ການເຈລະຈາການຄ້າລະຫວ່າງ ອາເມຣິກາ ກັບ ຈີນ ທີ່ນະຄອນຫຼວງວໍຊິງຕັນ ເຊິ່ງເປັນຄັ້ງທີ 11 ຢຸດຕິ ໂດຍ “ໄຮ້ຂໍ້ສະຫຼຸບ” ຫຼັງຈາກອາເມຣິກາເພິ່ມກໍາແພງພາສີຂຶ້ນຫຼາຍກວ່າ 2 ເທົ່າ ຕໍ່ສິນຄ້າທີ່ນໍາເຂົ້າຈາກຈີນ ໃນມູນຄ່າ 2 ແສນລ້ານໂດລາ (ປະມານ 1,7 ລ້ານຕື້ກີບ) ແຕ່ຢືນຢັນຈະຍັງມີການຫາລືກັນຄັ້ງຕໍ່ໄປ.
ສໍານັກຂ່າວຕ່າງປະເທດລາຍງານຈາກນະຄອນຫຼວງວໍຊິງຕັນ ປະເທດສະຫະລັດ ອາເມຣິກາ ເມື່ອວັນສຸກ ທີ 10 ພຶດສະພາ ວ່າ ສໍານັກງານຄະນະຜູ້ແທນເຂົ້າເຈລະຈາການຄ້າຂອງອາເມຣິກາ (USTR: U.S. Trade Representative) ອອກຖະແຫຼງການວ່າ ປະທານາທິບໍດີໂດນັລ ທຣໍາ ລົງນາມໃນຄໍາສັ່ງຝ່າຍບໍລິຫານໃຫ້ໜ່ວຍງານທີ່ກ່ຽວຂ້ອງ ຕັ້ງກໍາແພງພາສີ ແລະ ຂຶ້ນພາສີສິນຄ້ານໍາເຂົ້າຈາກຈີນ “ເກືອບທຸກລາຍການທີ່ເຫຼືອ” ຄິດເປັນມູນຄ່າປະມານ 300.000 ລ້ານໂດລາສະຫະລັດ ກ່ອນຂຶ້ນພາສີ (2,6 ລ້ານຕື້ກີບ) ໂດຍຄໍາສັ່ງດັ່ງກ່າວອອກມາພາຍໃນໄລຍະເວລາຍັງບໍ່ເຖິງ 24 ຊົ່ວໂມງ ຫຼັງລັດຖະບານວໍຊິງຕັນເພິ່ມກໍາແພງພາສີມູນຄ່າສິນຄ້ານຳເຂົ້າຈາກຈີນ 200.000 ລ້ານໂດລາ (ປະມານ 1,7 ລ້ານຕື້ກີບ) ຈາກເດີມ 10% ຂຶ້ນເປັນ 25% ແລະ ມີຜົນບັງຄັບໃຊ້ຕັ້ງແຕ່ວັນສຸກ ທີ 10 ພຶດສະພາຜ່ານມາ.
ສໍາລັບການເຈລະຈາ ລະຫວ່າງ ຜູ້ແທນລະດັບສູງດ້ານນະໂຍບາຍການຄ້າຂອງອາເມຣິກາ ແລະ ຈີນ ທີ່ນະຄອນຫຼວງວໍຊິງຕັນ ໃນຄັ້ງນີ້ ເປັນການພົບຫາລືກັນຄັ້ງທີ 11 ແລ້ວ ແລະ ຄັ້ງນີ້ເປັນການປະຊຸມທີ່ນະຄອນຫຼວງວໍຊິງຕັນ ເຊິງຢຸດຕິໂດຍບໍ່ມີຂໍ້ສະຫຼຸບຕາມຄວາມຄາດໝາຍຂອງທຸກຝ່າຍ ເນື່ອງຈາກການເຈລະຈາເກີດຂຶ້ນໃນໄລຍະດຽວກັນກັບທີ່ ທຣໍາ ໄດ້ມີຄຳສັ່ງຂຶ້ນພາສີຕໍ່ສິນຄ້າຂອງຈີນ ທາງດ້ານກະຊວງການຕ່າງປະເທດ ໃນນະຄອນຫຼວງປັກກິ່ງ ໄດ້ອອກຖະແຫຼງການພຽງວ່າ ມີ “ມາດຕະການຕອບໂຕ້ຢ່າງເໝາະສົມ ໃນລະດັບດຽວກັນ” ສ່ວນລາຍງານຂອງສໍານັກຂ່າວຊິນຫົວລະບຸ” ມີ 3 ປະເດັນສໍາຄັນ” ທີ່ສົ່ງຜົນໃຫ້ທັງສອງຝ່າຍຍັງບໍ່ສາມາດຕົກລົງກັນໄດ້ ຄື ການທີ່ທັງຈີນ ແລະ ອາເມຣິກາ ຕ້ອງຍົກເລີກມາດຕະການ “ກໍາແພງພາສີຊຸດໃໝ່ທັງໝົດ” ໂດຍສະເພາະຝ່າຍອາເມຣິກາເຊິ່ງຕ້ອງການໃຫ້ຈີນຍົກເລີກການຂຶ້ນພາສີຕອບໂຕ້ຕໍ່ສິນຄ້າດ້ານກະເສດ ແລະ ສິນຄ້າອຸດສາຫະກໍາຫຼາຍລາຍການ, ການເລືອກຊື້ສິນຄ້າຂອງແຕ່ລະຝ່າຍ ແລະ ເນື້ອໃນຂອງຖະແຫຼງການສະບັບສຸດທ້າຍ ທີ່ທັງສອງປະເທດຕ້ອງການໃຫ້ມີຄື “ຄວາມສົມດຸນກັນ”.
ຢ່າງໃດກໍ່ຕາມ ອາເມຣິກາ ແລະ ຈີນ ເຫັນດີຮ່ວມກັນໃນຫຼັກການໃຫ້ມີການເຈລະຈາຄັ້ງຕໍ່ໄປ ທີ່ນະຄອນຫຼວງປັກກິ່ງ ຂະນະທີ່ ທຣໍາ ທະວິດຂໍ້ຄວາມກ່ຽວກັບການພົບຫາລືທີ່ນະຄອນຫຼວງວໍຊິງຕັນລະຫວ່າງ ທ່ານຫຼິວ ເຮີ່ ຮອງນາຍົກລັດຖະມົນຕີຈີນ ແລະ ທີ່ປຶກສາດ້ານນະໂຍບາຍເສດຖະກິດ ຂອງປະທານປະເທດສີ ຈິ້ນຜິງ ກັບຄະນະຜູ້ແທນຂອງອາເມຣິການໍາໂດຍ ທ່ານໂຣເບີດ ໄລທິເຊີ ຜູ້ອໍານວຍການຂອງຢູເອັສທີອາ ແລະ ທ່ານສະຕີຟ ມະນູຊິນ ລັດຖະມົນຕີວ່າການກະຊວງການເງິນອາເມຣິກາ ວ່າ “ເປັນໄປຢ່າງສ້າງສັນ” ແລະ “ບໍ່ຮີບຮ້ອນ”.