ອີງຕາມຂໍ້ມູນຂະແໜງການທ່ອງທ່ຽວ ສຳລັບປີ 2019 ຂອງໂຄງການພັດທະນາລຸກຊໍາບວກ ໃຫ້ຮູ້ວ່າ: ພາບລວມນັກທ່ອງທ່ຽວເຂົ້າມາທ່ຽວລາວ ນັບມື້ເພີ່ມຂຶ້ນຫາກທຽບໃສ່ຫຼາຍປີກ່ອນ ໂດຍພາຍໃນປີ 2018 ມີນັກທ່ອງທ່ຽວຕ່າງປະເທດເຂົ້າມາຢ້ຽມຢາມປະເທດລາວສູງເຖິງ 4,2 ລ້ານຄົນ ເພີ່ມຂຶ້ນ 8,2% ຈາກປີ 2017.
ໃນນັ້ນ, ປະມານ 3,6 ລ້ານຄົນ ຫຼື 86% ຂອງຈໍານວນນັກທ່ອງທ່ຽວທັງໝົດແມ່ນມາຈາກບັນດາປະເທດເພື່ອນບ້ານ ເຊັ່ນ: ໄທ, ຫວຽດນາມ, ຈີນ, ກຳປູເຈຍ ແລະ ມຽນມາ. ໃນນັ້ນ, ນັກທ່ອງທ່ຽວຈີນ ທີ່ມາຢ້ຽມຢາມລາວ ປະມານ 805.000 ຄົນ ເພີ່ມຂຶ້ນ 26% ທຽບໃສ່ປີ 2017 ຫຼື ເທົ່າກັບ 19% ຂອງຈຳນວນນັກທ່ອງທ່ຽວທັງໝົດ.
ສຳລັບປີທ່ອງທ່ຽວ ລາວ – ຈີນ 2019 ໃນໄລຍະ 9 ເດືອນຜ່ານມາເຫັນວ່າມີນັກທ່ອງທ່ຽວຕ່າງປະເທດເຂົ້າມາລາວ 3,4 ລ້ານຄົນ ເພີ່ມຂຶ້ນ 11% ທຽບໃສ່ປີຜ່ານມາ. ໃນນັ້ນ, ນັກທ່ອງທ່ຽວ 799.929 ຄົນ ຫຼື ເພີ່ມຂຶ້ນ 26,34% ທຽບໃສ່ 9 ເດືອນປີ 2018 ທີ່ມີປະມານ 599.103 ຄົນ.
ອີງຕາມອັດຕາການເຕີບໂຕຂອງນັກທ່ອງທ່ຽວ ໃນໄລຍະ 2 ປີຜ່ານມາ ສາມາດເຫັນໄດ້ວ່ານັກທ່ອງທ່ຽວຈີນ ໃຫ້ຄວາມສົນໃຈມາຢາມລາວນັບມື້ເພີ່ມຂຶ້ນ ແລະ ຄາດວ່າໝົດປີ 2019 ນັກທ່ອງທ່ຽວຈີນ ຈະບັນລຸ 1 ລ້ານຄົນ ຫຼື ເພີ່ມຂຶ້ນ 24,22%.
ນອກນັ້ນ, ຍັງຄາດຄະເນວ່າໃນປີ 2020 ຈະມີນັກທ່ອງທ່ຽວເຂົ້າມາລາວ ປະມານ 4,7 ລ້ານຄົນ ຈະສາມາດສ້າງລາຍຮັບໄດ້ເຖິງ 905 ລ້ານໂດລາສະຫະລັດ ແລະ ໃນປີ 2025 ຈຳນວນນັກທ່ອງທ່ຽວຈະເພີ່ມຂຶ້ນເຖິງ 5,5 ລ້ານຄົນ ສ້າງລາຍຮັບ 1,15 ຕື້ໂດລາສະຫະລັດ.
