ສຳນັກຂ່າວຊິນຫົວລາຍງານວ່າ ທ່ານ ໂອຊາມາ ເຣບີ ປະທານອົງການບໍລິຫານຄອງຊູເອຊ ( SCA ) ຂອງເອຢິບ ເປີດເຜີຍວ່າ ຄອງຊູເອຊ ( Suez ) ສ້າງລາຍໄດ້ບັນລຸເຖິງ 7,9 ຕື້ໂດລາສະຫລັດ ໃນປີ 2022 ເຊິ່ງເປັນຕົວເລກສູງເປັນປະຫວັດການ. ໃນຂະນະທີ່ລາຍໄດ້ປີ 2021 ລວມມີ 6,3 ຕື້ໂດລາສະຫະລັດ. ນອກນັ້ນ, ຍັງມີເຮືອຂົນສົ່ງສິນຄ້າຫຼາຍກວ່າ 23 ພັນລຳ ເຊິ່ງບັນທຸກສິນຄ້າ 1,4 ຕື້ໂຕນ ແລ່ນຜ່ານຄອງຊູເອຊ ໃນປີ 2022 ເພີ່ມຂຶ້ນຈາກ 21.700 ລຳ ເມື່ອປີຜ່ານມາ.
ທ່ານ ວາເອລ ອັດດົວ ອະດີດຮອງປະທານອົງການດັ່ງກ່າວ ລະບຸວ່າ: ລາຍໄດ້ທີ່ເພີ່ມສູງຂຶ້ນນັ້ນມີປັດໄຈມາຈາກ ຄວາມຕ້ອງການນໍ້າມັນທີ່ເພີ່ມຂຶ້ນ, ເນື່ອງຈາກການຂົນສົ່ງພະລັງງານທາງທະເລ ຕ້ອງໄດ້ເພິ່ງພາການເດີນທາງຜ່ານຄອງຊູເອຊ ແລະ ຄາດວ່າລາຍໄດ້ຈະສືບຕໍ່ເພີ່ມຂຶ້ນຢ່າງຕໍ່ເນື່ອງໃນອະນາຄົດ. ເພາະວ່າຄ່າທຳນຽມຜ່ານທາງ ຈະເພີ່ມຂຶ້ນອີກ 10 – 15% ນັບແຕ່ເດືອນມັງກອນປີ 2023 ເປັນຕົ້ນໄປ.