ຊີອີໂອ ເຈພີ ມໍແກນ ຮຽກຮ້ອງໃຫ້ສະຫະລັດເລັ່ງຫຼຸດການຂາດດຸນງົບປະມານ

24

ຜູ້ບໍລິຫານ ເຈພີ ມໍແກນ ຮຽກຮ້ອງໃຫ້ ລັດຖະບານສະຫະລັດອາເມຣິກາ ຫຼຸດຜ່ອນການຂາດດຸນງົບປະມານຍິ່ງໄວຍິ່ງດີ ຫຼັງຈາກຕົວເລກການຂາດດຸນ ຫຼ້າສຸດຢູ່ທີ່ 6%, ຂະນະທີ່ອັດຕາໜີ້ສິນຕໍ່ ຈີດີພີບັນລຸ 100%.

ທ່ານ ເຈມີ ໄດມອນ ຜູ້ບໍລິຫານ ເຈພີ ມໍແກນ(JPMorgan Chase) ບໍລິສັດການເງິນລາຍໃຫຍ່ຂອງສະຫະລັດອາເມຣິກາ ໃຫ້ສໍາພາດສື່ມວນຊົນສະຫະລັດ ໃນວັນທີ 15 ພຶດສະພາ ວ່າ: ລັດຖະບານສະຫະລັດອາເມຣິກາ ຄວນເລັ່ງການຫຼຸດຜ່ອນການຂາດດຸນງົບປະມານ ຍິງໄວຍິ່ງດີ ແລະ ເຕືອນວ່າບັນຫານີ້ມີທ່າອ່ຽງທີ່ຈະສ້າງຄວາມເສຍຫາຍຕື່ມອີກ ຖ້າຍັງສືບຕໍ່ຖືກເບິ່ງຂ້າມ.

ຄໍາເຫັນຂອງ ຜູ້ບໍລິຫານ ເຈພີ ມໍແກນ ມີຂຶ້ນຫຼັງຈາກຜ່ານພົ້ນໄລຍະເວລາທີ່ທະນາຄານກາງສະຫະລັດ ປັບຂຶ້ນອັດຕາດອກເບ້ຍຢ່າງວ່ອງໄວ ແລະ ລັດຖະບານ ໄດ້ປະກາດການຫຼຸດອັດຕາພາສີແລະອອກມາດຕະການກະຕຸ້ນຄັັ້ງໃຫຍ່ ເພື່ອສະໜັບສະໜູນເສດຖະກິດປະເທດໃນໄລຍະໂຄວິດ-19 ລະບາດ.

ອາເມຣິກາໃຊ້ເງິນຫຼາຍ ໃນໄລຍະໂຄວິດ-19 ແລະ ຫຼັງການລະບາດຂອງໂຄວິດ, ການຂາດດຸນງົບປະມານຂອງພວກເຮົາໃນປັດຈຸບັນຢູ່ທີ່ 6% ນັ້ນເປັນຕົວເລກທີ່ສູງຫຼາຍ ແຕ່ກໍເປັນທີ່ຈະແຈ້ງວ່າມັນຊ່ວຍ ຊຸກຍູ້ການເຕີບໂຕໄດ້ເຊັ່ນກັນ.”

ທ່ານ ເຈມີ ໄດມອນ ກ່າວຕື່ມວ່າ: ທຸກປະເທດສາມາດກູ້ຢືມເງິນມາກະຕຸ້ນການເຕີບໂຕທາງເສດຖະກິດໄດ້ໃນບາງສ່ວນ ແຕ່ກໍບໍ່ອາດນຳໄປສູ່ການເຕີບໂຕທີ່ດີສະເໝີໄປ.

ຂໍ້ມູນຈາກກະຊວງການເງິນອາເມຣິກາ ຊີ້ອອກວ່າຈົນຮອດປັດຈຸບັນ ລັດຖະບານໄດ້ໃຊ້ເງິນ 855 ຕື້ໂດລາ ຫຼາຍກວ່າທີ່ສາມາດເກັບໄດ້ໃນປີງົບປະມານ 2024 ສົ່ງຜົນໃຫ້ປະເທດຂາດດຸນງົບປະມານຢ່າງຫຼວງຫຼາຍ.

ໃນປີງົບປະມານ 2023, ການຂາດດຸນງົບປະມານຂອງລັດຖະບານສະຫະລັດ ອາເມຣິກາຫຼາຍເຖິງ 1.700 ຕື້ໂດລາ.