ປະຊາຊົນຊາວຫວຽດນາມ ເຂດພາກກາງກຽມຮັບມືພາຍຸໄຕ້ຝຸ່ນໂນຣຸ ທີ່ຄາດວ່າຈະພັດເຂົ້າໃນຕອນເຊົ້າວັນທີ 28 ກັນຍານີ້ ປະຊາຊົນບາງເຮືອນໄດ້ມີການມັດລົດຈັກແຂນໄວ້ເພື່ອປ້ອງກັນນ້ຳຖ້ວມ, ມັດລົດໃຫຍ່ໄວ້ ປ້ອງກັນນ້ຳໄຫຼຊຸໄປ, ໃຊ້ເປົ໋າໃສ່ຊາຍ, ຖັງນໍ້າວາງຕາມຫຼັງຄາເຮືອນ ເພື່ອຕ້ານລົມ, ປ້ອງກັນຫລັງຄາບໍ່ໃຫ້ລົມພັດປິວ, ມີປະຊາຊົນຈຳນວນໜຶ່ງຊື້ເຄື່ອງຂອງຈຳເປັນໄວ້ ທາງການໄດ້ມີການກຽມອົບພະຍົກປະຊາຊົນທີ່ຢູ່ໃຈກາງຂອງພາຍຸ.
ດ້ານກົມອຸຕຸນິຍົມ ແລະອຸທົກກະສາດ ຂອງ ສປປ ລາວ ລາຍງານວ່າ: ພາຍຸໄຕ້ຝຸ່ນໂນຣູ ຄາດຄະເນຈະເຄື່ອນທີ່ຂຶ້ນຝັ່ງທາງພາກກາງຂອງປະເທດຫຽວດນາມ ໃນຕອນເຊົ້າຂອງວັນທີ 28 ກັນຍາ 2022 ແລະ ຈະສືບຕໍ່ເຄື່ອນທີ່ຜ່ານພາກກາງ ແລະ ພາກໃຕ້ ຂອງປະເທດລາວໃນຕອນບ່າຍວັນທີ 28 – 30 ກັນຍາ 2022, ຊື່ງຈະເຮັດໃຫ້ມີຝົນຕົກ ຟ້າຮ້ອງ ຟ້າເຫຼື້ອມໃນລະດັບຄ່ອຍ ຫາ ປານກາງຢູ່ທົ່ວໄປໃນແຕ່ລະພາກ ແລະ ຕົກໜັກ ຫາ ໜັກຫຼາຍ ພ້ອມມີລົມພັດແຮງຢູ່ບາງທ້ອງຖິ່ນໃນເຂດພາກກາງ ແລະ ພາກໃຕ້ ເຊັ່ນ: ນະຄອນຫຼວງວຽງຈັນ, ວຽງຈັນ, ບໍລິຄຳໄຊ, ຄຳມ່ວນ, ສະຫວັນນະເຂດ, ປາກເຊ, ສາລະວັນ, ເຊກອງ ແລະ ອັດຕະປື.
ແຈ້ງເຕືອນເຖີງອຳນາດການປົກຄອງທຸກພາກສ່ວນ ແລະ ປະຊາຊົນບັນດາເຜົ່າທີ່ອາໄສຢູ່ບັນດາເຂດແຂວງດັ່ງກ່າວ ຈົ່ງມີສະຕິລະມັດ ລະວັງຕໍ່ ສະພາບຝົນຕົກໜັກ, ລົມພັດແຮງ ທີ່ຈະເຮັດໃຫ້ມີຕົ້ນໄມ້, ເສົາໄຟຟ້າ, ແລະ ປ້າຍໂຄສະນາຫັກລົ້ມ, ມີດິນເຈື່ອນ, ນໍ້າຖ້ວມອັ່ງ ແລະ ນໍ້າຖ້ວມຊຸ ພ້ອມທັງກະກຽມເກັບມ້ຽນວັດຖຸສິ່ງຂອງທີ່ມີຄ່າ ແລະ ສັດລ້ຽງໄວ້ບ່ອນທີ່ປອດໄພ
ຮູບຈາກ: VN Express
