ສຳນັກຂ່າວຕ່າງປະເທດລາຍງານວ່າ ບໍລິສັດ ຟາຍເຊີ (Pfizer) ຜູ້ຜະລິດຢາລາຍໃຫຍ່ຂອງສະຫະລັດອາເມຣິກາໄດ້ລົງນາມກັບລັດຖະບານສະຫະລັດອາເມຣິກາ ວ່າຈະສົ່ງມອບຢາແພັກໂລວິດ ເຊິ່ງເປັນຢາປິ່ນປົວພະຍາດໂຄວິດ-19 ຈຳນວນ 10 ລ້ານຄອສ (ຊຸດ) ໃນມູນຄ່າ 5.270 ລ້ານໂດລາສະຫະລັດ ໃຫ້ແກ່ລັດຖະບານອາເມຣິກາ ໂດຍຈະສົ່ງມອບຢາໃນທ້າຍປີນີ້.
ກ່ອນໜ້ານີ້ ຟາຍເຊີໄດ້ຍື່ນເລື່ອງຂໍອະນຸມັດນຳໃຊ້ຢາດັ່ງກ່າວໃນສະຫະລັດກັບ ສຳນັກງານອາຫານ ແລະ ຢາຂອງສະຫະລັດແລ້ວ ແຕ່ຍັງຢູ່ໃນຂັ້ນຕອນການພິຈາລະນາ, ພ້ອມລະບຸວ່າ ຈະສາມາດຜະລິດຢາດັ່ງກ່າວໄດ້ປະມານ 180.000 ຊຸດພາຍໃນທ້າຍປີນີ້ ແລະ ເພີ່ມເປັນ 20 ລ້ານຊຸດໃນປີໜ້າ.
ລັດຖະມົນຕີກະຊວງສາທາລະນະສຸກ ແລະ ບໍລິການຂອງສະຫະລັດອາເມຣິກາເປີດເຜີຍວ່າ ເມື່ອມີຢາປິ່ນປົວພະຍາດໂຄວິດ-19 ຊະນິດເມັດເຊິ່ງສາມາດຮັບປະທານ (ກິນ) ຢາເອງຢູ່ເຮືອນໄດ້ ຈະເຮັດໃຫ້ພວກເຮົາສາມາດຈຳກັດການລະບາດໄດ້ໄວຂຶ້ນ ໂດຍການມອບຢາ ແລະ ອຸປະກອນການແພດໃຫ້ປະຊາຊົນຜູ້ຕິດເຊື້ອທີ່ບໍ່ມີອາການຮຸນແຮງ ເພື່ອປິ່ນປົວເອງ.
ທັງນີ້ ການທົດລອງທາງຄລີນິກໄລຍະສຸດທ້າຍຂອງຢາແພັກໂລວິດ ພົບວ່າ ມີປະສິດທິພາບໃນການຫຼຸດຄວາມຮຸນແຮງ ແລະ ຫຼຸດອັດຕາການເສຍຊີວິດລົງໄດ້ເຖິງ 89%.