ວັນທີ 29 ກໍລະກົດ 2019 ຫໍສະໝຸດ ສ.ເກົາຫຼີ ໄດ້ມອບປຶ້ມອ່ານໃຫ້ຫໍສະໝຸດ ນະຄອນຫຼວງວຽງຈັນ ມອບໂດຍ ທ່ານ ນາງ ອີນສຸກຈອນ ຫົວໜ້າຫ້ອງສະໝຸດ ສ.ເກົາຫຼີ ຮັບໂດຍ ທ່ານ ແກ້ວວິໄລສັກ ແສນສັກດາ ຫົວໜ້າຫໍສະໝຸດນະຄອນຫຼວງວຽງຈັນ ໂດຍມີ ທ່ານ ບຸນເກີດ ສັງສົມສັກ ລັດຖະມົນຕີປະຈຳສຳນັກງານນາຍົກ ປະທານສະມາຄົມມິດຕະພາບຮ່ວມມື ລາວ – ສ.ເກົາຫຼີ, ທ່ານ ຊີນ ຊູງ ຊູນ ເອກອັກຄະລັດຖະທູດ ສ.ເກົາຫຼີ ປະຈຳລາວ, ທ່ານ ພອນຈັນ ແພງພູວັນ ຮອງຫົວໜ້າພະແນກ ຖວທ ນວ ພ້ອມດ້ວຍບັນດາພາກສ່ວນກ່ຽວຂ້ອງເຂົ້າຮ່ວມເປັນສັກຂີພິຍານ.
ທ່ານ ຊີນ ຊູງ ຊູນ ກ່າວວ່າ: ການມອບປຶ້ມໃນຄັ້ງນີ້ແມ່ນເພື່ອເປັນຂົວຕໍ່ແຫ່ງມິດຕະພາບໃນການເຂົ້າໃຈ ແລະ ຮຽນຮູ້, ສົ່ງເສີມການອ່ານ ແລະ ອຳນວຍຄວາມສະດວກໃນການອ່ານ ແລະ ຮັບຮູ້ເຖິງພາສາເກົາຫຼີ ພ້ອມຮຽນຮູ້ເຖິງວັດທະນະທຳອັນດີງາມຂອງເກົາຫຼີ. ການມອບປຶ້ມໃນຄັ້ງນີ້ປະກອບມີປຶ້ມອ່ານຂອງຜູ້ໃຫຍ່ ແລະ ເດັກນ້ອຍ ຈຳນວນ 14 ພັນກວ່າຫົວ ມູນຄ່າ 700 ລ້ານກີບ; ຕູ້ໃສ່ປຶ້ມໃຫຍ່ 30 ໜ່ວຍ ມູນຄ່າ 27 ລ້ານກີບ; ຕູ້ໃສ່ປຶ້ມນ້ອຍ 50 ໜ່ວຍ ມູນຄ່າ 2,7 ລ້ານກີບ; ໂຕະ 1 ໜ່ວຍ ມູນຄ່າ 1,96 ລ້ານກີບ; ຄອມພິວເຕີ 1 ຊຸດ 3,6 ລ້ານກີບ ເຊິ່ງລວມມູນຄ່າທັງໝົດ 735 ລ້ານກວ່າກີບ.
ທ່ານ ພອນຈັນ ແພງພູວັນ ກ່າວວ່າ: ປະເທດລາວເຮົາເປັນປະເທດທີ່ກຳລັງຢູ່ໃນໄລຍະສ້າງສາພັດທະນາ ເຊິ່ງຄວາມຕ້ອງການດ້ານບຸກຄະລາກອນແມ່ນເປັນສິ່ງຈຳເປັນທີ່ສຸດ. ສະນັ້ນ, ການອ່ານແມ່ນໜຶ່ງໃນສິ່ງທີ່ຊ່ວຍສ້າງຊັບພະຍາກອນມະນຸດທີ່ມີຄຸນນະພາບ, ຮູ້ພາສາຕ່າງປະເທດເພື່ອການຮ່ວມມື, ການພັດທະນາປະເທດຊາດ, ການມອບປຶ້ມໃນຄັ້ງນີ້ແມ່ນເພື່ອເປັນການຟື້ນຟູຄືນຫໍສະໝຸດນະຄອນຫຼວງວຽງຈັນ ໃຫ້ກັບມາມີສື່ຮັບໃຊ້ໃນການອ່ານການຮຽນຮູ້ຫຼາຍຂຶ້ນ ເພື່ອຍົກລະດັບການອ່ານໃຫ້ມີປະສິດທິພາບ, ເປັນການເລີ່ມຕົ້ນຂອງຫໍສະໝຸດນະຄອນຫຼວງວຽງຈັນ ໃນການຮຽນຮູ້ແລກປ່ຽນວັດທະນະທຳເກົາຫຼີ, ເປັນການບູລະນະຟື້ນຟູຫໍສະໝຸດນະຄອນຫຼວງວຽງຈັນໃໝ່ ເຊິ່ງການມອບປຶ້ມໃນຄັ້ງນີ້ທາງຫໍສະໝຸດນະຄອນຫຼວງວຽງຈັນ ຈະນຳໃຊ້ໃນການພັດທະນາການອ່ານ, ການຮຽນຮູ້ໃຫ້ໄດ້ຮັບຜົນປະໂຫຍດສູງສຸດ.
[ ຂ່າວ: ກາວຊົ່ງ; ຮູບ: ວິລະສັກ ]
