ລາວເຮົາເອງ ກໍມີແຫຼ່ງທ່ອງທ່ຽວຫຼາຍແຫ່ງ ຈະເປັນທາງທໍາມະຊາດ, ວັດທະນະທໍາ ທີ່ຕິດພັນກັບການດໍາລົງຊີວິດຮີດຄອງປະເພນີ ແລະ ອື່ນໆທັງເກົ່າ ແລະ ໃໝ່ທີ່ໄດ້ຮັບການພັດທະນາປັບປຸງໃຫ້ເຂົ້າກັບຍຸກສະໄໝ ຫຼື ຈະເປັນການອານຸລັກຮັກສາໄວ້ແບບເກົ່າເພື່ອໃຫ້ຄົນລຸ້ນຫຼັງໄດ້ສືບຕໍ່ໄປ ແຕ່ຖ້າຈະວ່າໄປແລ້ວຫຼາຍໆຄົນກໍມັກໄປທ່ຽວໄກໆ, ທັງໆທີ່ພາຍໃນນະຄອນຫຼວງເຮົາເອງກໍ່ມີສະຖານທີ່ທ່ອງທ່ຽວ ພັກຜ່ອນທີ່ສວຍງາມ ແລະ ໜ້າສົນໃຈຢູ່ຫຼາຍແຫຼ່ງ ໂດຍສະເພາະທີ່ເມືອງໄຊຖານີ.
*
*
*
ເພື່ອເປັນການນຳພາຂະບວນສູ່ແຫຼ່ງທ່ອງທ່ຽວ ແລະເຮັດໃຫ້ປະຊາຊົນຮູ້ຈັກບ່ອນທ່ຽວພາຍໃນຫຼາຍຂຶ້ນ ພະແນກຖະແຫຼງຂ່າວ ວັດທະນະທຳ ແລະ ທ່ອງທ່ຽວ ນະຄອນຫຼວງວຽງຈັນ ໄດ້ສົມທົບກັບອົງການປົກຄອງເມືອງໄຊທານີ ນະຄອນຫຼວງວຽງຈັນ ຈັດຄາຣາວານລົດທ່ອງທ່ຽວ ສູ່ແຫຼ່ງທ່ອງທ່ຽວທາງທຳມະຊາດ ນ້ຳຕົກຕາດພູເຂົາຄວາຍ ກຸ່ມບ້ານຊ້າງ ເມືອງໄຊທານີ ເປັນປີທີ 4 ໃນວັນທີ 23 ສິງຫາ 2019 ຜ່ານມາ.
*
*
*
ນໍາພາໂດຍ ທ່ານ ຄໍາປະດິດ ເຂັມມານິດ ເຈົ້າເມືອງໆ ໄຊທານີ ແລະ ທ່ານ ນາງ ວິໄລວອນ ຈັນທະລາຕີ ຫົວໜ້າພະແນກຖະແຫຼງຂ່າວວັດທະນະທໍາ ແລະ ທ່ອງທ່ຽວ ນະຄອນຫຼວງວຽງຈັນ ພ້ອມດ້ວຍຄະນະປະທານ, ພາກສ່ວນທີ່ກ່ຽວຂ້ອງ ແລະ ສື່ມວນຊົນເຂົ້າຮ່ວມລວມພາຫະນະ 100 ຄັນ ເຂົ້າຮ່ວມເປັນຂະບວນຢ່າງເບິກບານມ່ວນຊື່ນ.
*
*
*
ລາລະວານລົດໃນຄັ້ງນີ້ເລີ່ມອອກເດີນທາງຕາມເສັ້ນທາງເລກທີ 10 ທ່າງ່ອນ ເພື່ອທ່ຽວຊົມສະຖານທີ່ຕາດຊອຍວອຍ ຮອຍຕີນພະບາດ ນ້ຳຕົກຕາດຫ້ວຍເທົາ ເມືອງໄຊທານີ ແລະ ໄດ້ໄປທ່ຽວຊົມຕາດວັງຫຼວງ ເມືອງປາກງື່ມອີກດ້ວຍ.
*
*
*
ທ່ານ ຄໍາປະດິດ ເຂັມມານິດ ເຈົ້າເມືອງໆ ໄຊທານີກ່າວວ່າ: ຄາຣາວານລົດທ່ອງທ່ຽວສູ່ແຫຼ່ງທ່ອງທ່ຽວທາງທຳມະຊາດນ້ຳຕົກຕາດພູເຂົາຄວາຍຄັ້ງນີ້ ເປັນໂຄງການໜຶ່ງທີ່ຊ່ວຍຊຸກຍູ້-ສົ່ງເສີມວຽກງານທ່ອງທ່ຽວ ເຊິ່ງແຫຼ່ງທ່ອງທ່ຽວຢູ່ ນະຄອນຫຼວງວຽງຈັນຍັງມີຫຼາຍຈຸດທີ່ໂດດເດັ່ນສວຍງາມ ແຕ່ຍັງມີຫຼາຍຄົນບໍ່ທັນຮູ້ ແລະ ບໍ່ທັນໄດ້ໄປສຳຜັດ ພະແນກ ຖວທ ນວ ຈຶ່ງໄດ້ສົມທົບກັບອົງການປົກຄອງເມືອງໄຊທານີ ຈັດກິດຈະກຳດັ່ງກ່າວຂຶ້ນເພື່ອໂຄສະນາ-ສົ່ງເສີມການທ່ອງທ່ຽວໃຫ້ປະຊາຊົນທັງພາຍໃນ ແລະ ຊາວຕ່າງແຂວງ ລວມທັງຕ່າງປະເທດໄດ້ຮັບຮູ້ສະຖານທີ່ແຫຼ່ງທ່ອງທ່ຽວທຳມະຊາດທີ່ສວຍສົດງົດງາມຂອງພູຜາປ່າໄມ້ ວັດທະນະທຳຂອງປະຊາຊົນບັນດາເຜົ່າ ທັງເປັນການລະນຶກເຖິງວັນຢຶດອຳນາດ 23 ສິງຫາ ຄົບຮອບ 44 ປີ ແລະ ເພື່ອສ້າງຂະ ບວນການຄຳນັບຮັບຕ້ອນກອງປະຊຸມໃຫຍ່ 3 ຂັ້ນຂອງເມືອງ ແລະ ພະແນກ ຖະແຫຼງຂ່າວ ວັດທະນະທໍາ ແລະ ທ່ອງທ່ຽວນະຄອນຫຼວງວຽງຈັນຕື່ມອີກ.
*
*
*
*
ທີ່ສໍາຄັນກໍເພື່ອ ຢາກໃຫ້ນັກທ່ອງທ່ຽວໄດ້ເຫັນ ສໍາຜັດ ແລະ ຮ່ວມຊຸກຍູ້ສົ່ງເສີມ ອາຫານ ເຄື່ອງປ່າຂອງດົງ ແລະ ຜະລິດຕະພັນສີໄມ້ລາຍມືຂອງປະຊາຊົນຢູ່ໃກ້ຄຽງ ທີ່ໄດ້ກະກຽມມາໄວ້ຈຳໜ່າຍ ເປັນການໄດ້ປະກອບສ່ວນ ສ້າງອາຊີບ ເພີ່ມລາຍໄດ້ໃຫ້ແກ່ປະຊາຊົນໃນເຂດທ່ອງທ່ຽວນັ້ນໆພ້ອມ.
*
*