ຮ່ວມສ້າງຕັ້ງ ບໍລິສັດ ລັດລວມສູນຜະລິດ ຕະພັນສິນຄ້າກະສິກຳລາວ ແລະ ຂົນສົ່ງສາກົນ

ໃນວັນທີ 28 ມິຖຸນາ 2023 ນີ້, ທີ່ໂຮງແຮມແລນມາກ ນະຄອນຫຼວງວຽງຈັນ; ລັດຖະບານແຫ່ງ ສປປ ລາວ ໂດຍຕາງໜ້າກົມປະຕິຮູບລັດວິສາຫະກິດ ແລະ ການປະກັນໄພ ກະຊວງການເງິນ ຮ່ວມກັບ ບໍລິສັດ ຄຳແສງ ພັດທະນາກະສິກຳ ຄົບວົງຈອນ ຈຳກັດຜູ້ດຽວ; ໄດ້ຈັດພິທີລົງນາມເຊັນສັນຍາຮ່ວມຮຸ້ນສ້າງຕັ້ງບໍລິສັດ ລັດລວມສູນຜະລິດຕະພັນສິນຄ້າກະສິກຳລາວ ແລະ ຂົນສົ່ງສາກົນ.

ໂດຍການລົງເຊັນຂອງທ່ານ ປອ ສອນເພັດ ອິນທະວົງ ຫົວໜ້າກົມປະຕິຮູບລັດວິສາຫະກິດ ແລະ ການປະກັນໄພ ກະຊວງການເງິນ ແລະ ທ່ານ ຄຳແສງ ສຸດທະລີ ຜູ້ອຳນວຍການບໍລິສັດ ຄຳແສງ ພັດທະນາກະສິກຳ ຄົບວົງຈອນ ຈຳກັດຜູ້ດຽວ ແລະ ເຊັນສັນຍາເປັນພິຍານໂດຍທ່ານ ສີສະຫວາດ ຫອມດາລາ ຮອງຫົວໜ້າຫ້ອງການ ກະຊວງກະສິກຳ ແລະ ປ່າໄມ້ ແລະ ທ່ານ ຊາພິລົມ ໂພສາລາດ ຮອງຜູ້ອຳນວຍການບໍລິສັດ ຄຳແສງ ພັດທະນາກະສິກຳຄົບວົງຈອນ ຈຳກັດຜູ້ດຽວ ແລະ ເປັນເປັນກຽດເຂົ້າຮ່ວມຂອງທ່ານ ເພັດ ພົມພິພັກ ລັດຖະມົນຕີກະຊວງກິສິກຳ ແລະ ປ່າໄມ້ ແລະ ທ່ານ ບຸນປອນ ວັນນະຈິດ ຮອງລັດຖະມົນຕີກະຊວງການເງິນ; ມີຮອງຫົວໜ້າຫ້ອງການກະຊວງ, ຮອງຫົວໜ້າກົມ, ພ້ອມພາກສ່ວນທີ່ກ່ຽວຂ້ອງເຂົ້າຮ່ວມ.

ໃນການຮ່ວມຮຸ້ນກັນສ້າງຕັ້ງບໍລິສັດ ລັດລວມສູນຜະລິດຕະພັນສິນຄ້າກະສິກຳລາວ ແລະ ຂົນສົ່ງສາກົນ, ເປົ້າໝາຍເພື່ອສົ່ງເສີມໃຫ້ປະຊາຊົນໄດ້ມີໂອກາດຜະລິດກະສິກຳເປັນສິນຄ້າຫຼາຍຂຶ້ນ, ເພື່ອສົ່ງການຂາຍໃນຕະຫຼາດພາຍໃນ ແລະ ສົ່ງອອກຕ່າງປະເທດໂດຍສະເພາະແມ່ນອາໃສສິ່ງເອື້ອອຳນວຍຄວາມສະດວກທີ່ມີໃນປັດຈຸບັນໃຫ້ເປັນເງື່ອນໄຂ ແລະ ທ່າແຮງໃນການຜະລິດ ແລະ ຂົນສົ່ງຜົນຜະລິດກະສິກຳເປັນສີນຄ້າເປັນຕົ້ນ: ອາໃສເສັ້ນທາງລົດໄຟລາວ-ຈີນ, ເພື່ອສົ່ງສີນຄ້າກະສິກໍາລາວໄປຂາຍໃນຕະຫຼາດ ສປ ຈີນ ແລະ ປະເທດອື່ນໆ…ຕາມຄວາມເໝາະສົມ.

ພ້ອມດຽວກັນນີ້ຍັງຈະເປັນການສົ່ງເສີມຄວາມອາດສາມາດໃນການຜະລິດກະສິກຳພາຍໃນສປປ ລາວ, ເພື່ອຮັບໃຊ້ພາຍໃນ ແລະສົ່ງຂາຍໄປຍັງຕະຫຼາດສາກົນ ,ສິ່ງສຳຄັນແມ່ນຈະສົ່ງເສີມໃຫ້ປະຊາຊົນສາມາດປູກພືດເປັນສີນຄ້າໃຫ້ຫຼາຍຂຶ້ນສ້າງລາຍຮັບເຂົ້າຄອບຄົວ, ສ້າງວຽກເຮັດງານທຳໃຫ້ແກ່ປະຊາຊົນລາວ ໃນຂອບເຂດທົ່ວປະເທດ ແລະ ເປັນການປະຕິບັດນະໂຍບາຍການລົບລ້າງຄວາມທຸກຍາກຂອງປະຊາຊົນເທື່ອລະກ້າວ, ທັງເປັນການສ້າງລາຍຮັບເຂົ້າງົບປະມານແຫ່ງລັດນໍາອີກດ້ວຍ.

ນອກຈາກນີ້, ການສ້າງຕັ້ງບໍລິສັດ ລັດລວມສູນຜະລິດຕະພັນສິນຄ້າກະສິກຳລາວ ແລະ ຂົນສົ່ງສາກົນ, ຍັງເປັນການດຶງດູດເອົານັກລົງທຶນຈາກຕ່າງປະເທດໂດຍສະເພາະແມ່ນຈາກສປ ຈີນ ມາລົງທຶນຢູ່ ສປປ ລາວ; ສ້າງສູນ ລວມຜະລິດຕະພັນສິນຄ້າກະສິກໍາລາວ, ສ້າງເປັນລະບົບສາງຕາມມາດຕະຖານສາກົນລວມສູນຢູ່ນະຄອນຫຼວງວຽງຈັນ, ບັນດາແຂວງ ແລະ ຢູ່ບັນດາເມືອງໃນຂອບເຂດທົ່ວປະເທດ. ຄຽງຄູ່ກັນນີ້, ບໍລິສັດຍັງຮັບເກັບຊື້ຈາກຜູ້ຜະລິດກະສິກຳຂອງປະຊາຊົນນໍາອີກດ້ວຍ.