ສຳນັກຂ່າວຕ່າງປະເທດລາຍງານວ່າ: ກອງປະຊຸມສຸດຍອດຜູ້ນຳອາຊຽນ ຄັ້ງທີ 40 ແລະ 41 ແລະ ກອງປະຊຸມສຸດຍອດທີ່ກ່ຽວຂ້ອງ ທີ່ກຳປູເຈຍເປັນເຈົ້າພາບ ໃນນາມປະທານອາຊຽນ ໄດ້ປິດລົງໃນວັນທີ 13 ພະຈິກ 2022 ໂດຍ ສົມເດັດ ຮຸນເຊັນ ນາຍົກລັດຖະມົນຕີກຳປູເຈຍ ໄດ້ຮຽກຮ້ອງໃຫ້ບັນດາປະເທດສະມາຊິກ ຈົ່ງເພີ່ມທະວີ ຄວາມສາມັກຄີເປັນເອກະພາບ ເພື່ອຮັກສາຜົນປະໂຫຍດຮ່ວມກັນຂອງພາກພື້ນ ເຊິ່ງການທະວີການຮ່ວມມືກັນຢ່າງແໜ້ນແຟ້ນເປັນເອກະພາບກັນ ຈະເຮັດໃຫ້ອາຊຽນກາຍເປັນພາກພື້ນທີ່ມີສະຖຽນລະພາບ, ມີຄວາມເຂັ້ມແຂງ.
ຫຼັງຈາກນັ້ນ, ນາຍົກລັດຖະມົນຕີ ໄດ້ມອບຄ້ອນສັນຍາລັກໃຫ້ແກ່ ທ່ານ ໂຈໂກ້ ວິໂດໂດ ປະທານາທິບໍດີອິນໂດເນເຊຍ ເພື່ອປະຕິບັດໜ້າທີ່ປະທານອາຊຽນ ໃນປີ 2023, ຂະນະທີ່ຜູ້ນຳອິນໂດເນເຊຍ ກ່າວວ່າ: ອາຊຽນຕ້ອງຢຶດໝັ້ນ ໂດຍບໍ່ເປັນຕົວແທນໃຫ້ແກ່ “ ມະຫາອຳນາດປະເທດໃດກໍຕາມ ” ແລະ ຕ້ອງເພີ່ມທະວີການຮ່ວມມືກັນ ເພື່ອບໍ່ໃຫ້ບັນດາປະເທດມະຫາອຳນາດອາໄສພູມີສາດການເມືອງໃນພາກພື້ນນີ້ ເພື່ອເປັນສະໝໍລະພູມສົງຄາມເຢັນຄັ້ງໃໝ່.