ແຂວງຄຳມ່ວນໄດ້ຈັດພິທີ ປະກາດຍົກຍ້າຍ ແລະ ແຕ່ງຕັ້ງ ຫົວໜ້າກອງບັນຊາການ ປກສ ແຂວງ ໃນວັນທີ 9 ກຸມພາ 2021 ໂດຍມີ ພົນໂທ ວິໄລ ຫລ້າຄໍາຟອງ ລັດຖະມົນຕີກະຊວງປ້ອງກັນຄວາມສະຫງົບ, ທ່ານ ວັນໄຊ ພອງສະຫວັນ ເຈົ້າແຂວງຄໍາມ່ວນ, ມີຄະນະພັກ, ຄະນະກອງບັນຊາການ, ຫົວໜ້າ-ຮອງຫົວໜ້າຫ້ອງການ, ພະແນກການທີ່ກ່ຽວ ຂ້ອງອ້ອມຂ້າງແຂວງ, ກອງບັນຊາການ ປກສ ເມືອງ 10 ຕົວເມືອງ ເຂົ້າຮ່ວມ.
ໃນພິທີ ພັນເອກ ຄອນສະຫວັນ ສົມພາໄຊ ຫົວໜ້າກົມຈັດຕັ້ງພະນັກງານ ກົມໃຫຍ່ການເມືອງ ກະຊວງປ້ອງກັນຄວາມສະຫງົບ ໄດ້ຂຶ້ນຜ່ານຂໍ້ຕົກລົງ ຂອງລັດຖະມົນຕີກະຊວງປ້ອງກັນຄວາມສະຫງົບ ສະບັບເລກທີ 220/ປກສ ວ່າດ້ວຍການໂຍກຍ້າຍນາຍຕໍາຫລວດ ທີ່ຂຶ້ນກັບກອງບັນຊາການ ປກສ ແຂວງຄໍາມ່ວນ ໃນນີ້ ໄດ້ຍົກຍ້າຍ ສະຫາຍ ພັນເອກ ຄໍາພອນ ສີກຸມພົນ ຈາກກອງບັນຊາການ ປກສ ແຂວງ ໄປຮັບໜ້າທີ່ໃໝ່ ຢູ່ຫ້ອງວ່າການປົກຄອງແຂວງຄໍາມ່ວນ.
ຈາກນັ້ນ ກໍໄດ້ຜ່ານຂໍ້ຕົກລົງ ຂອງລັດຖະມົນຕີກະຊວງປ້ອງກັນຄວາມສະຫງົບ ສະບັບເລກທີ 221/ປກສ ວ່າດ້ວຍການແຕ່ງຕັ້ງນາຍຕໍາຫລວດ ທີ່ຂຶ້ນກັບກອງບັນຊາການ ປກສ ແຂວງຄໍາມ່ວນ ໃນນີ້ ໄດ້ແຕ່ງຕັ້ງ ສະຫາຍ ພັນໂທ ທິບພະຈັນ ໂພໄຊ ເປັນຮັກສາການຫົວໜ້າກອງບັນຊາການ ປກສ ແຂວງ, ສ່ວນວ່າຮອງທີ່ມີຢູ່ແລ້ວແມ່ນຮັກສາໄວ້ຄືເກົ່າ.
ໂອກາດນີ້, ພົນໂທ ວິໄລ ຫລ້າຄໍາຟອງ ກໍໄດ້ສະແດງຄວາມຍ້ອງຍໍຊົມເຊີຍຕໍ່ຄະນະພັກ, ຄະນະກອງບັນຊາການ ພ້ອມດ້ວຍນາຍຕໍາຫລວດທີ່ຢູ່ພາຍໃນກຳລັງ ປກສ ແຂວງຄໍາມ່ວນ ທີ່ສາມາດເຮັດສຳເລັດໜ້າທີ່ວຽກງານໃນໄລຍະຜ່ານມາ; ພ້ອມທັງໄດ້ເນັ້ນໃຫ້ຄະນະພັກ, ຄະນະກອງບັນຊາການ ໂດຍສະເພາະ ແມ່ນສະຫາຍທີ່ໄດ້ຮັບການແຕ່ງຕັ້ງໃໝ່ ຈົ່ງເອົາໃຈໃສ່ສືບຕໍ່ຮັກສາ ແລະ ເສີມຂະຫຍາຍຄວາມສາມັກຄີກັນພາຍໃນໝູ່ຄະນະໃຫ້ແໜ້ນແຟ້ນຂຶ້ນກວ່າເກົ່າ.
ພ້ອມທັງເປັນແບບຢ່າງນຳໜ້າໃຫ້ແກ່ພະນັກງານ-ນັກຮົບພາຍໃນກຳລັງ ແລະ ສືບຕໍ່ຍົກລະດັບຄວາມຮູ້-ຄວາມສາມາດໃຫ້ແກ່ພະນັກງານ-ນັກຮົບ ຢ່າງເນື່ອງນິດລຽນຕິດເພື່ອຮັບປະກັນໃຫ້ແກ່ນາຍຕໍາຫລວດ, ມີຄວາມຊໍານິຊໍານານຕໍ່ກັບການຈັດຕັ້ງປະຕິບັດໜ້າທີ່ວຽກງານວິຊາສະເພາະຂອງຕົນ ສາມາດຕອບສະໜອງໄດ້ໜ້າທີ່ວຽກງານທີ່ຂັ້ນເທິງມອບໝາຍໃຫ້ໃນສະເພາະໜ້າ ແລະ ຍາວນານ, ຕ້ອງສ້າງຄວາມເຂັ້ມແຂງ ໃຫ້ກໍາລັງປ້ອງກັນຄວາມສະຫງົບ ເວົ້າລວມ, ເວົ້າສະເພາະໃນກຳລັງ ປກສ ແຂວງຄໍາມ່ວນ ໃຫ້ເປັນກຳລັງປອດໃສ ເຂັ້ມແຂງໜັກແໜ້ນ ແລະ ທັນສະໄໝເທື່ອລະກ້າວ.
