ໃນວັນທີ 21 ກັນຍາ ປີນີ້, ທ່ານ ພົງສະຫວັນ ສິດທະວົງ ເຈົ້າແຂວງ ໄຊຍະບູລີ ພ້ອມຄະນະ ໄດ້ລົງຢ້ຽມຢາມ ແລະ ໂອ້ລົມ ປະຊາຊົນ ບ້ານ ຜາລຽບ ເມືອງ ປາກລາຍ, ໃຫ້ການຕ້ອນຮັບມີ ທ່ານ ກອງສີ ວົງສີ ເຈົ້າເມືອງ ປາກລາຍ, ມີອໍານາດການປົກຄອງບ້ານ ແລະ ປະຊາຊົນພາຍໃນບ້ານ ຜາລຽບ ໃຫ້ການຕ້ອນຮັບຢ່າງອົບອຸ່ນ.
ກ່ອນອື່ນທ່ານເຈົ້າແຂວງແມ່ນໄດ້ຮັບຟັງການລາຍງານສະພາບການພັດທະນາຂອງບ້ານຈາກທ່ານນາຍບ້ານ. ບ້ານຜາລຽບ ເປັນບ້ານທີ່ຕັ້ງຢູ່ລຽບແຄມນໍ້າຂອງ ຫ່າງຈາກເທດສະບານເມືອງ 70 ກວ່າກິໂລແມັດ, ມີ 146 ຄອບຄົວ, ມີ 12 ໜ່ວຍຜະລິດ, ມີພົນລະເມືອງ 781 ຄົນ, ຍິງ 340 ຄົນ, ອາຊີບຂອງປະຊາຊົນສ່ວນໃຫຍ່ແມ່ນປູກຝັງ, ລ້ຽງສັດ, ຫາປາ ແລະ ຄ້າຂາຍຈໍານວນໜຶ່ງ. ສໍາລັບການຜະລິດລະດູປີ-ປີນີ້ມີທັງໝົດ 1.000 ກວ່າເຮັກຕາ, ໃນນີ້ ເນື້ອທີ່ປູກເຂົ້າ 80 ກວ່າເຮັກຕາ, ການປູກພືດອຸດສາຫະກໍາເປັນສິນຄ້າ 125 ເຮັກຕາ. ພືດທີ່ປະຊາຊົນປູກແມ່ນ: ມັນຕົ້ນ, ໝາກເດືອຍ, ໝາກງາ, ຍາງພະລາ ແລະ ອື່ນໆ, ສ່ວນວຽງານປ້ອງກັນ, ຄວບຄຸມ ແລະ ແກ້ໄຂການແຜ່ລະບາດຂອງພະຍາດໂຄວິດ-19 ແມ່ນໄດ້ເອົາໃຈໃສ່ຢ່າງເຂັ້ມງວດຕໍ່ການຈັດຕັ້ງປະຕິບັດບັນດາມາດຕະການທີ່ຂັ້ນເທິງວາງອອກ, ໂດຍສະເພາະແມ່ນຕິດຕາມການເຂົ້າ-ອອກຂອງປະຊາຊົນພາຍໃນບ້ານ ແລະ ປະຊາຊົນທີ່ມາແຕ່ເຂດອື່ນຢ່າງເຄັ່ງຂັດ.
ໂອກາດດັ່ງກ່າວ ທ່ານ ພົງສະຫວັນ ສິດທະວົງ ກໍ່ໄດ້ໃຫ້ກຽດໂອ້ລົມ ເຊິ່ງກ່ອນອື່ນທ່ານໄດ້ຖາມຂ່າວຄາວ, ສຸກທຸກຂອງປະຊາຊົນ, ພ້ອມທັງໄດ້ທາບທາມປະຊາຊົນເລື່ອງການຍົກຍ້າຍບ້ານ ຜາລຽບຈາກທີ່ເດີມໄປຕັ້ງຢູ່ບ່ອນໃໝ່, ເພາະບ້ານເດີມເປັນເຂດທີ່ຖືກໂຄງການກໍ່ສ້າງເຂື່ອນໄຟຟ້າພະລັງງານນໍ້າ-ນໍ້າຂອງ, ຈາກນັ້ນກໍ່ໄດ້ເນັ້ນໜັກໃຫ້ອໍານາດການປົກຄອງ ບ້ານໃຫ້ເອົາໃຈໃສ່ແກ້ໄຂບັນຫາປະກົດການຫຍໍ້ທໍ້ໃນບ້ານໂດຍໃຫ້ມີສ່ວນຮ່ວມຂອງໝົດທຸກຄົນເປັນຕົ້ນແມ່ນ: ການຄ້າ-ຂາຍ ແລະ ເສບຢາບ້າ, ຂີ້ລັກງັກແງະ ແລະ ອື່ນໆ, ສືບຕໍ່ຊຸກຍູ້ປະຊາຊົນໃນເກັບກູ້ພືດລະດູປີໃຫ້ທ່ວງທັນກັບລະດູການ, ເອົາໃຈໃສ່ເບິ່ງແຍງ ແລະ ບົວລະບັດຮັກສາເຂົ້ານາປີ.
ເອົາໃຈໃສ່ເຝົ້າລະວັງການລະບາດຂອງພະຍາດໂຄວິດ-19 ເປັນຕົ້ນແມ່ນຕິດຕາມ ແລະ ກວດກາ ຄົນເຂົ້າ-ອອກບ້ານເປັນປົກກະຕິ ແລະ ພ້ອມກັນສືບຕໍ່ຈັດຕັ້ງປະຕິບັດຄໍາສັ່ງຂອງຂັ້ນເທິງວາງອອກຢ່າງເຂັ້ມງວດ ແລະ ຕໍ່ເນື່ອງ, ສືບຕໍ່ສືກສາອົບຮົມການເມືອງ-ແນວຄິດໃຫ້ປະຊາຊົນ ແລະ ຄະນະບ້ານ, ສືບຕໍ່ຮັກສາຄວາມສາມັກຄີ, ເປັນແບບຢ່າງນໍາໜ້າທີ່ດີໃຫ້ກັບລູກບ້ານ, ເອົາໃຈໃສ່ສຸກເສີມລູກ-ຫຼານໃນເກນອາຍຸໃຫ້ໄດ້ເຂົ້າຮຽນ. ສ່ວນການຍົກຍ້າຍບ້ານນັ້ນໃຫ້ອໍານາດການປົກຄອງບ້ານຮ່ວມກັບທີມງານຈາກເມືອງ, ແຂວງ ແລະ ເຈົ້າຂອງໂຄງການລົງກວດກາເບິ່ງສະຖານທີ່ຈະຍົກຍ້າຍໄປຢູ່ຕົວຈິງວ່າມີຄວາມເໝາະສົມຮອບດ້ານຫຼືບໍ່, ພ້ອມທັງໃຫ້ຈິງໃຈໃນການໃຫ້ຂໍ້ມູນກັບພະນັກງານທີ່ລົງເກັບກໍາຂໍ້ມູນເບື້ອງຕົ້ນໃຫ້ລະອຽດຊັດເຈນ ເພື່ອຈະໄດ້ຢັ້ງຢືນໃນການຊົດເຊີຍຄ່າເສຍຫາຍຕ່າງ.
ຂ່າວ-ພາບ: ອຸ່ນເຮືອນ ໂພທິລັກ
