ວ້າວ! ສະແດງຄວາມຍິນດີດ້ວຍກັບບຸກຄົນໃນວົງການບັນເທີງຂອງລາວເຮົາ ຂຶ້ນຮັບລາງວັນລະດັບນານາຊາດໃນເວທີອັນຊົງກຽດ ຍິນດີນຳປະທານຄົນຫຼໍ່ ທ່ານ ສຸລິຍົມ ຈັນດາລາສານ ຂຶ້ນຮັບລາງວັນທີ່ປະເທດໄທ,
ພ້ອມນີ້ປະທານ ສຸລິຍົມ ຍັງໄດ້ກ່າວຂໍຂອບໃຈໂອກາດດີໆທີ່ມອບໃຫ້ຂ້າພະເຈົ້າ ເຂົ້າຮັບລາງວັນອັນຊົງກຽດສຸດຍິ່ງໃຫຍ່ ລະດັບນານາຊາດ THE WORLD’S HIGHEST AWARDS 2023 ທີ່ບາງກອກ ປະເທດໄທ ໃນວັນທີ 19 ສິງຫາ 2023 ນີ້ ເຊິ່ງປະເພດລາງວັນທີ່ໄດ້ຮັບແມ່ນ Best International Business Awards 2023 ສາຂາຜູ້ສ້າງສັນຜົນງານດີເດັ່ນເພື່ອສັງຄົມແຫ່ງປີ.
ເຊັ່ນດຽວກັບໜຸ່ມຕ້າ ເອແພັກ ຜູ້ຫຼາກຫຼາຍຄວາມສາມາດ ແລະ ມີຜົນງານຢ່າງນັບບໍ່ຖ້ວນໃນວົງການບັນເທີງລາວ ກໍໄດ້ຮັບກຽດເຂົ້າຮ່ວມຮັບລາງວັນໃນງານປະກາດລາງວັນອັນຊົງກຽດສຸດຍິ່ງ ໃຫຍ່ລະດັບນານາຊາດ THE WORLD’S HIGHEST AWARDS 2023 ທີ່ບາງກອກ ປະເທດໄທ ເຊັ່ນດຽວກັນ ເຊິ່ງໄດ້ຮັບປະເພດລາງວັນ Best International Business Awards 2023 ສາຂາສ້າງສັນຜົນງານດີເດັ່ນເພື່ອສັງຄົມແຫ່ງປີ ຍິນດີນຳອ້າຍຄົນເກັ່ງຄົນນີ້ນຳດ້ວຍ.
ນອກຈາກນີ້, ສາວ ປາເປົ້າ ໄພມະນີ ລາດສະບັນເທົາ Miss Universe Laos ຄົນຫຼ້າສຸດກໍກຽມຂຶ້ນຮັບລາງວັນໃນງານປະກາດລາງວັນອັນຊົງກຽດສຸດຍິ່ງໃຫຍ່ລະດັບນານາຊາດຄັ້ງນີ້ເຊັ່ນດຽວກັນ ໃນສາຂາລາງວັນ Global Star Media Awards 2023 ຫຼື ນາງງາມສ້າງຜົນງານດີເດັ່ນ ເພື່ອສັງຄົມແຫ່ງປີ.
ທາງຂ່າວບັນເທີງເອງຕ້ອງຂໍສະແດງຄວາມຍິນດີ ແລະ ສະແດງຄວາມຊົມເຊີຍກັບລາງວັນທີ່ໄດ້ຮັບຂອງທັງສາມທ່ານພາຍໃນງານຄັ້ງນີ້ດ້ວຍ ແນ່ນອນວ່າເປັນໃບໜ້າໃບຕາອັນສະຫງ່າງາມ ແລະ ສ້າງຊື່ສຽງໃຫ້ກັບປະເທດລາວຂອງພວກເຮົາ ຝາກແຟນຂ່າວບັນເທີງຕິດຕາມຜົນງານ ແລະ ການເຄື່ອນໄຫວຂອງທັງສາມທ່ານນໍາເດີ.