ທຸກສາຍສົ່ງໄຟຟ້າແມ່ນມີຄວາມຈຳເປັນຕ້ອງຕັດຕົ້ນໄມ້ອອກຈາກແລວທາງ ເພື່ອຄວາມສະດວກໃນການດຶງສາຍໄຟໄປຫາຈຸດໝາຍ ແຕ່ຫຼັງຈາກນັ້ນກໍມີການປູກປ່າທົດແທນໃນພື້ນທີ່ອື່ນ.
ວັນທີ 7 ກໍລະກົດ 2023 ໂຄງການຟື້ນຟູປ່າ ແລະ ປູກໄມ້ທົດແທນແລວສາຍສົ່ງໄຟຟ້າ 230 ກິໂລໂວນ ຈາກສະຖານນີຊຳໃຕ້ – ເມືອງຫົວເມືອງ ໄດ້ຈັດພິທີປູກໄມ້ ຢູ່ເຂດພູໜອງສູງ ເມືອງວຽງໄຊ ແຂວງຫົວພັນ ໂດຍມີ ທ່ານ ຄຳ ໂຮມມີໄຊ ເຈົ້າເມືອງ ວຽງໄຊ ມີພາກສ່ວນກ່ຽວຂ້ອງຂັ້ນແຂວງ, ຂັ້ນເມືອງ, ນາຍ – ພົນທະຫານ ກອງບັນຊາການ ທະຫານເມືອງ ແລະ ລັດວິສາຫະກິດເຂົ້າຮ່ວມ.
ທ່ານ ບຸນພອນ ບຸດພະຈັນ ຮອງຫົວໜ້າ ພະແນກ ກະສິກຳ ແລະ ປ່າໄມ້ ແຂວງຫົວພັນ ໄດ້ໃຫ້ຮູ້ວ່າ: ໂຄງການຟື້ນຟູປ່າ ແລະ ປູກໄມ້ທົດແທນແລວສາຍສົ່ງໄຟຟ້າ 230 ກິໂລໂວນ ຈາກສະຖານນີຊຳໃຕ້-ເມືອງຫົວເມືອງ ໄດ້ນຳໃຊ້ງົບປະມານ 2 ຕື້ 564 ລ້ານກວ່າກີບ ໃນນີ້ໄດ້ຈັດຕັ້ງປະຕິບັດແລ້ວ 1 ຕື້ 852 ລ້ານກວ່າກີບ, ເນື້ອທີ່ປູກໄມ້ສໍາເລັດແລ້ວ 265 ເຮັກຕາ, ໃຊ້ເບຍໄມ້ຈຳນວນ 178.875 ເບ້ຍ ມີ 4 ຊະນິດພັນໄມ້ຄື: ເບ້ຍໄມ້ຄາຍປ່າ, ເບ້ຍໄມ້ໂລງເລງ, ເບ້ຍໄມ້ແປກ, ເບ້ຍໄມ້ດູ່.
ໃນປີ 2023 ນີ້ ໄດ້ປູກຢູ່ 3 ເຂດ ເປັນຕົ້ນ: ຕາມສາຍທາງ ແຕ່ເມືອງຊໍາເໜືອ ຫາ ສະໜາມບິນໜອງຄ້າງ, ສາຍທາງແຕ່ 3 ແຍກຫ່າງລ້ອງ ເມືອງວຽງໄຊ ໄປຫາ ເທດສະບານເມືອງວຽງໄຊ ແລະ ເຂດພູໜອງສູງ. ສະເພາະເຂດພູໜອງສູງ ໄດ້ຈັດຕັ້ງປະຕິບັດໃນເນື້ອທີ່ 65.82 ເຮັກຕາ ມີເບ້ຍໄມ້ ຈຳນວນ 41,135 ເບ້ຍ.
ການປູກໄມ້ໃນຄັ້ງນີ້ ເພື່ອແນ່ໃສ່ປົກປັກຮັກສາປ່າໄມ້ ແລະ ຟື້ນຟູບູລະນະປ່າໄມ້ໃຫ້ກັບຄືນສູ່ສະພາບເດີມ, ມີຄວາມສົມບູນຂື້ນເທື່ອລະກ້າວ ທີ່ສຳຄັນທຸກພາກສ່ວນຕ້ອງມີສ່ວນຮ່ວມນຳກັນ ພາຍຫຼັງປູກແລ້ວ ຕ້ອງໄດ້ບົວລະບັດຮັກສາຕົ້ນໄມ້ໃຫ້ຈະເລີນເຕີບໃຫຍ່.
ການປູກປ່າທົດແທນສຳຄັນຫຼາຍ ເພື່ອຄືນພື້ນທີ່ສີຂຽວສູ່ທຳມະຊາດທົດແທນຈຳນວນທີ່ສູນເສຍໄດ້ເນື່ອງຈາກການກໍ່ສ້າງ