ໜັງງສືພິມຈຳປາໄໝ່ ແຂວງຈຳປາສັກ ລາຍງານວ່າ: ວັນທີ 21 ຕຸລາ 2022 ຜ່ານມາ ພະແນກຖະແຫຼງຂ່າວ, ວັດທະນະທຳ ແລະ ທ່ອງທ່ຽວ (ຖວທ) ແຂວງຈໍາປາສັກ ນໍາໂດຍ ທ່ານ ນາງ ແສງສຸວັນ ຊຸຍພະສິດ ກໍາມະການພັກແຂວງ ຫົວໜ້າພະແນກ ຖວທ ແຂວງ ຮ່ວມກັບ ຂະແໜງມໍລະດົກໂລກວັດພູຈໍາປາສັກ, ຫ້ອງການ ຖວທ ເມືອງຈຳປາສັກ ແລະ ບໍລິສັດ ຍິ່ງໂຊກໄຊ
ຕະຫຼອດຮອດຄະນະພັກ – ອົງການປົກຄອງບ້ານ, ອົງການຈັດຕັ້ງຕ່າງໆຂອງບ້ານ ແລະ ພໍ່ແມ່ປະຊາຊົນບ້ານໜອງສະ ເມືອງຈໍາປາສັກ ໂດຍການສະໜັບສະໜູນຂອງໂຄງການພັດທະນາໂຄງລ່າງພື້ນຖານ ເພື່ອສົ່ງເສີມການທ່ອງທ່ຽວ ໄລຍະ 2 ໄດ້ສ້າງຂະບວນອະນາໄມສະຖານທີ່ທ່ອງທ່ຽວບູລິມະສິດ ມໍລະດົກໂລກວັດພູຈໍາປາສັກ ພາຍຫຼັງໄດ້ຮັບຜົນກະທົບຈາກການແຜ່ລະບາດຂອງພະຍາດ ໂຄວິດ-19.
ຈຸດປະສົງ ກໍເພື່ອຮອງຮັບການທ່ອງທ່ຽວ ແລະ ທັງເປັນການອະນາໄມສະຖານທີ່ດັ່ງກ່າວ ໃຫ້ມີຄວາມສະອາດສວຍງາມ. ນອກນີ້, ກໍເພື່ອສ້າງຜົນງານ, ສ້າງຂະບວນການຕ້ອນຮັບນັກທ່ອງທ່ຽວ ໃນລະດູການທ່ອງທ່ຽວທີ່ຈະມາເຖິງນີ້ ແລະ ຕ້ອນຮັບວັນສໍາຄັນຕ່າງໆຂອງຊາດ, ຂອງພັກ ແລະ ຂອງແຂວງ ໃຫ້ມີບັນຍາກາດຟົດຟື້ນ ແລະ ມີເນື້ອໃນຄວາມໝາຍເລິກເຊິ່ງ.
