ສຳນັກຂ່າວຕ່າງປະເທດລາຍງານວ່າ ທະນາຄານກາງຝຣັ່ງ ໄດ້ປັບຂຶ້ນຕົວເລກການຂະຫຍາຍຕົວເສດຖະກິດຂອງຝຣັ່ງໃນປີນີ້ ຄາດວ່າ ຈະຢູ່ທີ່ 6,7% ຈາກລະດັບ 6,3% ທີ່ເຄີຍຄາດການໄວ້ໃນເດືອນກັນຍາຜ່ານມາ ເນື່ອງຈາກການລະບາດຂອງເຊື້ອໄວຣັສກາຍພັນໂອໄມຄຣອນ ຄາດວ່າ ບໍ່ໜ້າຈະສົ່ງຜົນກະທົບຕໍ່ທ່າອ່ຽງລວມຂອງເສດຖະກິດຝຣັ່ງ.
ຜູ້ວ່າການທະນາຄານກາງຝຣັ່ງເປີດເຜີຍວ່າ: ເສດຖະກິດຂອງຝຣັ່ງກຳລັງຟື້ນຕົວຢ່າງເຂັ້ມແຂງ ເຖິງແມ່ນວ່າ ຫົວໜ່ວຍທຸລະກິດໄດ້ມີຄວາມລະມັດລະວັງເພີ່ມຂຶ້ນ ແຕ່ເສດຖະກິດຝຣັ່ງໄດ້ກັບສູ່ລະດັບກ່ອນເກີດວິກິດໂຄວິດ-19 ຕັ້ງແຕ່ເດືອນກັນຍາຜ່ານມາ ແລະ ຂະນະນີ້ ໄດ້ກ້າວຜ່ານຈຸດນັ້ນໄປແລ້ວ.
ຜູ້ວ່າການທະນາຄານກາງຝຣັ່ງ ກ່າວວ່າ: ຕົວເລກການຂະຫຍາຍຕົວຂອງເສດຖະກິດ ສູງກວ່າທີ່ພວກເຮົາຄາດການໄວ້ໃນຊ່ວງ 6 ເດືອນເຄິ່ງປີນີ້ ແລະ ເປັນຕົວເລກທີ່ຂະຫຍາຍຕົວສູງສຸດໃນຮອບ 50 ປີຂອງເສດຖະກິດຝຣັ່ງ.
