ມູນຄ່າເສດຖະກິດດິຈິຕອນອາຊຽນ ໄດ້ຮັບປັດໄຈບວກຈາກການທີ່ມີຜູ້ໃຊ້ອິນເຕີເນັດເພີ່ມຂຶ້ນໃນຊ່ວງການລະບາດຂອງພະຍາດໂຄວິດ-19 ຕະຫຼອດຮອດການເພີ່ມຂຶ້ນຂອງບໍລິສັດສະຕາດອັບ (Startup) ເພີ່ມຂຶ້ນ ສົ່ງຜົນໃຫ້ເສດຖະກິດດິຈິຕອນໃນພູມີພາກນີ້ຄາດວ່າ ຈະມີມູນຄ່າສູງເຖິງ 363 ຕື້ໂດລາສະຫະລັດໃນປີ 2025 ແລະ ມີໂອກາດຈຸ 1.000 ຕື້ໂດລາໃນປີ 2030.
ທັງນີ້ ຜົນການສຳຫຼວດຂອງ ກູເກີ້ລ ແລະ ບໍລິສັດເທມາເຊັກ ຂອງສິງກະໂປ ພົບວ່າ ໃນອາຊຽນມີຜູ້ນຳໃຊ້ອິນເຕີເນັດລາຍໃໝ່ເພີ່ມຂຶ້ນ 40 ລ້ານຄົນໃນປີນີ້ ສົ່ງຜົນໃຫ້ຍອດລວມຜູ້ທີ່ເຂົ້າເຖິງອິນເຕີເນັດໃນອາຊຽນເພີ່ມເປັນ 350 ລ້ານຄົນໃນປັດຈຸບັນ ກວມເອົາ 75% ຂອງຈຳນວນປະຊາກອນທັງໝົດ ແລະ 8 ໃນ 10 ລາຍ ເຄີຍສັ່ງຊື້ສິນຄ້າທາງອອນລາຍຢ່າງໜ້ອຍ 1 ຄັ້ງ.
ຮອງປະທານ ບໍລິສັດກູເກີ້ລ ປະຈຳພາກພື້ນອາຊີຕາເວັນອອກສຽງໃຕ້ ກ່າວວ່າ: ກ່ອນເກີດການລະບາດຂອງພະຍາດໂຄວິດ-19 ເມືອງໃຫຍ່ໃນພູມີພາກນີ້ ເປັນພື້ນທີ່ທີ່ມີການເຂົ້າເຖິງອິນເຕີເນັດສູງທີ່ສຸດ ແຕ່ຫຼັງຈາກການລະບາດ, ຜູ້ໃຊ້ອິນເຕີເນັດຢູ່ນອກເມືອງໃຫຍ່ ແລະ ເຂດຊົນນະບົດເພີ່ມຂຶ້ນຢ່າງຕໍ່ເນື່ອງ ຈົນກາຍເປັນກຸ່ມໃຫຍ່ໃນປີ 2020 ແລະ ເພີ່ມຂຶ້ນຕໍ່ເນື່ອງໃນຂະນະນີ້ ໂດຍເລີ່ມແນມບໍ່ເຫັນຄວາມແຕກຕ່າງລະຫວ່າງໃນເມືອງກັບຊົນນະບົດ, ສົ່ງຜົນໃຫ້ມູນຄ່າຂອງເສດຖະກິດດິຈິຕອນໃນອາຊຽນຢູ່ທີ່ 174 ຕື້ໂດລາສະຫະລັດໃນປີນີ້, ເພີ່ມຂຶ້ນ 49% ຈາກປີ 2020 ທີ່ມີມູນຄ່າ 117 ຕື້ໂດລາ.
ໃນຂະນະທີ່ສະຕາດອັບດ້ານເຕັກໂນໂລຊີກໍເພີ່ມຂຶ້ນສູງເຊັ່ນດຽວກັນ ໂດຍມູນຄ່າຂໍ້ຕົກລົງທາງທຸລະກິດດ້ານເຕັກໂນໂລຊີ ໃນ 6 ເດືອນທຳອິດຂອງປີນີ້ຢູ່ທີ່ 11.500 ລ້ານໂດລາ ເພີ່ມຂຶ້ນ 65% ເມື່ອທຽບກັບໄລຍະດຽວກັນຂອງປີຜ່ານມາ, ທັງໝົດນີ້ ຈຶ່ງເປັນສັນຍານການຂະຫຍາຍຕົວຢ່າງກ້າວກະໂດດຂອງມູນຄ່າເສດຖະກິດິຈິຕອນໃນອາຊຽນໃນຊຸມປີຕໍ່ໜ້າ.
