ສຳນັກຂ່າວຣອຍເຕີລາຍງານວ່າ ໃນກອງປະຊຸມຂອງກຸ່ມຜູ້ຜະລິດ ແລະ ສົ່ງອອກນ້ຳມັນ (ໂອເປັກ) ແລະ ຊາດພັນທະມິດ (ໂອເປັກ ພລັສ) ມີມະຕິເພີ່ມການຜະລິດນ້ຳມັນ 4 ແສນບາເຣລຕໍ່ວັນຄືເກົ່າ ໃນເດືອນທັນວາ 2021 ເຖິງແມ່ນວ່າ ສະຫະລັດອາເມຣິກາຈະຮຽກຮ້ອງໃຫ້ກຸ່ມເພີ່ມເພດານການຜະລິດນ້ຳມັນຂຶ້ນອີກ ເພື່ອສະລໍລາຄານ້ຳມັນໃນຕະຫຼາດໂລກທີ່ປັບຂຶ້ນ.
ກ່ອນໜ້ານີ້ ຊາອຸດິດອາຣາເບຍ ຜູ້ຜະລິດນ້ຳມັນອັນດັບໜຶ່ງຂອງໂອເປັກໄດ້ປະຕິເສດຂໍ້ຮຽກຮ້ອງໃຫ້ເພີ່ມກຳລັງການຜະລິດນ້ຳມັນ ຈາກໂອເປັກ ພລັສ ໂດຍໃຫ້ເຫດຜົນເລື່ອງບັນຫາເສດຖະກິດ, ໃນຂະນະທີ່ ໂອເປັກພລັສ ກ່າວຫາສະຫະລັດວ່າ ສະຫະລັດກໍມີຄວາມສາມາດເພີ່ມກຳລັງການຜະລິດຂອງຕົນເອງຂຶ້ນ ຫາກຢາກຊ່ວຍເຫຼືອການຟື້ນຕົວຂອງເສດຖະກິດໂລກໃຫ້ໄວຂຶ້ນ.
ທັງນີ້ ປີ 2021 ລາຄານ້ຳມັນດິບໃນຕະຫຼາດໂລກໄດ້ປັບຂຶ້ນສູງສຸດໃນຮອບ 3 ປີ ເໜືອລະດັບ 86 ໂດລາສະຫະລັດ/ບາເຣລ, ກຸ່ມໂອເປັກກັງວົນວ່າ ຫາກເລັ່ງເພີ່ມກຳລັງການຜະລິດຂຶ້ນໄວເກີນໄປ ອາດຈະເປັນບັນຫາໃຫ້ແກ່ປະເທດຜູ້ຜະລິດນ້ຳມັນ ຫາກເກີດການລະບາດໃຫຍ່ຂຶ້ນອີກຄັ້ງ.
ທ່ານ ອາເລັກຊານເດີ ໂນວັກ ຮອງນາຍົກລັດຖະມົນຕີຣັດເຊຍ ກ່າວວ່າ: ນັບແຕ່ເດືອນສິງຫາເປັນຕົ້ນມາ ໂອເປັກ ພລັສ ໄດ້ເພີ່ມກຳລັງການຜະລິດນ້ຳມັນ 2 ລ້ານບາເຣລຕໍ່ວັນ ເພື່ອສະໜອງໃຫ້ຕະຫຼາດໂລກ ແລະ ຍັງຈະດຳເນີນຕາມແຜນການເດີມທີ່ເພີ່ມກຳລັງການຜະລິດຂຶ້ນ 4 ແສນບາເຣລຕໍ່ວັນໄປຈົນເຖິງທ້າຍປີນີ້ ຫຼື ຕົ້ນປີໜ້າ ໂດຍໃຫ້ເຫດຜົນວ່າ ມີສັນຍານບົ່ງຊີ້ວ່າ ຄວາມຕ້ອງການນ້ຳມັນໃນເອີຣົບຫຼຸດລົງໃນເດືອນຕຸລາຜ່ານມາ, ຂະນະທີ່ຄວາມຕ້ອງການນ້ຳມັນທົ່ວໂລກຍັງປະເຊີນກັບຄວາມກົດດັນ ຈາກການແຜ່ລະບາດຂອງພະຍາດໂຄວິດ-19 ສາຍພັນເດວຕ້າ ນັ້ນຈຶ່ງເປັນເຫດຜົນທີ່ໂອເປັກ ພລັສ ບໍ່ຕັດສິນໃຈເພີ່ມກຳລັງການຜະລິດ.
ທັງນີ້ ໃນກອງປະຊຸມ G20 ຜ່ານມາ ປະທານາທິບໍດີສະຫະລັດອາເມຣິກາ ໄດ້ຮຽກຮ້ອງໃຫ້ປະເທດຜູ້ຜະລິດພະລັງງານລາຍໃຫຍ່ໃນກຸມ G20 ເພີ່ມກຳລັງການຜະລິດນ້ຳມັນຂຶ້ນ ເພື່ອຮັບປະກັນວ່າ ການຟື້ນຟູເສດຖະກິດໂລກຈະແຂງແກ່ນຂຶ້ນ.