ສຳນັກຂ່າວຕ່າງປະເທດລາຍງານວ່າ ອົງການທ່ອງທ່ຽວໂລກ ແຫ່ງສະຫະປະຊາຊາດ ຄາດການວ່າ ສະຖານະການການແຜ່ລະບາດຂອງພະຍາດໂຄວິດ-19 ຈະສົ່ງຜົນໃຫ້ອຸດສາຫະກຳການທ່ອງທ່ຽວໂລກສູນເສຍລາຍໄດ້ປະມານ 2 ພັນຕື້ໂດລາສະຫະລັດ ໂດຍການຟື້ນຕົວຂອງການທ່ອງທ່ຽວໂລກເປັນໄປຢ່າງຊ້າໆ.
ອົງການທ່ອງທ່ຽວໂລກຄາດວ່າ ຈຳນວນນັກທ່ອງທ່ຽວຕ່າງປະເທດຈະຢູ່ທີ່ປະມານ 70-75% ເມື່ອທຽບກັບປີ 2019 ກ່ອນເກີດການແຜ່ລະບາດຂອງພະຍາດໂຄວິດ-19 ທີ່ມີນັກທ່ອງທ່ຽວຕ່າງປະເທດປະມານ 1.500 ລ້ານຄົນ ເຊິ່ງປີນີ້ ຄາດວ່າ ຈະຢູ່ໃນລະດັບດຽວກັນກັບປີ 2020 ທີ່ຂະແໜງທ່ອງທ່ຽວໂລກສູນເສຍລາຍໄດ້ໄປ 2 ພັນຕື້ໂດລາສະຫະລັດ.
ລາຍງານລະບຸວ່າ ເຖິງແມ່ນວ່າ ສະຖານະການການແຜ່ລະບາດຄ່ອຍໆດີຂຶ້ນ ແຕ່ອັດຕາການສັກວັກຊີນຍັງບໍ່ເທົ່າທຽມ ແລະ ທົ່ວເຖິງ ບວກກັບການລະບາດຂອງສາຍພັນເດວຕ້າ ແລະ ໂອໄມຄຣອນ ຈະສົ່ງຜົນກະທົບຕໍ່ການຟື້ນຕົວຂອງການທ່ອງທ່ຽວ.
ທ່ານ ຊູແຣັບ ໂປໂລລີຄາຊວີລີ ຜູ້ອຳນວຍການອົງການທ່ອງທ່ຽວໂລກລະບຸວ່າ: ເມື່ອບໍ່ດົນມານີ້ ຫຼາຍປະເທດໄດ້ກັບມາລັອກດາວ ພ້ອມນຳໃຊ້ມາດຕະການຈຳກັດການເດີນທາງລະຫວ່າງປະເທດ ສະແດງໃຫ້ເຫັນວ່າ ຍັງບໍ່ສາມາດຄາດເດົາສະຖານະການໄດ້ ແຕ່ກໍຫວັງວ່າ ປີ 2022 ຈະດີຂຶ້ນກວ່າປີນີ້. ພ້ອມທັງຮຽກຮ້ອງໃຫ້ປະເທດຕ່າງໆປະສານງານກັນເລື່ອງລະບຽບການ ແລະ ມາດຕະການຕ່າງໆໃຫ້ດີ ເພາະນັກທ່ອງທ່ຽວຕ່າງກໍສັບສົນ ແລະ ບໍ່ຮູ້ວ່າ ຈະເດີນທາງທ່ອງທ່ຽວແນວໃດ ທ່າມກາງສະຖານະການແບບນີ້.
