ທ່ານ ພົນຕີ ຄຳລຽງ ອຸທະໄກສອນ ເຈົ້າແຂວງໄຊສົມບູນ ພ້ອມດ້ວຍພະແນກການຂອງແຂວງ ໄດ້ລົງເຄື່ອນໄຫວຢ້ຽມຢາມ ແລະ ພົບປະໂອ້ລົມປະຊາຊົນ ບ້ານຊຳທອງ ເມືອງລ້ອງແຈ້ງ ໃນວັນທີ 27 ສິງຫານີ້ ທີ່ສະໂມສອນຂອງບ້ານ ໂດຍມີ ທ່ານ ອິນຕອງ ໂຄດປັນຍາ ເຈົ້າເມືອງລ້ອງແຈ້ງ ພ້ອມດ້ວຍການນຳເມືອງ ແລະ ຫ້ອງການທີ່ກ່ຽວຂ້ອງຂອງເມືອງເຂົ້າຮ່ວມ.
ໃນໂອກາດລົງເຄື່ອນໄຫວຢ້ຽມຢາມປະຊາຊົນ ບ້ານຊຳທອງ ເມືອງລ້ອງແຈ້ງ ຂອງທ່ານເຈົ້າແຂວງໄຊສົມບູນຄັ້ງນີ້ ຍັງໄດ້ຮັບຟັງການລາຍງານໂດຍຫຍໍ້ ກ່ຽວກັບສະພາບລວມຂອງບ້ານ ຈາກທ່ານນາຍບ້ານຊໍາທອງ ວ່າ: ບ້ານຊໍາທອງໄດ້ຮັບການສ້າງຕັ້ງຂຶ້ນໃນປີ 1999 ມີປະຊາກອນທັງໝົດ ຈໍານວນ 489 ຄົນ ປະກອບມີ 95 ຄອບຄົວ ແລະ 3 ເຜົ່າ ( ເຜົ່າມົ້ງ, ເຜົ່າກຶມມຸ ແລະ ເຜົ່າລາວ ) ຢູ່ຮ່ວມກັນດ້ວຍ ຄວາມສາມັກຄີ – ຮັກແພງ, ຊ່ວຍເຫຼືອເຊິ່ງກັນ ແລະ ກັນຕະຫຼອດມາ. ປະຊາຊົນໄດ້ຢຶດຖືອາຊີບປູກຝັງ – ລ້ຽງສັດເປັນອາຊີບຕົ້ນຕໍ ແລະ ຕໍ່າຫູກທໍໄໝ ປັນອາຊີບສຳຮອງ ສະພາບລວມພາຍໃນຂອງບ້ານສາມາດຮັບປະກັນໄດ້ຄວາມເປັນລະບຽບຮຽບຮ້ອຍໂດຍພື້ນຖານ.
ທ່ານ ພົນຕີ ຄຳລຽງ ອຸທະໄກສອນ ໄດ້ຮຽກຮ້ອງໃຫ້ອົງການປົກຄອງບ້ານ ແລະ ປະຊາຊົນທຸກທົ່ວໜ້າ ຈົ່ງພ້ອມກັນຫ້າວຫັນໃນການປະກອບອາຊີບ ກໍຄືການພັດທະນາເສດຖະກິດຄອບຄົວຂອງຕົນໃຫ້ມີຄວາມໝັ້ນຄົງ ແລະ ມີຢູ່ມີກິນ ໂດຍໝູນໃຊ້ພື້ນທີ່ທ່າແຮງຂອງບ້ານເຂົ້າໃນການປູກຝັງ – ລ້ຽງສັດ ເພື່ອສ້າງເງື່ອນໄຂໃຫ້ແກ່ການປັບປຸງຊີວິດການເປັນຢູ່ຂອງຕົນໃຫ້ດີຂຶ້ນ, ຫັນຈາກການຖາງປ່າແບບເລື່ອນລອຍທີ່ຜິດຕໍ່ລະບຽບກົດໝາຍຂອງບ້ານເມືອງ ແລ້ວກ້າວເຂົ້າສູ່ການຜະລິດກະສິກຳເປັນສິນຄ້າທີ່ເປັນທາງອອກອັນແນ່ນອນໃນການແກ້ໄຂຄວາມທຸກຍາກຂອງຕົນ ເພື່ອປະຕິບັດຕາມຄໍາເວົ້າທີ່ວ່າ: ເພິ່ງຕົນເອງ, ກຸ້ມຕົນເອງ ແລະ ສ້າງ ຄວາມເຂັ້ມແຂງດ້ວຍຕົນເອງເທື່ອລະກ້າວ.
