ພິທີເປີດນຳໃຊ້ສະຖານີໂດຍສານຂົນສົ່ງ ວີເອັນແອວ (VNL) ຫຼັງໃໝ່ ຂຶ້ນໃນວັນທີ 19 ສິງຫາຜ່ານມາ ທີ່ຕະຫຼາດປາກຊັນ ເທດສະບານແຂວ ບໍລິຄຳໄຊ ເປັນກຽດເຂົ້າຮ່ວມພິທີຂອງ ທ່ານ ກອງແກ້ວ ໄຊສົງຄາມ ເຈົ້າແຂວງບໍລິຄຳໄຊ ປະທານຄະນະກຳມະການຄຸ້ມຄອງການລົງທຶນຂັ້ນແຂວງ, ມີການນຳຂັ້ນ ແຂວງ, ຜູ້ພັດທະນາໂຄງການ ແລະ ແຂກຖືກເຊີນຈາກພາກສ່ວນຕ່າງໆເຂົ້າຮ່ວມ.
ທ່ານ ຈ່ຽນ ວັນນະເລີດ ປະທານ ບໍລິສັດ ວີເອັນແອວ ຈຳກັດຜູ້ດຽວໃນນາມຜູ້ພັດທະນາໂຄງການຕະຫຼາດປາກຊັນ ໄດ້ລາຍງານໃຫ້ຮູ້ວ່າ: ໂຄງການກໍ່ສ້າງພັດທະນາຕະຫຼາດປາກຊັນ ເລີ່ມລົງມືປະຕິບັດມາແຕ່ທ້າຍເດືອນພະຈິກ 2020 ເປັນຕົ້ນມາ ໂດຍປະຕິບັດຕາມບົດບັນທຶກສັນຍາ 2 ຝ່າຍຄື: ຝ່າຍລັດ ແລະ ຝ່າຍຜູ້ພັດທະນາໂຄງການ ການກໍ່ສ້າງມີທັງໝົດ 16 ກິດຈະກໍາ ແບ່ງເປັນ 5 ໄລຍະຄື: ໄລຍະທີ 1 ໄລຍະກໍ່ສ້າງອາຄານຕະຫຼາດສົດ, ຮົ້ວ ແລະ ຄິວລົດ, ໄລຍະທີ 2 ປຸກອາຄານຕຶກຫ້ອງແຖວ A ຈຳນວນ 25 ຫຼັງ,ໄລຍະ 3 ກໍ່ສ້າງຫ້ອງການຈຳນວນ 4 ຫ້ອງ 2 ຊັ້ນ, ກໍ່ສ້າງຫ້ອງປະຊຸມ ແລະ ສະຖານທີ່ລ້າງອັດສີດລົດ. ໄລຍະ 4 ກໍ່ສ້າງຕຶກຫ້ອງແຖວອາຄານ B ແລະ C ຈຳນວນ 12 ຫຼັງ ແລະ ໄລຍະທີ 5 ກໍ່ສ້າງຕຶກຫ້ອງແຖວ D ແລະ G ຈຳນວນ 14 ຫຼັງ ລວມມູນຄ່າການລົງທຶນທັງໝົດ 130 ຕື້ກີບ.
ສຳລັບການກໍ່ສ້າງໄລຍະທີ 1 ວຽກງານກໍ່ສ້າງອາຄານຕະຫຼາດສົດຂະໜາດ 140×46,8 ແມັດ ມີເທີບອອກຂ້າງລະ 4,5 ແມັດ; ມາຮອດປັດຈຸບັນປະຕິບັດໄດ້ 62%, ວຽກກໍ່ສ້າງສະຖານີຂົນສົ່ງລົດໂດຍສານປະຕິບັດສໍາເລັດ 100%, ວຽກງານກໍ່ສ້າງຮົ້ວຍັງບໍ່ທັນໄດ້ລົງມືຈັດຕັ້ງປະຕິບັດ.
ສັງລວມແລ້ວການກໍ່ສ້າງໜ້າວຽກທັງໝົດໃນໄລຍະທີ 1 ແມ່ນປະຕິບັດໄດ້ 63%, ສາເຫດທີ່ພາໃຫ້ການກໍ່ສ້າງບໍ່ສາມາດຈັດຕັ້ງປະຕິບັດສຳເລັດຕາມເວລາທີ່ໄດ້ກຳນົດໄວ້ນັ້ນ ແມ່ນເກີດມາຈາກຫຼາຍປັດໄຈ ເປັນຕົ້ນແມ່ນການນຳເຂົ້າວັດສະດຸກໍ່ສ້າງຈາກຕ່າງປະເທດແມ່ນພົບຄວາມຫຍຸ້ງຍາກເນື່ອງຈາກການແຜ່ລະບາດຂອງພະຍາດໂຄວິດ-19, ການກໍ່ສ້າງແມ່ນຢູ່ໃນໄລຍະລະດູຝົນ ແລະ ບັນຫາອື່ນໆ. ຈາກນັ້ນທ່ານເຈົ້າແຂວງບໍລິຄຳໄຊ, ທ່ານ ໄມຈອມ ວັນນະສານຄຳ ເຈົ້າເມືອງປາກຊັນ ຍັງໄດ້ເປັນກຽດຕັດແຖບຜ້າ ປ່ອຍປຸ່ມເປົ້າ ຮ່ວມກັບຜູ້ພັດທະນາໂຄງການ ເພື່ອເປັນການຢັ້ງຢືນເປີດນຳໃຊ້ ສະຖານີຂົນສົ່ງລົດໂດຍສານຢ່າງເປັນທາງການ.
ຂ່າວ-ພາບ: ສາຍສະໝອນ
