ແນ່ນອນການລົງມືເຮັດທຸລະກິດອັນໃດກໍມີອຸປະສັກທັງນີ້ ໂດຍສະເພາະໃນວົງການກີລາລາວ ກໍຍິ່ງມີຄວາມທ້າທາຍສູງຫຼາຍ ເຊັ່ນດຽວກັບ ອີໂວ້ ( EVO ) ສູນຈຳໜ່າຍເຄື່ອງກີລາ ແລະ ອຸປະກອນກີລາຂອງຄົນລາວ 100% ກ່ອນຈະຮອດມື້ນີ້ກໍຕ້ອງສູ້ກັບອຸປະສັກຫຼາຍໆຢ່າງຕະຫຼອດໄລຍະ 6 ປີທີ່ຜ່ານມາ ກ້າວຈາກຮ້ານນ້ອຍໆຈົນມາຮອດປັດຈຸບັນສາມາດເຕີບໂຕລະດັບແຖວໜ້າຂອງຜະລິດຕະພັນກີລາພາຍໃນ ສປປ ລາວ ແລະ ພ້ອມທັງຕັ້ງເປົ້າໃຫຍ່ຂະຫຍາຍໃຫ້ໄດ້ 20 ສາຂາໃນທົ່ວປະເທດກ່ອນປີ 2023.
ທ່ານ ບູ້ສະໄໝ ບຸດທະວົງ ຄະນະບໍລິຫານ ບໍລິສັດ ອີໂວ ຈຳກັດ ສູນຈຳໜ່າຍເຄື່ອງກີລາ ແລະ ອຸປະກອນກີລາ ໃຫ້ສໍາພາດຕໍ່ທີມຂ່າວເສດຖະກິດ-ການຄ້າ ໃນທ້າຍອາທິດ ທີ່ຜ່ານມາວ່າ: ກ່ອນອື່ນກໍຂໍຫວນຄືນໄປ 6 ປີກ່ອນກໍຄືປີ 2015 ອີໂວ້ ໄດ້ສ້າງຕັ້ງຂຶ້ນ ເລີ່ມຈາກເປັນຄົນທີ່ມັກກີລາບານເຕະ ເພາະພໍ່ເປັນຄົນທີ່ມັກເຕະບານ ແລະ ພາໄປນໍາ ລວມເຖິງມີໝູ່ຄູ່ທີ່ຮັກມັກບານເຕະເຊັ່ນກັນ ແລະ ໄດ້ໄປເຕະບານນໍາກັນຕະຫຼອດ ຈິ່ງເກີດຄວາມຄິດວ່າ ເປັນຫຍັງໃນບ້ານເຮົາຈິ່ງບໍ່ມີເຄື່ອງກີລາ ທີ່ມີລາຄາຈັບຕ້ອງໄດ້ ແຕ່ຄຸນນະພາບດີ ເພາະຕອນນັ້ນແມ່ນຊື້ເສື້ອທົ່ວໄປແມ່ນຂະໜາດບໍ່ກົງກັບຕົວເອງ ແລະ ຫຍຸ້ງຍາກໃນການສັ່ງຈາກຕ່າງປະເທດ ຈິ່ງຄິດວ່າເຮົາຄືບໍລອງມາເຮັດເອງ ຈາກຈຸດດັ່ງກ່າວກໍເລີຍຊັກຊວນໝູ່ຄູ່ສ້າງຮ້ານນ້ອຍລ໊ອກ 4X4 ຢູ່ແຖວບ້ານສີວິໄລ ເມືອງໄຊທານີ ນະຄອນຫຼວງວຽງຈັນ ເລີ່ມນໍາກັນ 4 ຄົນໃສ່ຊື່ວ່າຮ້ານອີໂວ້ EVO ເຊິ່ງຫຍໍ້ມາຈາກ “ Evolution ” ແປເປັນພາສາລາວແມ່ນ ວິວັດທະນາການ.
“ ແນ່ນອນການເຮັດທຸກລະກິດທຸກອັນມີຂໍ້ຫຍຸງຍາກ ໂດຍກໍລະນີຂອງພວກເຮົາຍອມຮັບວ່າເປັນຜູ້ບຸກເບີກເຄື່ອງກີລາ ເຊິ່ງກໍໄດ້ລອງຜິດລອງຖືກຈົນບາງເທື່ອກໍຖືກລູກຄ້າຕວົະ ແລະ ຕໍາໜິແດ່ ແຕ່ມັນກໍເປັນສິ່ງທີ່ເຮັດໃຫ້ພວກເຮົາພັດທະນາ ແລະ ອອກແບບຫຼາກຫຼາຍລວດລາຍທີ່ທັນສະໄໝ ຈົນບາງຄືນວຽກຫຼາຍກໍຈົນບໍ່ໄດ້ຫຼັບໄດ້ນອນ ຜ່ານໄປຫຼາຍເດືອນພວກເຮົາກໍເລີ່ມຮູ້ວ່າລູກຄ້າມັກຫຍັງ, ລາຍ, ສີ ຫຼື ຂະໜາດແບບໃດ ຈາກທີ່ພວກເຮົາເກັບຂໍ້ມູນໃນໄລຍະທີ່ຜ່ານມາ ໂດຍສະເພາະແມ່ນຄວາມສໍາຄັນຂອງຄຸນນະພາບກໍຄື ເສື້ອໂຕໜຶ່ງ ສາມາດໃຊ້ໄດ້ເປັນປີບໍ່ແມ່ນວ່າໃສ່ໄດ້ 1-2 ເທື່ອລະບໍ່ສາມາດໃຊ້ໄດ້ອີກ ໃນທີ່ສຸດກໍເລີ່ມຈາກກຸ່ມນ້ອຍໆໄດ້ຍອມຮັບ ແລະ ຫຼາຍຂຶ້ນໆ ຈົນພວກເຮົາສາມາດສ້າງເປັນຜະລິດຕະພັນເຄື່ອງກີລາຂອງຄົນລາວ ແລະ ເປີດສູນໃຫຍ່ຂອງ ອີໂວ້ ຢ່າງເປັນທາງການໃນປີ 2015 ”.
ທ່ານ ກ່າວອີກວ່າ: ນັບຕັ້ງແຕ່ມື້ນັ້ນຈົນມື້ນີ້ ອີໂວ້ ຈຸດມຸ່ງໝາຍຂອງ ອີໂວ້ ກໍຄືການຄຽງຂ້າງກີລາລາວ ແລະ ສັງຄົມ ນັ້ນກໍຄືການສ້າງຄວາມຜູກພັນລະຫວ່າງ ຄົນ ກັບ ກີລາ ພວກເຮົາສາມາດຕອບໂຈດໃຫ້ກັບລູກຄ້າ ແລະ ຍັງໄດ້ມີສ່ວນຮ່ວມສະໜັບສະໜູນກີລາລາວ ໂດຍສະເພາະແມ່ນນັກກີລາແລ່ນ-ລານທີມຊາດລາວ, ບານເຕະ, ອີສະປອດ ແລະ ອື່ນໆ ລວມເຖິງການສົ່ງທີມ ອີໂວ້ ຢູໄນເຕັດ ເຂົ້າຮ່ວມການແຂ່ງຂັນບານເຕະລາວພຣີເມຍລີກ ປີ 2019 ອີກດ້ວຍ.
ຄະນະບໍລິຫານງານຂອງ ອີໂວ້ ກ່າວເສີມອີກວ່າ: ອຸປະສັກບໍ່ມີມື້ສິນສຸດ ພວກເຮົາຕ້ອງມີແຜນ ແລະ ກົນລະຍຸດຢູ່ສະເໝີ. ດັ່ງທີ່ຕອນນີ້ ພວກເຮົາໄດ້ຮັບຜົນກະທັບຈາກ ໂຄວິດ-19 ນັບແຕ່ປີ 2020 ເປັນຕົ້ນມາ ໂດຍສະເພາະຕົ້ນປີນີ້ຍອດຂາຍຂອງພວກເຮົາແມ່ນສູນເລີຍລະ. ຢ່າງໃດກໍຕາມ ພວກເຮົາກໍມີການປັບປ່ຽນກັນຢ່າງໃຫຍ່ ຈົນສາມາດກັບມາສ້າງຍອດຂາຍໃໝ່ໄດ້. ເຊິ່ງປັດຈຸບັນ ອີໂວ້ ປັດຈຸບັນແມ່ນມີ 7 ສາຂາ ( ຕ່າງແຂວງ 4 ສາຂາ ) ເຖິງວ່າປີນີ້ຈະໄດ້ຮັບຜົນກະທົບຈາກ ໂຄວິດ, ແຕ່ພວກເຮົາຕັ້ງເປົ້າໄວ້ຂະຫຍາຍອີກ 5 ສາຂາ ແລະ ແນ່ນອນພວກເຮົາຕັ້ງເປົ້າໄວ້ 20 ສາຂາໃນທົ່ວປະເທດໃຫ້ໄດ້ກ່ອນປີ 2023 ເພື່ອຫວັງວ່າມື້ໜຶ່ງຢາກຈະເຫັນ ອີໂວ້ ກ້າວໄປສູ່ທົ່ວໂລກ ຄືກັບ ໄນກີ້ ກັບ ອະດິດາສ 2 ຜະລິດຕະພັນຍັກໃຫຍ່ດ້ານກີລາໃນໂລກປັດຈຸບັນ.
ສໍາລັບ ອີໂວ້ ຖືວ່າເຂົ້າມາມີບົດບາດສໍາຄັນຫຼາຍຕໍ່ກັບວົງການກີລາລາວ ເປັນຕົ້ນແມ່ນເຄີຍເປັນສ່ວນໜຶ່ງໃນການແຂ່ງຂັນບານເຕະໃນລາວບໍ່ວ່າ ຈະເປັນລາວລີກ ແລະ ລາຍການອື່ນໆ ໂດຍສະເພາະແມນການສະໜັບສະໜູນຫຼາຍສະໂມສອນ ແລະ ຍັງສິ່ງສະໂມສອນ ອີໂວ້ ຢູໄນເຕັດ ເຂົ້າຮ່ວມແຂ່ງຂັນລີກສູງສຸດຂອງ ສປປ ລາວ ໃນປີ 2019 ອີກດ້ວຍ ລວມເຖິງ ທີມແຂວງທີ່ກຽມເຂົ້າຮ່ວມການແຂ່ງຂັນໃນງານມະຫາກໍາກີລາ ຄັ້ງທີ 11 ທີ່ແຂວງຊຽງຂວາງ ໃນໄລຍະການຝຶກຊ້ອມທີ່ຜ່ານ ແລະ ມີແຜນຈະໃຫ້ການສະໜັບສະໜູນໃນໄລຍະແຂ່ງ ຫຼັງຈາກທີ່ເລື່ອນມາຫຼາຍຄັ້ງ. ນອກນັ້ນ, ກໍຍັງສະໜັບສະໜູນນັກແລ່ນ-ລານທີມຊາດລາວ ບໍ່ວ່າຈະເປັນ ອານຸສອນ ໄຊສາ ນັກແລ່ນທີມຊາດລາວ ລວເຖິງຄົນອື່ນ ແລະ ກີລາອື່ນໆອີກດ້ວຍ.
ຂ່າວ: ຫຼ້າ MKP; ຮູບ: ສອນໄຊ
