ອີກໜຶ່ງເວທີທີ່ສາວໆຕັ້ງຕາລໍຖ້າທີ່ຈະສະແດງສັກກະຍະພາບ ແລະ ຄວາມສາມາດທີ່ຕົນເອງມີ ສໍາລັບສາວໆທີ່ມີ ຄວາມຝັນ ແລະ ມີຄວາມສາມາດ ຢາກເປັນເຈົ້າຂອງຕໍາແໜ່ງອັນຊົງຄຸນຄ່າ ໂດຍສາມາດຕິດຕາມຂໍ້ມູນການເຄື່ອນໄຫວຕ່າງໆຂອງກອງປະກວດໄດ້ທາງເພຈ Miss Supranational Lao ມີສຊຸບປຣາ ເນຊັນແນລລາວ ແລະ ຕອນນີ້ທີມຂ່າວບັນເທີງໄດ້ຍິນຂ່າວແວ່ວໆມາວ່າ ສາວງາມເຈົ້າຂອງຕໍາແໜ່ງ Miss Universe Laos ກໍກຽມລົງແລ້ວເດີ.
ໂດຍມີຂ່າວອອກມາວ່າເປັນທີ່ແນ່ນອນແລ້ວລະ ສຳລັບສາວງາມສຸດໜ້າຮັກຄຣິດຕິນາ ລາຊະສິມມາ ຈະລົງຊີງມົງກຸດ MissSuprana tional 2024 ແລະ ທີ່ສໍາຄັນໃນມື້ທີ່ຜ່ານມາ ຄຣິດຕິນາ ບິນລັດຟ້າໄປຮ່ວມງານຖະແຫຼງຂ່າວ ແລະ ເປີດໂຕມົງກຸດ Miss Supranational Thailand 2024 ຖືວ່າເປັນຂ່າວເຊຍມ່ວນ ສໍາລັບແຟນນາງງາມກັນເລີຍ ແຕ່ເຈົ້າຕົວເອງສາວຄຣິດຕິນາ ຍັງບໍ່ທັນເປີດເຜີຍເທື່ອ ເພາະເພິ່ນຂໍອຸບໄວ້ກ່ອນ ສະນັ້ນແຟນໆຕ້ອງຖ້າຕິດຕາມໄປນໍາກັນ ເດີ.
ງານນີ້ເປັນການພົບປະກັບເຈົ້າຂອງເວທີ Miss Supranational ຄັ້ງທຳອິດ ເຊິ່ງສາວຄຣິດຕິນາ ກໍໄດ້ໂພສຜ່ານ ເຟສບຸ໊ກຂອງຕົນເອງວ່າ: “ ເປັນການພົບປະກັບເຈົ້າຂອງເວທີ Miss Supranational ຄັ້ງທຳອິດທີ່ອົບອຸ່ນສຸດ ເພິ່ນໜ້າຮັກ ແລະ ໃຈດີຫຼາຍ ໄດ້ລົມແລກປ່ຽນກັນຫຼາຍໆຢ່າງ ຮ່ວມງານຖະແຫຼງຂ່າວ ແລະ ເປີດໂຕມົງກຸດ Supranational Thailand ” .
ໃນການຮ່ວມງານຖະແຫຼງຂ່າວ ແລະ ເປີດໂຕມົງກຸດ Miss Supranational Thailand ໃນຄັ້ງນີ້ ສາວ ຄຣິດຕິນາ ກໍໄດ້ມີການຄວງຄູ່ໄປກັບ ອ້າຍໂຕໂຕ້ ພອນສິນ ປະທານເວທີ Miss Supranational Laos ນັ້ນເອງ ບອກເລີຍງານນີ້ເວທີຕ້ອງກັບມາຄຶກຄັກອີກຄັ້ງແນ່ນອນເລີຍ. ພ້ອມນີ້, ທັງສອງຄົນກໍຍັງໄດ້ຮ່ວມຖ່າຍພາບກັບປະທານເວທີ Miss Spranational ແລະ Miss Supranational 2023 ອີກດ້ວຍ ງານນີ້ເປັນຮູບເປັນຮ່າງຂຶ້ນແລ້ວ ເຫັນແນວນີ້ປັກໝຸດກຽມເຊຍນ້ອງໄດ້ເລີຍໃນເວທີສາກົນເດີທຸກຄົນ.