ໃນວັນທີ 11ກັນຍານີ້ ເມືອງຫ້ວຍຊາຍ ໄດ້ສ້າງຂະບວນການ ອອກແຮງງານລວມ ວັນເສົາແດງ ເພື່ອກະກຽມສະຖານທີ່ກັກກັນແຮງງານທີ່ມາຈາກບ່ອນອື່ນ ເຊິ່ງກຳນົດເອົາສາງພາສີເກົ່າ ບ້ານຂ້ອນແກ້ວ ເມືອງຫ້ວຍຊາຍ ແຂວງບໍ່ແກ້ວ ເປັນສູນຈຳກັດບໍລິເວນ.
ການອອກແຮງງານຄັ້ງນີ້ ໄດ້ພ້ອມກັນອະນາໄມ ປັດກວາດ,ເກັບມ້ຽນສິ່ງຫົກເຫື້ອ ໃຫ້ສະອາດງາມຕາ ພ້ອມທັງນຳເອົາຕຽງນອນ ມາຕັ້ງກຽມໄວ້ ເຊິ່ງມີຕຽງ ທັງໜົດ 80 ກວ່າຕຽງ ເພື່ອຮອງຮັບແຮງງານລາວທີ່ກັບຈາກພາຍໃນ ແລະ ຕ່າງປະເທດ.
ອີກດ້ານໜຶ່ງແມ່ນຈະຍ້າຍແຮງງານທີ່ກັກກັນຢູ່ສູນໂຮງຮຽນປະຖົມ ແລະ ມັດທະຍົມປາກຮາວເໜືອ ເນື່ອງຈາກຈຸດດັ່ງກ່າວເປັນສະຖານທີໂຮງຮຽນ. ພ້ອມທັງ ລະບາຍແຮງງານຈາກສູນມົກກະຈອກ ເພື່ອຫຼີກລ່ຽງຄວາມແອອັດ.
ໂດຍການນຳພາຂອງ ທ່ານ ຄຳແດງ ແພງໄສ ຄະນະປະຈຳພັກເມືອງ ຫົວໜ້າຄະນະຈັດຕັ້ງເມືອງຫ້ວຍຊາຍ ພ້ອມດ້ວຍ ບັນດາທ່ານ ຫົວໜ້າຫ້ອງການ, ສອງກອງບັນຊາການ ປກຊ- ປກສ ຕະຫຼອດຮອດພະນັກງານອ້ອມຂ້າງເມືອງ ເຂົ້າຮ່ວມຢ່າງເປັນຂະບວນ.
ພາບ: ຫ້ອງວ່ການເມືອງຫ້ວຍຊາຍ, ຂ່າວ: ຄຳພັນ ແກ້ວມະນີ
