ຍາມປະຊາຊົນຕົກທຸກໄດ້ຍາກ ການນຳຄືກຳລັງໃຈສຳຄັນໃຫ້ພວກເຂົາລຸກຂື້ນສູ້ ຍິ່ງເປັນຜົນກະທົບຈາກໄພພິບັດມີຫຼາຍຢ່າງຕ້ອງຟື້ນຟູໃໝ່ ການຊ່ວຍເຫຼືອເປັນວັດຖຸສຳຄັນສຸດແຕ່ກຳລັງໃຈກໍ່ເປັນສິ່ງທີ່ຄວນມີໃຫ້ກັນ ແລະກັນ ເພື່ອຊຸກຍູ້ໃຫ້ມີແຮງສູ້ຕໍ່ໄປ ດັ່ງດຽວກັບທ່ານເຈົ້າແຂວງ ສາລະວັນ ພາຍຫຼັງທີ່ຮັບຂ່າວປະຊາຊົນປະສົບກັບພາຍພິບັດກໍ່ຮີບອອກຢ້ຽມຢາມພົບປະຄອບຄົວຜູ້ປະສົບໄພ ພ້ອມມອບການຊ່ວຍເຫຼືອບັນເທົາທຸກໃຫ້ຂັ້ນຕົ້ນ.
ຕອນບ່າຍວັນທີ 12 ກັນຍາ 2021 ທ່ານ ໂພໄຊ ໄຊຍະສອນ ເຈົ້າແຂວງໆສາລະວັນ ໄດ້ລົງຢ້ຽມຢາມພົບປະຄອບຄົບ ຜູ້ທີ່ຖືກລົມພະຍຸເຂດຮ້ອນ ໂກນເຊີນພັດ ທີ່ບ້ານໂພນໃຜ່ ເມືອງແລະແຂວງສາລະວັນ ໃນຕອນແລງວັນທີ 11 ກັນຍາ ເຮັດໃຫ້ ມີ 88 ຫຼັງຄາເຮືອນ ເສຍຫາຍ, ໃນນັ້ນເສຍຫາຍໜັກ 25 ຫຼັງຄາເຮືອນ, ເສຍຫາຍປານກາງ 53 ຫຼັງຄາເຮືອນ, ເສຍຫາຍເລັກນ້ອຍ 10 ຫຼັງຄາເຮືອນ, ເຮັດໃຫ້ມີ139ຄົນຂາດທີ່ຢູ່ອາໃສ, ໃນນັ້ນມີຜູ້ເສຍຊີວິດ 1 ຄົນ ເພດຍິງ ອາຍຸ 53ປີ, ມີຜູ້ບາດເຈັບສາຫັດ 2 ຄົນ ແລະບາດເຈັບເລັກນ້ອຍ 6ຄົນ.
ການລົງຢ້ຽມຢາມ ພົບປະຂອງທ່ານ ເຈົ້າແຂວງສາລະວັນຄັ້ງນີ້ ທ່ານກໍ່ໄດ້ມີຄຳເຫັນໂອ້ລົມ ສະແດງຄວາມເສົ້າສະຫຼົດໃຈມາຍັງຄອບຄົວທີ່ເສຍຊີວິດ ແລະໃຫ້ກຳລັງໃຈ ບັນດາຄອບຄົວພໍ່ແມ່ປະຊາຊົນທີ່ໄດ້ຮັບຜົນກະທົບ ດ້ວຍຄວາມເປັນຫ່ວງເປັນໃຍ, ໃຫ້ມີແນວຄິດອຸ່ນອຽງທຸນທ່ຽງ, ເຕົ້າໂຮມຄວາມສາມັກຄີກັນ ຜ່ານຜາອຸປະສັກ ອັນແສນສາຫັດນີ້ໄປດ້ວຍກັນ. ຈາກນັ້ນທ່ານຍັງໄດ້ຖາມເຖິງແນວຄິດຈິດໃຈ ແລະຄວາມຕ້ອງການອັນຈຳເປັນ ໃນເບື້ອງຕົ້ນຂອງພໍ່ແມ່ປະຊົນຕື່ມອີກ.
ໂອກາດດຽວກັນນັ້ນທ່ານເຈົ້າແຂວງສາລະວັນ ກໍ່ມອບເງິນສົດ ໃຫ້ແກ່ຄອບຄົວ ຜູ້ທີ່ເສຍຊີວິດ 1 ຄອບຄົວ ຈຳນວນ 2 ລ້ານກີບ, ມອບໃຫ້ກັບບຸກຄົນ ທີ່ໄດ້ຮັບບາດເຈັບ ຈຳນວນ 8 ຄົນ ຜູ້ລະ 1 ລ້ານກີບ, ຈາກນັ້ນຍັງໄດ້ມອບເຄື່ອງຊ່ວຍເຫຼືອໃຫ້ເປັນສ່ວນລວມ ເປັນປະເພດ ຊຸດບ່ອນນອນ ຈຳນວນ 20 ຊຸດ ແລະເງິນສົດຈຳນວນ 12,8 ລ້ານກີບ ເຊິ່ງມີຄ່າລວມ 15,2 ລ້ານກີບ ຮັບໂດຍທ່ານ ຈັນສີລອນ ສີສົມບູນ ເຈົ້າເມືຶອງໆສາລະວັນ ມີພາກສ່ວນທີ່ກ່ຽວຂ້ອງເຂົ້າຮ່ວມ.
