ປົ່ນປາທູ ຫຼື ແຈ່ວປາທູ ປະເພດໃສ່ໝາກເຜັດ, ຫອມບົ່ວແດງ, ກຽມທຽມ ຕຳເຂົ້າກັນແບບຫຍາບໆ ແລ້ວໃສ່ນ້ຳປາແດກເພື່ອຊ່ວຍຊູລົດຊາດໃຫ້ແຊບຂຶ້ນ ເປັນອີກໜຶ່ງເມນູທີ່ເຮັດກິນງ່າຍໆ ລາຄາບໍ່ແພງກໍ່ໄດ້ປົ່ນປາຖ້ວຍໃຫ່ຍມາໄວ້ກິນກັບເຂົ້າໜຽວ ຜັກສົດ ຜັກໜຶ້ງ.
ສ່ວນປະກອບ.
ປາທູ 4 ໂຕ.
ໝາກເຂືອ 8 ໜ່ວຍ.
ໝາກເຜັດ 5 ໜ່ວຍ.
ນ້ຳຕານ 1 ບ່ວງກາເຟ.
ນ້ຳປາແດກດິບ 3-5 ບ່ວງແກງ.
ຫົວກະທຽມ 3 ຫົວ.
ຫົວຜັກບົ່ວແດງ 5 ຫົວ.
ຜັກຫອມປ້ອມ 2 ຕົ້ນ.
ຫົວຜັກບົ່ວໃບ 2 ຕົ້ນ.
ນ້ຳສະອາດ 1 ຖ້ວຍ.
ວິທີປຸງແຕ່ງ.
1 ທຳອິດແມ່ນປີ້ງປາທູ, ຫົວກະທຽມ, ໝາກເຜັດ, ຫົວຜັກບົ່ວແດງໃຫ້ສຸກດີ, ແລ້ວເອົາປາທູມາໄຈ້ກ້າງອອກໃຊ້ແຕ່ເນື້ອກຽມໄວ້. ຈາກນັ້ນ, ກໍ່ເອົານ້ຳໃສ່ໝໍ້ຄ້າງໄຟປານກາງ ເມື່ອນ້ຳຟົດກໍ່ເອົາໝາກເຂືອ ແລະ ນ້ຳປາແດກລົງຕົ້ມຈົນໝາກເຂືອສຸກດີ ແລ້ວຕັກໝາກເຂືອໃສ່ຖ້ວຍໄວ້.
2 ຫຼັງຈາກນັ້ນ, ກໍ່ເອົາຫົວກະທຽມ, ໝາກເຜັດ, ຫົວຜັກບົ່ວແດງ ແລະ ນ້ຳຕານໃສ່ໂຄກຕຳໃຫ້ລະອຽດ ແລ້ວຈຶ່ງໃສ່ໝາກເຂືອ, ເນື້ອປາທູລົງໄປຕຳຕໍ່ໄປ. ເມື່ອຕຳລະອຽດດີແລ້ວກໍ່ເອົານ້ຳປາແດກທີ່ຕົ້ມພ້ອມກັບໝາກເຂືອປະສົມລົງໄປ (ຕາມໃຈມັກວ່າຈະໃສ່ນ້ຳຫຼາຍ ຫຼື ໜ້ອຍ) ຄົນໃຫ້ເຂົ້າກັນຊີມລົດຊາດຕາມໃຈມັກ. ຕັກໃສ່ຖ້ວຍໂຮຍໜ້າດ້ວຍຫອມບົ່ວໃບ ແລະ ຫອມປ້ອມເສິບພ້ອມກັບຜັກສົດ ຫຼື ຜັກລວກກໍ່ໄດ້.
ປາທູແມ່ນມີໂອເມກ້າ 3 ປະມານ 2-3 ກຣາມ ໃນ 1 ຂີດ ເຊິ່ງເປັນປະລິມານທີ່ພຽງພໍຕໍ່ຮ່າງກາຍທີ່ຈະໄດ້ຮັບໃນແຕ່ລະມື້ ແລະ ຄວາມເຊື່ອທີ່ວ່າເມື່ອກິນປາແລ້ວຈະສະຫຼາດນັ້ນຖືວ່າເປັນເລື່ອງຈິງ. ເພາະການກິນປາທີ່ມີໂອເມກ້າ 3 ສຳລັບເດັກແມ່ນຈະຊ່ວຍເສີມສ້າງການຈະເລີນເຕີບໂຕ ແລະ ຊ່ວຍບຳລຸງສະໝອງໃຫ້ແຂງແຮງ. ລວມທັງຜູ້ເຖົ້າທີ່ຮ່າງກາຍເລີ່ມເສື່ອມໄປຕາມການເວລາ ເພາະສາມາດເຂົ້າໄປຊ່ວຍປັບສົມດຸນ ແລະ ເຮັດໃຫ້ຮ່າງກາຍແຂງແຮງນຳ.
