ແຂວງເຊກອງແມ່ນໄດ້ຈັດຕັ້ງຄະນະລົງຊຸກຍູ້ການເສຍຄ່າທຳນຽມທາງປະຈຳປີ 2024 ຢ່າງຕໍ່ເນື່ອງ ແລະເຫັນວ່າຜູ້ຊົມໃຊ້ຍານພາຫະນະແມ່ນມີຄວາມຕື່ນຕົວສູງໃນການເປັນເຈົ້າການເສຍພັນທະພາສີອາກອນຕາມລະບຽບກົດໝາຍກຳນົດໄວ້.
ໂດຍຂະແໜງສ່ວຍສາອາກອນປະຈໍາ ເມືອງລະມາມ ຮ່ວມກັບ ທະນາຄານພັດທະນາລາວ (ທພລ) ສາຂາແຂວງເຊກອງ ແລະ ກອງບັນຊາການ ປກສ ແຂວງເຊກອງ ກໍຄື ເຈົ້າໜ້າທີ່ຕໍາຫຼວດຈາະລາຈອນ ໄດ້ເປີດຂະບວນການຊຸກຍູ້ເສຍຄ່າທໍານຽມທາງ ປະຈໍາປີ 2024 (ເປີດຈຸດບໍລິການກັບທີ່) ຢູ່ບ້ານຫ້ວຍຂຽວ-ໜອງບົງ ໃນວັນທີ 8 ກຸມພາ 2024 ໂດຍການນໍາພາຂອງທ່ານ ເຫຼົາທອງ ໂຄດສັກເມືອງ ຮອງຫົວໜ້າສ່ວຍສາອາກອນ ປະຈໍາເມືອງລະມາມ, ທ່ານ ນາງ ວິຈິດຕາ ສຸທໍາມະໂກສານ ຫົວໜ້າຂະແໜງການຕະຫຼາດ ທະນາຄານພັດທະນາລາວ ສາຂາແຂວງເຊກອງ ແລະ ພາກສ່ວນກ່ຽວຂ້ອງ ເຂົ້າຮ່ວມ.
ທ່ານ ເຫຼົາທອງ ໂຄດສັກເມືອງ ກ່າວວ່າ: ແຂວງເຊກອງ ໄດ້ເລີ່ມຈັດຕັ້ງການຊໍາລະຄ່າທໍານຽມທາງ ຜ່ານລະບົບທະນາຄານມາແຕ່ປີ 2019 ປັດຈຸບັນ ແມ່ນຍັງດໍາເນີນໄປຢ່າງເປັນປົກກະຕິ ແລະ ມີປະສິດທິຜົນ ໂດຍສະເພາະແມ່ນໄດ້ສ້າງເງື່ອນໄຂອໍານວຍຄວາມສະດວກໃຫ້ອົງການຈັດຕັ້ງລັດ, ພະນັກງານ-ລັດຖະກອນ ກໍຄື ປະຊາຊົນບັນດາເຜົ່າ ໄດ້ເສຍຄ່າທໍານຽມທາງປະຈໍາແຕ່ລະປີ ໃຫ້ເປັນຂະບວນຟົດຟື້ນ ແລະ ທັນກໍານົດເວລາ. ພ້ອມນີ້, ຍັງເປັນການຫັນການເກັບລາຍຮັບເຂົ້າສູ່ລະບົບທັນສະໄໝ ເພື່ອຫຼີກລຽງການຮົ່ວໄຫຼຂອງລາຍຮັບງົບປະມານ.
ທ່ານ ເຫຼົາທອງ ໂຄດສັກເມືອງ ໃຫ້ຮູ້ຕື່ມວ່າ: ການເປີດບໍລິການເສຍຄ່າທໍານຽມທາງຈຸດທີ I ຢູ່ປ້ອມຫຼັກ 3 ບ້ານໂພນໄຊ ໃນລະຫວ່າງວັນທີ 30 ມັງກອນ ຫາ ວັນທີ 6 ກຸມພາ 2024 ສັງເກດເຫັນວ່າບຸກຄົນ, ນິຕິບຸກຄົນ, ການຈັດຕັ້ງລັດ ແລະ ບໍລິສັດລັດວິສາຫະກິດ ທີ່ເປັນເຈົ້າຂອງ ຫຼື ນໍາໃຊ້ພາຫະນະ (ລົດ) ພາຍໃນແຂວງ ແລະ ຕ່າງແຂວງ ໄດ້ເຂົ້າມາຊໍາລະຄ່າທໍານຽມທາງປະຈໍາປີ 2024 ທັງໝົດ 290 ຄັນ. ໃນນີ້, ລົດໃຫຍ່ 273 ຄັນ ແລະ ລົດຈັກ 17 ຄັນ, ສາມາດສ້າງລາຍຮັບໄດ້ 100 ລ້ານກວ່າກີບ.
