ສຳນັກຂ່າວຕ່າງປະເທດລາຍງານວ່າ: ເສດຖະກິດອັງກິດ ເຂົ້າສູ່ພາວະຖົດຖອຍ ຫລັງຈີດີພີ ຫົດຕົວ 2ໄຕມາດຕິດຕໍ່ກັນ ໂດຍສະຫຼຸບເສດຖະກິດໝົດປີ ຂະຫຍາຍຕົວພຽງ0,1%.
ສຳນັກງານສະຖິຕິແຫ່ງຊາດຂອງອັງກິດ ເປີດເຜີຍໃນວັນທີ 15 ກຸມພາວ່າ: ລວມຍອດຜະລິດຕະພັນພາຍໃນ ຫຼື ຈີດີພີ (GDP) ໄຕມາດ4 ປີ2023 ຫົດຕົວລົງ0,3% ແລະ ເປັນການຫົດຕົວຕິດຕໍ່ກັນ2ໄຕມາດ ເຊິ່ງບົງຊີ້ວ່າ ເສດຖະກິດ ອັງກິດ ເຂົ້າສູ່ພາວະຖົດຖອຍທາງເທັກນິກແລ້ວ.
ກ່ອນໜ້ານີ້ບັນດານັກເສດຖະສາດຄາດຄະເນວ່າຕົວເລກຈີດີພີ ໄຕມາດ4ຂອງອັງກິດອາດຫົດຕົວພຽງ0,1%
ລາຍງານຂອງສຳນັກງານສະຖິຕິແຫ່ງຊາດ ຍັງລະບຸອີກວ່າ: ພາກສ່ວນຫຼັກທັງ3 ພາກສ່ວນຂອງອັງກິດຫົດຕົວທັງໝົດໃນໄຕມາດ4 ໂດຍພາກການບໍລິການຫົດຕົວລົງ0,2%, ພາກການຜະລິດຫົດຕົວລົງ1% ແລະ ພາກການກໍ່ສ້າງຫົດຕົວລົງ1,3%
ສ່ວນດັດຊະນີຜູ້ບໍລິໂພກ(CPI) ເຊິ່ງເປັນມາດວັດອັດຕາເງິນເຟີ້ຈາກການໃຊ້ຈ່າຍຂອງຜູ້ບໍລິໂພກ ຊົງຕົງທີ່ລະດັບ4%ໃນເດືອນມັງກອນ 2024ເມື່ອທຽບເປັນລາຍປີ. ແຕ່ຕົວເລກດັ່ງກ່າວຍັງຢູ່ໃນລະດັບສູງກວ່າເງິນເຟີ້ຂອງຫລາຍປະເທດ ແລະ ສູງກວ່າເປົ້າໝາຍຂອງທະນາຄານກາງອັງກິດ ທີ່ຕັ້ງໄວ້ໃນລະດັບ 2%.
