ສຳນັກຂ່າວຊິນຫົວລາຍງານວ່າ: ລັດຖະບານກຳປູເຈຍ ໄດ້ເລີ່ມຈ່າຍເງິນໃຫ້ແກ່ປະຊາຊົນ ຈຳນວນ 360.000 ຄົວເຮືອນ ທີ່ໄດ້ຮັບຜົນກະທົບຈາກອັດຕາເງິນເຟີ້ ແລະ ຜູ້ທີ່ໄດ້ຮັບຜົນກະທົບຈາກອຸທົກກະໄພ.
ກະຊວງເສດຖະກິດ ແລະ ການເງິນຂອງກຳປູເຈຍ ອອກຖະແຫຼງການວ່າ ລັດຖະບານ ຈະໃຊ້ເງິນທັງໝົດປະມານ 31 ລ້ານໂດລາສະຫະລັດ ເພື່ອຊ່ວຍເຫຼືອຄົວເຮືອນ ທີ່ໄດ້ຮັບຜົນກະທົບຈາກການເພີ່ມຂຶ້ນຂອງລາຄາສິນຄ້າ ຫຼື ອັດຕາເງິນເຟີ້ ແລະ ຄອບຄົວທີ່ໄດ້ຮັບຜົນກະທົບຈາກໄພພິບັດ ຈຳນວນ 15 ລ້ານໂດລາ ໂດຍຈະຈ່າຍເປັນເວລາ 3 ເດືອນ, ເລີ່ມແຕ່ເດືອນທັນວາປີນີ້ ຫາ ເດືອນກຸມພາປີໜ້າ.
ທັງນີ້, ເມື່ອບໍ່ດົນມານີ້ ສົມເດັດ ຮຸນເຊັນ ນາຍົກລັດຖະມົນຕີກຳປູເຈຍ ໄດ້ລົງນາມໂດຍມອບໃຫ້ກະຊວງແຜນການຂອງກຳປູເຈຍ ເປັນຜູ້ພິຈາລະນາບັນດາຄອບຄົວທີ່ຈະໄດ້ຮັບການຊົດເຊີຍດັ່ງກ່າວ ເຊິ່ງມີປະຊາຊົນປະມານ 1,3 ລ້ານຄົນ ແລະ 360.000 ຄອບຄົວ ທີ່ຈະໄດ້ຮັບເງິນຊ່ວຍເຫຼືອຄັ້ງນີ້, ສຳລັບຄົວເຮືອນທີ່ຈະໄດ້ຮັບເງິນຊົດເຊີຍມີລາຍລະອຽດ ດັ່ງນີ້:
1). ຄົວເຮືອນທີ່ອາໄສຢູ່ນະຄອນຫຼວງພະນົມເປັນ ຈະໄດ້ຮັບເງິນ 25 ໂດລາສະຫະລັດ ແລະ ສະມາຊິກໃນຄອບຄົວຈະໄດ້ຮັບເງິນເພີ່ມອີກຄົນລະ 7 ໂດລາສະຫະລັດ.
2). ສຳລັບຄົວເຮືອນທີ່ຢູ່ຕ່າງແຂວງ ຈະໄດ້ຮັບຄົວເຮືອນລະ 22 ໂດລາ ແລະ ສະມາຊິກໃນຄອບຄົວຈະໄດ້ຮັບເພີ່ມອີກຄົນລະ 6 ໂດລາ.
3). ຄົວເຮືອນທີ່ອາໄສຢູ່ເຂດຊົນນະບົດ ຈະໄດ້ຮັບຄອບຄົວລະ 20 ໂດລາ ແລະ ສະມາຊິກໃນຄອບຄົວຈະໄດ້ຮັບເງິນເພີ່ມອີກຄົນລະ 5 ໂດລາ.
4). ຄອບຄົວທີ່ໄດ້ຮັບຜົນກະທົບຈາກອຸທົກກະໄພເມື່ອບໍ່ດົນມານີ້ ຢູ່ນະຄອນຫຼວງພະນົມເປັນ ແລະ ອີກ 15 ແຂວງ ຈະໄດ້ຮັບເງິນຊ່ວຍເຫຼືອ 20 ໂດລາຕໍ່ຄອບຄົວ ແລະ ສະມາຊິກໃນຄອບຄົວ ຈະໄດ້ຮັບອີກ 4 ໂດລາ.
