ໃຊ້ຊີວິດປົກກະຕິແບບໃໝ່ທີ່ປອດໄພ ວິທີຊ່ວຍໃຫ້ພໍ່ແມ່ປະຊາຊົນປອດໄພຈາກ ໂຄວິດ-19 - Laoedaily

ໃຊ້ຊີວິດປົກກະຕິແບບໃໝ່ທີ່ປອດໄພ ວິທີຊ່ວຍໃຫ້ພໍ່ແມ່ປະຊາຊົນປອດໄພຈາກ ໂຄວິດ-19

ເພື່ອປ້ອງກັນບໍ່ໃຫ້ການແຜ່ລະບາດຂອງເຊື້ອພະຍາດໂຄວິດ-19 ຢູ່ປະເທດລາວເຮົາ ແລະ ບັນດາປະເທດໃນທົ່ວໂລກ ກັບຄືນມາລະບາດເປັນຮອບທີ 2 ພວກເຮົາຄວນຫັນປ່ຽນວິທີການດຳລົງຊີວິດໃໝ່ ເຊິ່ງອົງການອະນາໄມໂລກ ກໍ່ໄດ້ແນະນຳວິທີທີ່ຈະຊ່ວຍພໍ່ແມ່ປະຊາຊົນເອງມີຄວາມປອດໄພຈາກໂຄວິດ-19 ໂດຍພາຍໃຕ້ຄຳວ່າ:new normal “ໃຊ້ຊີວິດປົກກະຕິແບບໃໝ່ທີ່ປອດໄພ”.

ອົງການອະນາໄມໂລກ ຮ່ວມກັບ ສູນສື່ສານເພື່ອສຸຂະພາບ ແລະ ສຸຂະສຶກສາ ກະຊວງສາທາລະນະສຸກ ໄດ້ຮ່ວມກັນຈັດກອງປະຊຸມເພື່ອເຜີຍແຜ່ກ່ຽວກັບສະພາບການລະບາດຂອງພະຍາດໂຄວິດ-19 ແລະ ທ່າອ່ຽງຂອງພະຍາດ ດັ່ງກ່າວໃນອະນາຄົດ ຂຶ້ນໃນຕອນເຊົ້າຂອງວັນທີ 20 ພຶດສະພາ 2020 ຢູ່ທີ່ ສູນສື່ສານເພື່ອສຸຂະພາບ ແລະ ສຸຂະສຶກສາ, ກະຊວງສາທາລະນະສຸກ ໂດຍມີຊ່ຽວຊານຈາກອົງການອະນາໄມໂລກບັນລະຍາຍ, ພ້ອມນີ້ ກໍມີທ່ານ ວິສິດ ຄຳລືຊາ ຫົວໜ້າສູນສື່ສານເພື່ອສຸຂະພາບ ແລະ ສຸຂະສຶກສາ, ທ່ານ ສັງຂານ ຈູມຄຳພັນ ຮອງອຳນວຍການວິທະຍຸກະຈາຍສຽງແຫ່ງຊາດລາວ ແລະ ສື່ມວນຊົນຈາກຫຼາຍພາກສ່ວນເຂົ້າຮ່ວມ.

ເຊິ່ງຈຸດປະສົງໃນກອງປະຊຸມດັ່ງກ່າວແມ່ນເພື່ອຢາກໃຫ້ສື່ມວນຊົນຮັບຮູ້ກ່ຽວກັບສະພາບການລະບາດຂອງເຊື້ອພະຍາດໂຄວິດໃນປັດຈຸບັນ ແລະ ທິດທາງ ຫຼື ທ່າອ່ຽງໃນຕໍ່ໜ້າ ແລະ ຫາວິທີປ້ອງກັນບໍ່ໃຫ້ພະຍາດດັ່ງກ່າວນີ້ກັບມາລະບາດຮອບທີ 2 ຢູ່ປະເທດລາວເຮົາ ເຊິ່ງສື່ມວນຊົນແມ່ນມີບົດບາດຄວາມສຳຄັນຕໍ່ວຽກງານດັ່ງກ່າວນີ້.

ທ່ານ ດຣ. ນາງ ຈິດສະຫວ່າງ ຈັນທະວີສຸກ ຜູ້ຊ່ຽວຊານຈາກອົງການອະນາໄມໂລກ ປະຈຳລາວ ກໍໄດ້ມີການບັນຍາຍກ່ຽວກັບຄຳວ່າ: New Normal “ໃຊ້ຊີວິດປົກກະຕິແບບໃໝ່ທີ່ປອດໄພ”.ໃຫ້ແກ່ສື່ມວນຊົນໄດ້ເຂົ້າໃຈ ເພື່ອນຳໄປເຜີຍແຜ່ໃຫ້ແກ່ພໍ່ແມ່ປະຊາຊົນໄດ້ຮັບຮູ້ ແລະ ເຂົ້າໃຈຢ່າງທົ່ວເຖິງ ແລະ ພ້ອມກັນປະຕິບັດຕາມຫຼັກການດັ່ງນີ້: 1. ເຮັດວຽກຢູ່ເຮືອນ ຫຼື ຮັກສາໄລຍະຫ່າງ 1 ແມັດ ໃນຫ້ອງການ; 2. ຖ້າມີອາການໄຂ້ ຫຼື ໄອ ໃຫ້ເຮັດວຽກຢູ່ເຮືອນ.

ເຖິງວ່າລັດຖະບານຈະມີການຜ່ອນຜັນມາດຕະການຕ່າງໆຈຳນວນໜຶ່ງແລ້ວກໍ່ຕາມແຕ່ ພໍ່ແມ່ປະຊາຊົນກໍ່ຄວນມີສະຕິໃນການປ້ອງກັນຕົນເອງຕະຫຼອດ ໂດຍສະເພາະໝັ່ນລ້າງມື, ຮັກສາໄລຍະຫ່າງ, ຫ້າມຈັບປາກດັງ ແລະ ຕາ ພ້ອມກັນນີ້ຜູ້ເຂົ້າຮ່ວມຈາກພາກສ່ວນຕ່າງໆ ກໍ່ໄດ້ມີການແລກປ່ຽນຄວາມຄິດເຫັນ ເພື່ອຫາວິທີແກ້ໄຂ ແລະ ຊ່ວຍໃຫ້ປະຊາຊົນເຂົ້າໃຈວ່າບໍ່ຄວນໃຊ້ຊີວິດ ປະໝາດແບບເກົ່າ ທີ່ມີຄວາມສ່ຽງໃນການຕິດເຊື້ອ ທັງນີ້ກໍ່ເພື່ອປ້ອງກັນບໍ່ໃຫ້ເຊື້ອພະຍາດໂຄວິດກັບມາລະບາດໃນຮອບ 2 ທີ່ອາດຈະໜັກກວ່າເກົ່າ.

ເວັບໄຊທ໌ ລັດຖະບານ
ເວັບໄຊທ໌ແນະນຳ
ເພຈ໌ແນະນຳ