ເມືອງທຸລະຄົມ ເປີດບຸນນະມັດສະການພະທາດມາຫລ້າ ປະຈຳປີ 2024 ຕິດພັນກັບການເປີດປີທ່ອງທ່ຽວ 2024 ຂອງເມືອງ ຢ່າງເປັນທາງການໃນທ້າຍອາທິດທີ່ຜ່ານມາ ໂດຍມີ ທ່ານ ຄຳພັນ ສິດທິດຳພາ ເຈົ້າແຂວງວຽງຈັນ, ມີບັນດາການນຳແຂວງ, ການນຳເມືອງ, ພະເຖຣານຸເຖຣະ, ອຳນາດການປົກຄອງບ້ານ, ພ້ອມດ້ວຍ ກ້ອນກຳລັງຂອງມວນຊົນທັງພາຍໃນ ແລະ ອ້ອມຂ້າງເມືອງເຂົ້າຮ່ວມ.
ທ່ານນາງ ວົງເດືອນ ວັດຕະໂສ ເຈົ້າເມືອງທຸລະຄົມ ໄດ້ໃຫ້ຮູ້ວ່າ: ບຸນນະມັດສະການພະທາດມາຫລ້າ ຂອງເມືອງທຸລະຄົມ ແມ່ນໄດ້ຈັດຂຶ້ນທຸກໆປີ ເພື່ອອະນຸລັກຮັກສາວັດທະນະທໍາຮີດຄອງປະເພນີອັນດີງາມຂອງປະຊາຊົນລາວບັນດາເຜົ່າ ທີ່ເຄີຍປະຕິບັດສືບທອດກັນມາຫລາຍເຊັ່ນຄົນ. ສໍາລັບປີນີ້ແມ່ນມີຄວາມພິເສດ ໂດຍໄດ້ຈັດຂຶ້ນຢ່າງຍິ່ງໃຫຍ່ ເປັນຮູບແບບເປີດກວ້າງ ແລະ ຕິດພັນກັບການເປີດປີທ່ອງທ່ຽວລາວ 2024 ຕາມນະໂຍບາຍຂອງລັດຖະບານວາງອອກ ເພື່ອໂຄສະນາ, ກະຕຸ້ນ, ສົ່ງເສີມ, ດຶງດູດການທ່ອງທ່ຽວ, ໃຫ້ນັກທ່ອງທ່ຽວມາທ່ອງທ່ຽວ ເມືອງທຸລະຄົມ ຫລາຍຂຶ້ນ, ກະຈາຍລາຍໄດ້ໄປສູ່ຊຸມຊົນ, ທັງເປັນການກະຕຸ້ນເສດຖະກິດ, ປະກອບສ່ວນສໍາຄັນໃຫ້ແກ່ການສ້າງຂະບວນການຂໍ່ານັບຊົມເຊີຍກອງປະຊຸມໃຫຍ່ 3 ຂັ້ນຂອງພັກ, ຍູ້ແຮງຂະບວນການຮອບດ້ານຂອງເມືອງໃຫ້ມີບັນຍາກາດຄຶກຄື້ນມ່ວນຊື່ນ.
ເມືອງທຸລະຄົມ ມີວັດທະນະທຳຮີດຄອງປະເພນີທີ່ເປັນເອກະລັກ ແລະ ມີຊື່ສຽງ ເປັນຕົ້ນ ບຸນຊ່ວງເຮືອບ້ານເກິນ, ບຸນນະມັດສະການພະທາດມາຫລ້າ, ບຸນບັ້ງໄຟ ແລະ ບຸນກິນຈຽງປີໃໝ່ຊົນເຜົ່າມົ້ງ. ພ້ອມນີ້, ຍັງມີສະຖານທີ່ທ່ອງທ່ຽວທາງທຳມະຊາດ 16 ແຫ່ງ ເຊັ່ນ: ແດນສະຫວັນນໍ້າງື່ມຣີສອດ, ຣີສອດສວນເສືອປ່າ ແລະ ຮ້ານອາຫານເສືອປ່າຣີເວີ້ໄຊ, ຮ້ານອາຫານ ສາລາແຄມງື່ມ, ຮ້ານອາຫານໄປເບິ່ງເບາະ, ສວນສັດບ້ານເກິນ, ບໍ່ເກືອບ້ານເກິນ, ທ່ອງທ່ຽວເຂື່ອນໄຟຟ້ານໍ້າມັງ 3, ຕາດຊ້າງເທວະດາ, ຕາດຫີນປາຝາ, ຕາດນໍ້າດັ້ນ, ທຳມະຊາດປ່າແປກ ພູເຂົາຄວາຍ, ຜາງອຍວັງເຮືອ, ທຳມະຊາດບ້ານພູເກົ້ານາງ, ຕາດຊາວວາ ແລະ ແຫ່ງອື່ນໆ. ສະຖານທີ່ທ່ອງທ່ຽວດ້ານວັດທະນະທໍາ 10 ແຫ່ງ ເຊັ່ນ: ວັດວຽງພະແກ້ວມົງຄຸນ-ຂຸມຄອງເຈົ້າຟ້າງຸ່ມ, ວັດພະທາດມາຫລ້າ, ວັດພະທອງສາມສີ, ຮູພະຍານາກ-ສີມເກົ່າວັດກາງຫລິ່ງຊັນ, ສິມເກົ່າວັດກາງເມືອງ, ພະເຈົ້າໃຫຍ່ອົງແສນ,ວັດນາລ້າ, ວັດພະບາດດານເພີຍ, ວັດປ່າພະບາດພູເຂົາຄວາຍ ແລະ ວັດຖ້ຳພູຂາດ-ພະຍາງູໃຫຍ່. ນອກນີ້ຍັງ, ມີທ່າແຮງສະຖານທີ່ທ່ອງທ່ຽວກະສິກຳ ເຊັ່ນ: ສວນປູກໝາກຖົ່ວລຽນ ແລະ ໝາກພ້າວນໍ້າຫອມພູຖ້ຳຄໍາ, ຟາມໝາກແຕງຫວານ ທ້າວຕົ້ນກ້າ ແລະ ຟາມນໍ້າເພັດຈະເລີນຊັບ.
ໂອກາດນີ້, ເຈົ້າເມືອງທຸລະຄົມ ຍັງເຊີນຊວນບັນດາທ່ານແຂກທັງພາຍໃນ ແລະ ຕ່າງປະເທດ ຈົ່ງສະລະເວລາອັນມີຄຸນຄ່າມາທ່ອງທ່ຽວເມືອງທຸລະຄົມ ກໍຄື ແຂວງວຽງຈັນ ພວກເຮົາຍິນດີຕ້ອນຮັບດ້ວຍຄວາມຈິງໃຈ, ມາພັກຜ່ອນຢ່ອນກາຍໃນໂຮງແຮມ, ເຮືອນພັກ-ຣີສອດທີ່ໄດ້ມາດຕະຖານ, ກິນ-ດື່ມອາຫານພື້ນບ້ານທີ່ແຊບຊ້ອຍ, ແກງໜໍ່ເຍ້ໃສ່ປາຄໍ່ໃຫຍ່, ອ່ອມໜໍ່ແຍ້, ຕົ້ມໄກ່ລາດ, ສົ້ມປາແຊບ, ອ່າງນໍ້າງື່ມ ທ່ອງທ່ຽວກະສິກຳ, ທ່ອງທ່ຽວພູຜ່າປ່າໄມ້ ຊີວະນາໆພັນຂອງທຳມະຊາດທີ່ຫາເບິ່ງຫາຊົມໄດ້ຢາກ, ທ່ອງທ່ຽວປະຫວັດສາດ, ວັດທະນະທຳ, ທ່ຽວຊົມວິຖີຊີວິດຊາວຊົນນະບົດ, ຊົນເຜົ່າ ແລ້ວເພີດເພີນມ່ວນຊື່ນກັບສິລະປະ-ວັດທະນະທໍາຟ້ອນລຳວົງລາວກ້ຽວສາວແຄມງື່ມ ຢ່າງມ່ວນອົກມ່ວນໃຈ.
