ລັດຖະບານຍີ່ປຸ່ນ ມອບລົດລາດຕະເວນ ໃຫ້ກະຊວງປ້ອງກັນຄວາມສະຫງົບ ສປປ ລາວ ນຳໃຊ້ໃນວຽກຕໍ່ຕ້ານການກໍ່ການຮ້າຍ - Lanxang Media SOLE CO.,LTD

ລັດຖະບານຍີ່ປຸ່ນ ມອບລົດລາດຕະເວນ ໃຫ້ກະຊວງປ້ອງກັນຄວາມສະຫງົບ ສປປ ລາວ ນຳໃຊ້ໃນວຽກຕໍ່ຕ້ານການກໍ່ການຮ້າຍ

ໃນວັນທີ 20 ມັງກອນ 2021ທີ່ກະຊວງ ປ້ອງກັນຄວາມສະຫງົບ, ທ່ານ ທາເກວະກະ ເຄໂຊ ເອກອັກຄະຣາຊະທູດຍີ່ປຸ່ນ ປະຈຳ ສປປ ລາວ ໄດ້ຕາງໜ້າລັດຖະບານຍີ່ປຸ່ນ ໄດ້ມອບລົດລາດຕະເວນ ໃຫ້ແກ່ ທ່ານ ວິໄລ ຫລ້າຄຳຟອງ ລັດຖະມົນຕີ ກະຊວງປ້ອງກັນຄວາມສະຫງົບ ພາຍໃຕ້ໂຄງການຊ່ວຍເຫລືອລ້າ ເພື່ອສົ່ງເສີມການພັດທະນາເສດຖະກິດ-ສັງຄົມ ຂອງ ຍີ່ປຸ່ນ ໃຫ້ແກ່ ສປປ ລາວ. (ໃນຂົງເຂດປ້ອງກັນຄວາມສະຫງົບ).


ທຶນຊ່ວຍເຫລືອລ້າ ຈຳນວນ 200 ລ້ານເຢນ (1.92 ລ້ານໂດລາ) ຈະຖືກນຳໃຊ້ເພື່ອຊ່ວຍເຫລືອ ລັດຖະບານລາວ ຕ້ານການກໍ່ການຮ້າຍ ແລະ ປັບປຸງອຸປະກອນດ້ານຄວາມໝັ້ນຄົງ ເພື່ອແນໃສ່ປະກອບ ສ່ວນຕໍ່ການພັດທະນາເສດຖະກິດ-ສັງຄົມຂອງ ສປປ ລາວ, ໂດຍຜ່ານການເສີມສ້າງຄວາມເຂັ້ມແຂງໃຫ້ແກ່ກຳລັງປ້ອງກັນຄວາມສະຫງົບ. ລົດລາດຕະເວນ, ລວມທັງອຸປະກອນອື່ນໆ ເຊັ່ນ: ເຄື່ອງ X-Ray ແລະ ລົດອະເນກປະສົງ, ແມ່ນໄດ້ຖືກສົ່ງມອບໃຫ້ກ່ອນ.


ທ່ານ ທາເກວະກະ ເຄໂຊ ກ່າວໃນພິທີດັ່ງກ່າວວ່າ: “ພວກເຮົາມີຄວາມຍິນດີ ທີ່ໄດ້ມອບເຄື່ອງຊ່ວຍເຫລືອຕ້ານການກໍ່ການຮ້າຍໃນວາລະຄົບຮອບ 60 ປີ ແຫ່ງການສ້າງຕັ້ງກອງກຳລັງປ້ອງກັນຄວາມສະຫງົບຂອງ ສປປ ລາວ. ຂ້າພະເຈົ້າເຊື່ອໝັ້ນວ່າ ຄວາມສະຫງົບສຸກ ແລະ ການພັດທະນາໃນສັງຄົມລາວ ຈະຊ່ວຍນຳພາພວກເຮົາໄປສູ່ສັນຕິພາບ ແລະ ຄວາມຈະເລີນຮຸ່ງເຮືອງໃນທົ່ວພາກພື້ນ.

ທີ່ມາ: Embassy of Japan in Laos ສະຖານທູດຍີ່ປຸ່ນປະຈໍາ ສປປລາວ