ປີທ່ອງທ່ຽວລາວ ຄັ້ງທີ 4 ປີ 2024 ມີຫຼາກຫຼາຍກິດຈະກໍາຢັ່ງຢາຍແຕ່ເໜືອຕະຫຼອດໃຕ້ ເຊິ່ງໜັງສືພິມເສດຖະກິດການຄ້າສະບັບມື້ນີ້ ຈະນໍາສະເໜີບັນດາກິດຈະກໍາຕ່າງໆໃນປີ 2024 ຢູ່ບັນດາແຂວງ 4 ແຂວງພາກໃຕ້ໃຫ້ທ່ານຜູ້ອ່ານໄດ້ຮັບຊາບ ເພື່ອຈະໄດ້ກຽມພ້ອມຈັດຕາຕະລາງການເດີນທາງທ່ຽວຊົມຕາມຄວາມເໝາະສົມ.
ດັ່ງທີ່ຮູ້ແລ້ວວ່າ 4 ແຂວງພາກໃຕ້ມີ: ແຂວງສາລະວັນ, ເຊກອງ, ຈໍາປາສັກ ແລະ ແຂວງ ອັດຕະປື ເຊິ່ງລ້ວນແຕ່ເປັນດິນແດນອູ່ເຂົ້າອູ່ປາ ແຕ່ລະເຂດແຂວງກໍມີປະເພນີປະຕິບັດທີ່ຄ້າຍຄຽງ ແລະ ມີບາງຢ່າງທີ່ແຕກຕ່າງກັນ. ແນວໃດກໍຕາມເຮົາມາຮູ້ຈັກກິດຈະກໍາສໍາຄັນໄລຍະປີທ່ອງທ່ຽວລາວຢູ່ 4 ແຂວງພາກໃຕ້ນໍາເລີຍ ວ່າມີຫຍັງແດ່ ແລະ ຈັດຂຶ້ນໃນເດືອນໃດ?
■ ແຂວງສາລະວັນ:
1. ບຸນນະມັດສະການພະແກ້ວນໍ້າຢາດ ເຊິ່ງເປັນອີກປາງບຸນໜຶ່ງທີ່ປະຊາຊົນຊາວແຂວງສາລະວັນ ໃຫ້ຄວາມສໍາຄັນຈົນກາຍເປັນວັດທະນະທໍາປະຈໍາທ້ອງຖິ່ນທີ່ພົ້ນເດັ່ນ ໂດຍໄດ້ສືບທອດປະຕິບັດກັນມາໃນໄລຍະຕົ້ນເດືອນກຸມພາທຸກໆປີ.
2. ບຸນນະມັດສະການຮອຍພະບາດນາດູ່ ກໍແມ່ນອີກໜຶ່ງກິດຈະກໍາສໍາຄັນລະດັບແຂວງໃນປີ 2024 ທີ່ຈະຈັດຂຶ້ນໃນທ້າຍເດືອນກຸມພາ ທ່ານສາມາດໄປສັກກາລະບູຊາ ຫຼື ຮ່ວມສະຫຼອງໄດ້ໃນປີໜ້າ.
3. ເທສະການປີ້ງໄກ່ນາປົ່ງ ເຫຼົ້າຂາວເມືອງຄົງ ອັນເປັນຊື່ທີ່ໃຜໆກໍຄຸ້ນເຄີຍ ເຊິ່ງຫຼາຍຄົນກໍນິຍົມບໍລິໂພກ ຫຼື ຊື້ເປັນຂອງຕ້ອນຂອງຝາກ ເວລາເດີນທາງຜ່ານແຂວງສາລະວັນ ເຊິ່ງຈະຈັດຂຶ້ນໃນເດືອນເມສາ 2024.
■ ແຂວງຈໍາປາສັກ:
1. ງານບຸນມະໂຫລານ ກາເຟ – ຊາບໍລະເວນ: ປີໜ້ານີ້ແຂວງຈໍາປາສັກ ມີກິດຈະກໍາລະດັບແຂວງພຽງ 1 ກິດຈະກໍາ ແຕ່ຈະຈັດເປັນງານໃຫຍ່ສົມຄວນ ໃນໄລຍະເດືອນກຸມພາ 2024 ແນ່ນອນທ່ານຈະໄດ້ສໍາຜັດກັບຄວາມແຕກຕ່າງ ແລະ ສິ່ງໜ້າສົນໃຈຫຼາຍຢ່າງ.
■ ແຂວງເຊກອງ:
1. ບຸນອະນຸສາວະລີອົງແກ້ວ ແລະ ສວນຫຼັກເມືອງ: ເປັນໜຶ່ງກິດຈະກໍາລະດັບ ແຂວງທີ່ໜ້າສົນໃຈ ເຊິ່ງຈະມີມວນຊົນເຂົ້າຮ່ວມເປັນຈໍານວນຫຼາຍ ຄວາມເບີກບານຕື່ນຕາຕື່ນໃຈກໍຈະໄດ້ເຫັນໃນແບບທີ່ບໍ່ທັນໄດ້ເຫັນມາກ່ອນ ຈະຈັດຂຶ້ນໃນເດືອນມັງກອນ.
2. ບຸນປະເພນີເຜົ່າກະຕູ: ຈະຈັດຂຶ້ນໃນເດືອນມີນາ ສໍາຜັດກັບຄວາມເປັນເອກະລັດ້ານການນຸ່ງຖື, ພາສາປາກເວົ້າ ແລະ ການດໍາລົງຊີວິດ ທີ່ສໍາຄັນຫາກໄດ້ໄປແລ້ວກໍຈະຮັບຮູ້ເຂົ້າໃຈໃນດ້ານຂອງ ຄວາມເຊື່ອຖື ແລະ ນໍ້າໃຈອັນໂດດເດັ່ນດີງາມຂອງຊາວເຜົ່າກະຕູໄດ້ແບບເຕັມໆ.
■ ແຂວງອັດຕະປື: ເຖິງຈະເປັນແຂວງນ້ອຍ ແຕ່ກໍມີຫຼາຍຊົນເຜົ່າອາໄສຢູ່ ໃນປີໜ້ານີ້ແຂວງອັດຕະປືຈຶ່ງສະເໜີຈັດກິດຈະກໍາລະດັບແຂວງເຖິງ 7 ກິດຈະກໍາດ້ວຍກັນ ຄື:
1. ບຸນໄຂປະຕູເລົ້າເຜົ່າໂອຍ: ເປັນຊົນເຜົ່າໜຶ່ງທີ່ມີປະຊາກອນຫຼາຍໃນແຂວງອັດຕະປື ແລະ ມີພື້ນຖານການດໍາລົງຊີວິດທີ່ມີເອກະລັກ ຫາກໄປສໍາຜັດກໍຈະໄດ້ເຫັນໃນຄວາມແຕກຕ່າງ ເຊິ່ງຈະຈັດຂຶ້ນເດືອນມັງກອນ.
2. ງານບຸນບຣະວຽງ ເຜົ່າ ເບຣົາ: ອີກໜຶ່ງກິດຈະກໍາໃນເດືອນມັງກອນ ເຊິ່ງເປັນຄວາມເຊື່ອຂອງຊົນເຜົ່າທີ່ເຂົາເຈົ້າຍັງສືບທອດປະຕິບັດຈົນກາຍເປັນປະເພນີເທົ່າທຸກວັນນີ້.
3. ງານຄາລະວານ, ຕັ້ງແຄັມ 4 ແຂວງພາກໃຕ້: ຈະມີຂຶ້ນໃນເດືອນມີນາ 2024 ເຊິ່ງນັບຈາກນີ້ໄປອີກບໍ່ດົນເຊັ່ນກັນ.
4. ສະເຫຼີມສະຫຼອງຫໍຫຼັກເມືອງ ແລະ ງານປະກວດນາງສາວອັດຕະປື: ກິດຈະກໍານີ້ຈະຈັດຂຶ້ນໃນເດືອນເມສາ ເຊິ່ງເປັນໄລຍະບຸນປີໃໝ່ລາວ ຢ່າລືມສ້າງໂອກາດຍາດເວລາໄປຮ່ວມຊົມ.
5. ບຸນກິດເຂົ້າໃໝ່: ເປັນກິດຈະກໍາງານເດືອນຕຸລາ ເຊິ່ງເປັນໄລຍະທີ່ເກັບກ່ຽວຜົນຜະລິດລະດູຝົນໃໝ່ໆ ເຂົ້າກໍາລັງຫອມກົມກ່ອມດ້ວຍລົດຊາດທີ່ຫາກໍນໍາມາຈາກທ້ອງທົ່ງດິນນາ.
6. ບຸນຊ່ວງເຮືອປະເພນີ: ຄາດວ່າຈະຈັດໃນເດືອນຕຸລາເຊັ່ນດຽວກັນ ໂດຍແຂວງອັດຕະປືມີສາຍນໍ້າເຊກອງເປັນແມ່ນໍ້າໃຫຍ່ ເໝາະແກ່ການດໍາເນີນກິດຈະກໍາກີລາໜ້ານໍ້າປະເພດເຮືອຊ່ວງໄດ້ເໝາະສົມ.
7. ບຸນລະນຶກບຸນຄຸນພະເຈົ້າໄຊເສດຖາ: ເປັນງານແຫ່ງການສັກກາລະບູຊາບັນພະບຸລຸດ ເຊິ່ງມີພະທາດຢູ່ເມືອງໄຊເສດຖາ ແຂວງອັດຕະປື ຈະຈັດຂຶ້ນໃນເດືອນທັນວາ 2024 ຫຼື ເປັນກິດຈະກໍາສໍາຄັນສຸດທ້າຍຂອງປີ.
