ເມື່ອວັນພະຫັດ ທີ 16 ພຶດສະພາ ສຳນັກຂ່າວຊິນຫົວຂອງຈີນ ລາຍງານຂ່າວກ່ຽວກັບ ໜຸ່ມຊາວຈີນ ອາຍຸ 29 ປີ ໄດ້ຮັບການຜ່າຕັດປູກຖ່າຍລໍາໄສ້ນ້ອຍ ຍາວ 1,7 ແມັດ ຈາກພໍ່ ເຮັດໃຫ້ຕົນກາຍເປັນຜູ້ປ່ວຍ ຄົນທີ 16 ຂອງປະເທດ ທີ່ໄດ້ເຂົ້າຮັບການປິ່ນປົວລັກສະນະດັ່ງກ່າວ.
ແພດຜ່າຕັດຈ້າວເກົາຜິງ ຮອງຜູ້ອໍານວຍການຂອງສູນຜ່າຕັດທາງເດີນອາຫານ ໂຮງໝໍປະຊາຊົນ ໃນມົນທົນເສສວນ ເປີດເຜີຍວ່າ ຜູ້ປ່ວຍແຊ່ໂຈວ ລາຍນີ້ ອາໄສຢູ່ໃນມົນທົນເສສວນ ທາງພາກຕາເວັນຕົກສຽງໃຕ້ຂອງປະເທດ ທ້າວໂຈວ ປ່ວຍເປັນພາວະລໍາໄສ້ນ້ອຍລົ້ມເຫຼວ ກ່ອນຈະໄດ້ຮັບການຜ່າຕັດ ເມື່ອວັນທີ 30 ເມສາ ທີ່ຜ່ານມາ.
ທ່ານໝໍຜ່າຕັດຈ້າວ ກ່າວວ່າ “ການຜ່າຕັດຜ່ານໄປດ້ວຍດີ ຂະນະນີ້ ຜູ້ປ່ວຍກໍາລັງຢູ່ໃນໄລຍະພັກຟື້ນ ແລະ ຮັບປະທານໄດ້ສະເພາະອາຫານແຫຼວເທົ່ານັ້ນ ອີກທັງຕ້ອງເຝົ້າລະວັງການຕິດເຊີ້ອຫຼັງການຜ່າຕັດຕໍ່ໄປ” ໂດຍກ່ອນຜ່າຕັດປູກຖ່າຍລໍາໄສ້ນ້ອຍ ຄັ້ງນີ້ ທ້າວໂຈວ ເຄີຍຜ່ານການຕັດລໍາໄສ້ນ້ອຍມາແລ້ວ 2 ຄັ້ງ ແລະ ປະສົບກັບພາວະລໍາໄສ້ສັ້ນ ເຊິ່ງເປັນພາວະທີ່ຕ້ອງໄດ້ຮັບການປິ່ນປົວດ້ວຍການຜ່າຕັດ.
ທ່ານໝໍໄດ້ກ່າວເສີມອີກວ່າ “ລໍາໄສ້ນ້ອຍ ຂະໜາດປົກກະຕິ ຄື 4-7 ແມັດ ແຕ່ຂອງ ທ້າວໂຈວ ເຫຼືອໜ້ອຍກວ່າ 2 ແມັດ”.
ໃນປະເທດຈີນ ການຜ່າຕັດປູກຖ່າຍລໍາໄສ້ນ້ອຍ ລະຫວ່າງ ສະມາຊິກໃນຄອບຄົວທີ່ຜູ້ບໍລິຈາກຍັງມີຊີວິດຢູ່ນັ້ນ ປະສົບຄວາມສໍາເລັດຄັ້ງທໍາອິດ ເມື່ອປີ 1999 ແລະ ຕໍ່ມາມີການຜ່າຕັດໃນລັກສະນະນີ້ ເກີດຂຶ້ນອີກ 16 ຄັ້ງ ໂດຍໜຶ່ງໃນຜູ້ປ່ວຍມີຊີວິດຢູ່ໄດ້ ເກືອບ 20 ປີ ເຊິ່ງເປັນຜູ້ຮັບການປູກຖ່າຍລໍາໄສ້ທີ່ມີຊີວິດຢູ່ໄດ້ດົນທີ່ສຸດໃນໂລກ.
ໃນປັດຈຸບັນ ທົ່ວໂລກການຜ່າຕັດປູກຖ່າຍລໍາໄສ້ນ້ອຍ ເຊິ່ງເປັນການປິ່ນປົວທີ່ຈໍາເປັນສໍາລັບຜູ້ປ່ວຍພາວະລໍາໄສ້ລົ້ມເຫຼວ ແມ່ນປະສົບຄວາມສໍາເລັດແລ້ວ ກວ່າ 3 ພັນຄັ້ງ ໃນ 20 ປີ ທີ່ຜ່ານມາ ໂດຍ 60% ຂອງຜູ້ປ່ວຍ ມີອັດຕາການຢູ່ລອດເຖິງ 5 ປີ.
ຂໍ້ມູນຈາກ: China Xinhua News
