ໃນຕອນເຊົ້າຂອງວັນທີ 6 ມິຖຸນາ 2023 ນີ້ ຢູ່ທີ່ຫ້ອງການບ້ານປຸ່ງປໍ ທີ່ຂຶ້ນກັບຈຸດສຸມກະແຕບ-ນາຜາດ່າງ ຂອງເມືອງວິລະບູລີ ແຂວງສະຫວັນນະເຂດ ບໍລິສັດລ້ານຊ້າງມີເນໂຣນສ໌ ລິມິເຕັດ ໄດ້ຈັດພິທີມອບ-ຮັບສັດລ້ຽງ ໃຫ້ກັບຄອບຄົວຜູ້ດ້ອຍໂອກາດ ໃນເຂດບ້ານອ້ອມຂ້າງບໍ່ຄໍາ-ທອງເຊໂປນຂຶ້ນ ໂດຍການໃຫ້ກຽດເຂົ້າຮ່ວມຂອງທ່ານ ວາລິຍະ ສີຈັນທອງທິບ ເລຂາພັກເມືອງ ເຈົ້າເມືອງວິລະບູລີ, ທ່ານສະໝານ ອາເນກາ ຜູ້ອໍານວຍການໃຫຍ່ ບໍລິສັດລ້ານຊ້າງມີເນໂຣນ ລິມິເຕັດ, ມີທ່ານ ບຸນເນືອງ ຈັນຫອມ ຄະນະປະຈໍາພັກເມືອງ ຮອງເຈົ້າເມືອງວິລະບູລີ, ມີບັນດາທ່ານໃນຄະນະກໍາມະການຂັ້ນເມືອງ, ອໍານາດການປົກຄອງບ້ານ ແລະຕາງໜ້າຄອບຄົວຜູ້ດ້ອຍໂອກາດ ພາຍໃນບ້ານປຸ່ງປໍ ເຂົ້າຮ່ວມ.
ທ່ານ ນາມຊະນະ ໂພທິພັນ ຕາງໜ້າຄະນະຊີ້ນໍາກອງທຶນຂອງບໍລິສັດລ້ານຊ້າງ ໄດ້ໃຫ້ຮູ້ວ່າ : ກອງທຶນຊ່ວຍເຫຼືອແກ່ຜູ້ດ້ອຍໂອກາດ ແມ່ນເປັນອີກກອງທຶນໜຶ່ງ ຂອງບໍລິສັດລ້ານຊ້າງມີເນໂຣນສ໌ ລິມິເຕັດ ທີ່ໄດ້ໃຫ້ການຊ່ວຍເຫຼືອ ໃຫ້ກັບບັນດາຄອບຄົວທີ່ດ້ອຍໂອກາດ ທີ່ອາໄສຢູ່ໃນເຂດບ້ານ ອ້ອມຂ້າງບໍ່ຄໍາ-ທອງເຊໂປນ ເຊິ່ງຈຸດປະສົງຫຼັກກໍ່ແມ່ນເພື່ອເຮັດໃຫ້ຄອບຄົວເຫຼົ່ານັ້ນ ທີ່ມີຄວາມຫ້າວຫັນ, ມີແຮງງານທີ່ພຽງພໍເຂັ້ມແຂງ ແລະມີຈິດໃຈຢາກເຮັດແທ້ທໍາຈິງ ແຕ່ຂາດໂອກາດໃນການເຂົ້າເຖິງແຫຼ່ງທຶນ ໃຫ້ສາມາດມີອາຊີບທີ່ໝັ້ນຄົງໄດ້, ເຮັດໃຫ້ມີລາຍຮັບຈຸນເຈືອຄອບຄົວ ສາມາດເພິ່ງຕົນເອງກຸ້ມຕົນເອງໄດ້ ແລະກ້າວໄປສູ່ການຫຼຸດພົ້ນອອກຈາກຄວາມທຸກຍາກໄດ້ເທື່ອລະກ້າວ.
ສໍາລັບໜ້າວຽກຂອງກອງທຶນດັ່ງກ່າວ ແມ່ນປະກອບມີຫຼາຍກິດຈະກໍາຄື : ການປູກຝັງ ແລະລ້ຽງສັດເຊັ່ນວ່າ : ການລ້ຽງໄກ່ພັນໄຂ່-ການລ້ຽງໄກ່ລາດ, ການລ້ຽງກົບ, ລ້ຽງປາ, ການລ້ຽງໝູ, ການປູກເຫັດ, ການລ້ຽງແບ້ ແລະ ການລ້ຽງງົວເປັນຕົ້ນ, ນອກຈາກນີ້ ກໍ່ຍັງມີການຈັດຫາແຫຼ່ງນໍ້າລິນ, ການສ້າງເໝືອງຝາຍນ້ອຍ, ຂຸດນໍ້າສ້າງເພື່ອບໍລິໂພກ ແລະ ອຸປະໂພກ ແລະກິດຈະກໍາອື່ນໆ ຄິດເປັນມູນຄ່າຫຼາຍຮ້ອຍລ້ານກີບ ແຕ່ຈະບໍ່ໄດ້ມອບເປັນເງິນສົດໃຫ້.
ສໍາລັບກິດຈະກໍາກອງທຶນໃນປີ 2023 ນີ້ ແມ່ນໄດ້ເລັ່ງໃສ່ການຜະລິດ, ການຮັກສາສຸຂະພາບຂອງສັດລ້ຽງໃຫ້ແຂງແຮງ ແລະການຂາຍ ເພື່ອສົ່ງທຶນຄືນເຂົ້າບັນຊີຂອງກອງທຶນ ຢ່າງໜ້ອຍ 50 % ຂອງຄອບຄົວທີ່ໄດ້ຮັບການສົ່ງເສີມ, ພ້ອມນີ້ກໍ່ໄດ້ມີກິຈະກໍາສົ່ງເສີມການລ້ຽງງົວ ແລະການລ້ຽງແບ້ ເຊິ່ງການລ້ຽງງົວແມ່ນໄດ້ສົ່ງເສີມໃຫ້ 15 ຄອບຄົວ ໄດ້ຄອບຄົວລະ 3 ໂຕ ໃນຈໍານວນ 4 ບ້ານຄື : ບ້ານນໍ້າຄຶນມີ 5 ຄອບຄົວ, ບ້ານຫ້ວຍຊ້ວານ ( ຄຸ້ມລາດແດງນ້ອຍ-ລາດແດງໃຫຍ່ ) ມີ 3 ຄອບຄົວ, ບ້ານນໍ້າແລບ 2 ຄອບຄົວ ແລະ ບ້ານປຸ່ງປໍ ມີ 5 ຄອບຄົວ ລວມມີແມ່ພັນງົວທັງໝົດ 45 ໂຕ ລວມເປັນມູນຄ່າ : 425 ລ້ານກວ່າກີບ.
ສ່ວນວ່າການລ້ຽງແບ້ ແມ່ນມີຈໍານວນ 3 ຄອບຄົວ ຄື : ບ້ານແກ້ງເກິກ 2 ຄອບຄົວ ແລະບ້ານນາກະຊີນ 1 ຄອບຄົວ ມີແບ້ທັງໝົດ 40 ໂຕ ລວມເປັນມູນຄ່າ 45 ລ້ານກວ່າກີບ. ແລະໃນໂອກາດນີ້ ທ່ານເຈົ້າເມືອງວິລະບູຸລີ ກໍ່ໄດ້ໃຫ້ກຽດໂອ້ລົມ ພ້ອມທັງຮຽກຮ້ອງມາຍັງບັນດາຄອບຄົວທີ່ໄດ້ຮັບການສົ່ງເສີມໃນຄັ້ງນີ້ ຈົ່ງໄດ້ເອົາໃຈໃສ່ໃນການເບິ່ງແຍງບົວລະບັດຮັກສາ ໃຫ້ມີການເຕີບໃຫຍ່ອອກແມ່ແຜ່ລູກ ໃນຕໍ່ໜ້າ ແລ້ວແບ່ງຂາຍເພື່ອກາຍເປັນລາຍຮັບເຂົ້າສູ່ຄອບຄົວ ເຮັດສາມາດເພິ່ງຕົນເອງກຸ້ມຕົນເອງໄດ້ໃນທີ່ສຸດ.