້ກີບ.
ທ່ານ ສຸລິຈັນ ພອນແກ້ວ ກ່າວຕື່ມອີກວ່າ: ໂຄງການທີ່ກໍ່ສ້າງສຳເລັດ ແລະ ສິ້ນສຸດຕາມສັນຍາໃນປີ 2019 ມີຈຳນວນ 32 ໂຄງການ ເຊິ່ງໄດ້ສຳເລັດຕາມແຜນແລ້ວ 100% ມີມູນຄ່າທັງໝົດ 200,9 ຕື້ກີບ, ຊຳລະແລ້ວ 126,95 ຕື້ກີບ, ຍັງຄ້າງ 73,03 ຕື້ກີບ ໃນບັນດາໂຄງການກໍ່ສ້າງຂອງລັດທີ່ສື່ອອນລາຍ ແລະ ສັງຄົມທົ່ວໄປ ເກີດມີ ຄວາມສົນໃຈໄປວ່າ ຜູ້ປະຕິບັດໜ້າທີ່ສວຍໃຊ້ອຳນາດໜ້າທີ່ເພື່ອຫາຜົນປະໂຫຍດສ່ວນຕົວ ສ້າງຜົນເສຍຫາຍຕໍ່ປະເທດຊາດຢ່າງຫຼວງຫຼາຍນັ້ນ ເຊັ່ນ: ໂຄງການສ້ອມແປງອາຄານສະພາ, ໂຄງການກໍ່ສ້າງຫໍຫຼັກເມືອງ, ໂຄງການກໍ່ສ້າງໂຮງໝໍເມືອງໄຊເສດຖາ ແລະ ໂຄງການກໍ່ສ້າງຕ່າງໆ ຕໍ່ບັນຫາດັ່ງກ່າວຫົວໜ້າພະແນກແຜນການ ແລະ ການລົງທຶນ ຢືນຢັນວ່າ: ບໍ່ມີມູນ ຄວາມຈິງແຕ່ປະການໃດ, ໃນບັນດາໂຄງການລົງທຶນຂອງລັດທີ່ວ່ານັ້ນ ຜ່ານມາແມ່ນໄດ້ມີການກວດກາຄວາມຖືກຕ້ອງໃນແຕ່ລະໜ້າວຽກ ໂດຍເຈົ້າຂອງໂຄງການໄດ້ສົ່ງບົດສະຫຼຸບໜ້າວຽກພ້ອມກັບສັນຍາມາຜ່ານພະແນກແຜນການ ແລະ ການລົງທຶນ ກວດກາຄວາມຖືກຕ້ອງຢ່າງລະອຽດເປັນປົກກະຕິ. ທ່ານຍັງຮຽກຮ້ອງມາຍັງສັງຄົມ ແລະ ສື່ສັງຄົມອອນລາຍທີ່ໃຊ້ນາມແອບແຝງຕ່າງໆເລົ່ານັ້ນ ຈົ່ງໃຫ້ເຜີຍແຜ່ໃນສິ່ງທີ່ຖືກຕ້ອງກັບສະພາບຄວາມເປັນຈິງ ເພື່ອໃຫ້ສັງຄົມມີຄວາມເຊື່ອໝັ້ນ ແລະ ຫຼີກລຽງ ຄວາມເສຍຫາຍທີ່ອາດຈະຕາມມາ, ຂໍໃຫ້ພິຈາລະນາກ່ອນລົງຂ່າວໃນສື່ສັງຄົມອອນລາຍຕ່າງໆ ຖ້າມີບັນຫາໃດບໍ່ເຂົ້າໃຈໃນບາງຢ່າງ ຂໍໃຫ້ປະສານເຖິງພາກສ່ວນກ່ຽວຂ້ອງ ແລະ ພ້ອມກັນແກ້ໄຂບັນຫາຂ້ອງໃຈເຫຼົ່ານັ້ນ ເຜີຍແຜ່ໃຫ້ເປັນຜົນປະໂຫຍດແກ່ສັງຄົມ.
( ໂດຍ: ມາລາທິບ )
