ກະຊວງອຸດສາຫະກຳ ແລະ ການຄ້າ (ອຄ) ໄດ້ຈັດກອງປະຊຸມສະຫຼຸບການຈັດຕັ້ງປະຕິບັດມະຕິກອງປະຊຸມໃຫຍ່ ຄັ້ງທີ XI ຂອງພັກ ໃນຂະແໜງ ອຸດສາຫະກຳ ແລະ ການຄ້າ ຂຶ້ນລະຫວ່າງວັນທີ 4-5 ເມສາ 2024. ໂດຍການເປັນປະທານຂອງທ່ານ ມະໄລທອງ ກົມມະສິດ ລັດຖະມົນຕີກະຊວງ ອຄ, ໂດຍໃຫ້ກຽດເຂົ້າຮ່ວມໂອ້ລົມຂອງທ່ານ ທອງລຸນ ສີສຸລິດ ເລຂາທິການໃຫຍ່ ປະທານປະເທດແຫ່ງ ສປປ ລາວ, ມີບັນດາຮອງລັດຖະມົນຕີ, ຫົວໜ້າກົມ, ພະນັກງານ, ຕາງໜ້າສະພາການຄ້າ, ພາກທຸລະກິດ ແລະ ພາກສ່ວນກ່ຽວຂ້ອງເຂົ້າຮ່ວມ.
ທ່ານ ມະໄລທອງ ກົມມະສິດ ລັດຖະມົນຕີກະຊວງ ອຄ ໄດ້ລາຍງານໂດຍຫຍໍ້ກ່ຽວກັບການດຳເນີນກອງປະຊຸມ ບາງຕອນວ່າ: ການສະຫຼຸບການປະກອບຄໍາເຫັນ ຂອງບັນດາຂະແໜງການປະກອບມີ 7 ຫົວຂໍ້ເຊັ່ນ: 1) ການຂຸດຄົ້ນທ່າແຮງບົ່ມຊ້ອນຂອງປະເທດເຮົາ ໃຫ້ກາຍເປັນຂະແໜງເສດຖະກິດປາຍແຫຼມ ແລະ ການພັດທະນາອຸດສາຫະກຳຢູ່ ສປປ ລາວ; 2) ນະໂຍບາຍ ອາກອນ ເພື່ອສົ່ງເສີມການພັດທະນາອຸດສາຫະກຳ; 3) ນະໂຍບາຍສິນເຊື່ອ ເພື່ອສົ່ງເສີມການຜະລິດ; 4) ການດຸ່ນດ່ຽງສະບຽງອາຫານ; 5) ການຟື້ນຟູເສດຖະກິດຫລັງພະຍາດລະບາດ Covid-19: ສິ່ງທ້າທາຍ ແລະ ນະໂຍບາຍ; 6) ທ່າອ່ຽງຂອງໂລກ ແລະ ຈຸດສຸມການຫັນເປັນດິຈິຕອນ ຂອງ ສປປ ລາວ; 7) ບົດບາດຂອງ ສຄອຊ ໃນການຊຸກຍູ້ການຫັນເປັນອຸດສາຫະກໍາ ແລະ ການສົ່ງເສີມການຄ້າ. ພ້ອມຮັບຟັງການປະກອບຄໍາເຫັນ ຂອງພະແນກອຸດສາຫະກໍາ ເເລະ ການຄ້າ ຂອງນະຄອນຫຼວງວຽງຈັນ, ແຂວງຈຳປາສັກ ເເລະ ແຂວງອຸດົມໄຊ.
ຜ່ານການສະຫລຸບຕີລາຄາ ແລະ ຖອດຖອນບົດຮຽນໃນມື້ທຳອິດ ພວກເຮົາສາມາດສະຫລຸບສັງລວມເປັນບົດຮຽນ ໃນການຜັນຂະຫຍາຍ ແລະ ຈັດຕັ້ງປະຕິບັດ ແນວທາງນະໂຍບາຍ, ມະຕິຄຳສັງ ແລະ ແນວຄິດຊີ້ນໍາ ຂອງພັກ ໄດ້ວ່າ:
1). ມະຕິຂອງພັກ ທີ່ພົວພັນກັບຂະແໜງອຸດສາຫະກໍາ ແລະ ການຄ້າ ໃນໄລຍະຜ່ານມາເປັນຕົ້ນ ການຫັນເປັນອຸດສາຫະກຳ, ການຄ້າເປັນຕ້ອງໂສ້; ການສົ່ງເສີມຈຸນລະວິສາຫະກິດ, ວິສາຫະກິດຂະໜາດນ້ອຍ ແລະ ກາງ; ການແກ້ໄຂບັນຫາເຄັ່ງຮ້ອນ ທາງດ້ານເສດຖະກິດ-ການເງິນ, ການປະຕິບັດບັນດາໂຄງການ ທີ່ພົວພັນກັບພາລະບົດບາດ ຂອງຂະແໜງອຸດສາຫະກຳ ແລະ ການຄ້າ ທີ່ກຳນົດໃນແຜນດຳເນີນງານສະໄໝທີ XI ລ້ວນແຕ່ແມ່ນ ທິດນໍາທີ່ຖືກຕ້ອງ ທີ່ໄດ້ຜ່ານການຄົ້ນຄວ້າອັນເລິກເຊິ່ງ ທາງດ້ານທິດສະດີ, ໄດ້ຖອດບົດຮຽນ ຈາກພຶດຕິກຳຕົວຈິງ ແລະ ໄດ້ຈັດຕັ້ງປະຕິບັດ ຢ່າງມີໝາກຜົນ;
2). ພວກເຮົາຮັບຮູ້ວ່າ ໃນການຜັນຂະຫຍາຍ ແລະ ຈັດຕັ້ງປະຕິບັດມະຕິຂອງພັກດັ່ງກ່າວ, ເຖິງຈະມີຜົນສຳເລັດຫລາຍ, ແຕ່ກໍຍັງມີຂໍ້ຄົງຄ້າງ ທີ່ຕ້ອງໄດ້ປັບປຸງແກ້ໄຂ ເປັນຕົ້ນ: ຄວາມເຂົ້າໃຈ ຕໍ່ມະຕິຂອງພັກ ຍັງບໍ່ທັນເລິກເຊິ່ງ, ເຂົ້າໃຈແບບລວມໆ-ຜິວເຜີນ ເຮັດໃຫ້ບໍ່ສາມາດ ຜັນຂະຫຍາຍເປັນແຜນປະຕິບັດລະອຽດ, ບໍ່ຮູ້ວິທີເຮັດ; ຄວາມກະຕືລືລົ້ນ, ຄວາມເປັນເຈົ້າການ, ເປັນເຈົ້າຕົນເອງ, ເອົາໃຈໃສ່ ແລະ ຫົວຄິດປະດິດສ້າງ ໃນການສຶກສາ, ຄົ້ນຄວ້າ, ຜັນຂະຫຍາຍ ແລະ ຈັດຕັ້ງປະຕິບັດ ຍັງບໍ່ທັນສູງ;
3). ການຈັດຕັ້ງປະຕິບັດມະຕິຂອງພັກ ໃນຂະແໜງອຸດສາຫະກຳ ແລະ ການຄ້າ ບໍ່ວ່າຈະແມ່ນການຫັນເປັນອຸດສາຫະກໍາ, ການສົ່ງເສີມການຄ້າ, ການອຳນວຍຄວາມສະດວກທາງດ້ານການຄ້າ, ການຄຸ້ມຄອງການນໍາເຂົ້າ ແລະ ສົ່ງອອກ, ການຄຸ້ມຄອງລາຄາສິນຄ້າ ແລະ ອື່ນໆ ພົວພັນກັບຫລາຍຂະແໜງການ, ແຕ່ກົນໄກການປະສານງານ ແລະ ປະສານສົມທົບ ຍັງບໍ່ທັນຄ່ອງຕົວ ແລະ ກົມກຽວກັນດີ ເຮັດໃຫ້ການຈັດຕັ້ງປະຕິບັດ ຍັງບໍ່ທັນມີປະສິດທິພາບ ແລະ ປະສິດທິຜົນເທົ່າທີ່ຄວນ;
4). ການຜັນຂະຫຍາຍ ແລະ ຈັດຕັ້ງປະຕິບັດມະຕິພັກ ຍັງມີລັກສະນະເອື່ອຍອີງ ລໍຖ້າການຊີ້ນຳຈາກຂັ້ນເທິງ, ລໍຖ້າງົບປະມານ, ລໍຖ້າການຊ່ວຍເຫລືອຈາກພາຍນອກ ເເລະ ອື່ນໆ. ການນຳພາຊີ້ນໍາ ເເລະ ກວດກາການ ການຜັນຂະຫຍາຍ ແລະ ຈັດຕັ້ງປະຕິບັດ ຍັງບໍ່ທັນເປັນລະບົບ, ບໍ່ທັນເປັນປົກກະຕິ ແລະ ບໍ່ທັນໃກ້ຊິດຕິດແທດພຽງພໍ ເຮັດໃຫ້ເກີດມີສະພາບ ເຮັດກະໄດ້ ບໍ່ເຮັດກະໄດ້ ຫຼື ຄ່ອຍເຮັດຄ່ອຍເປັນ ຄ່ອຍໄປ. ໂດຍລວມແລ້ວ ແມ່ນຍັງຂາດຄວາມເປັນເອກະລາດ ແລະ ຄວາມເປັນເຈົ້າຕົນເອງ.