ໃນວັນທີ 19 ມີຖຸນາ 2023 ທີ່ຜ່ານມາ ທີ່ຫຼັກ16 ຖະໜົນ 13 ໃຕ້ ເມືອງ ໄຊທານີ ນະຄອນຫຼວງວຽງຈັນ ອົງການກາແດງແຫ່ງຊາດລາວໄດ້ຈັດພິທີມອບ-ຮັບສາງເກັບມ້ຽນເຄື່ອງບັນເທົາທຸກ ໂດຍການເຂົ້າຮ່ວມຂອງທ່ານ ສຈ. ດຣ. ພູທອນ ເມືອງປາກ ປະທານອົງການກາແດງແຫ່ງຊາດລາວ, ທ່ານ ເຕດ ບຸນນາກ ເລຂາທິການໃຫຍ່ ສະພາກາຊາດໄທ, ມີບັນດາພະນັກງານຈາກກະຊວງຕ່າງໆ ແລະ ບໍລິສັດຮັບເໝົາກໍ່ສ້າງເຂົ້າຮ່ວມ.
ໃນພິທີດັ່ງກ່າວໃຫ້ກຽດກ່າວມອບໂດຍທ່ານ ເຕດ ບຸນນາກ ເລຂາທິການໃຫຍ່ ສະພາກາຊາດໄທ ແລະ ກ່າວຮັບໂດຍແມ່ນທ່ານ ສຈ.ດຣ. ພູທອນ ເມືອງປາກ ປະທານອົງການກາແດງແຫ່ງຊາດລາວ. ສາງເກັບມ້ຽນເຄື່ອງດັ່ງກ່າວນີ້ ໄດ້ລົງມືກໍ່ສ້າງແຕ່ວັນທີ 13 ກັນຍາ 2022 ແລະ ໄດ້ສຳເລັດໃນເດືອນພຶດສະພາ 2023 ໃຊ້ເວລາກໍ່ສ້າງ 09 ເດືອນ, ໂດຍໂຄງສ້າງປະກອບມີ ຄວາມກວ້າງ 10 ແມັດ,ຍາວ 30 ແມັດ, ລວງສູງ 5,85 ແມັດ, ເປັນໂຄງເຫຼັກ, ຝາກໍ່ດ້ວຍດີນຈີ່, ຟື້ນເທດ້ວຍເປຕົງເສີມເຫຼັກ.
ພາຍໃນອາຄານສາງປະກອບມີ: ຫ້ອງສາງມ້ຽນເຄື່ອງ, ຫ້ອງການບັນຊີ, ຫ້ອງນໍ້າ 2 ຫ້ອງ ແລະ ທາງນອກຍັງປະກອບມີ: ທາງຍ່າງອອ້ມອາຄານ, ຂັ້ນໄດ, ຮາກຖານ, ຄານດິນ ແລະ ພື້ນ ເປັນໂຄງສ້າງເບຕົງເສີມເຫຼັກ, ເສົາດ້ວຍເຫຼັກ H-BEAM ແລະ ໂຄງຫຼັງຄາດ້ວຍເຫຼັກກ່ອງ, ກໍ່ດ້ວຍດິນຈີ່ທັນສະໄໝ 6 ຮູ, ມຸງດ້ວຍແຜ່ນຊິ້ງ VXP, ນອກນັ້ນຍັງໄດ້ບຸກເບີກຖົມດິນ, ກໍ່ສ້າງຮົ້ວອ້ອມໂຄງການ, ອາຄານຈອດລົດ. ລວມມູນຄ່າທັງໝົດ 8.346.867 ບາດ ໂດຍການສະໜັບສະໜູນສະພາກາຊາດໄທ.
ສາງດັ່ງກ່າວຈະຊ່ວຍໃຫ້ການເກັບມ້ຽນເຄື່ອງບັນເທົາທຸກອົງການກາແດງລາວ ມີຄວາມສະດວກສະບາຍຮັບປະກັນການໃນການຮັກສາເຄື່ອງໃຫ້ມີຄຸນນະພາບ ແລະ ທັງເປັນການກະກຽມເຄື່ອງແຮໄວ້ເພື່ອໃຫ້ການຊ່ວຍເຫຼືອໃນເວລາເກີດໄພພິບັດໃຫ້ທັນກັບຄວາມຕ້ອງການ.
ໂດຍ: ອົງການກາແດງແຫ່ງຊາດລາວ
