ຜູ້ນຳກວ່າ 100 ປະເທດທີ່ເຂົ້າຮ່ວມກອງປະຊຸມສະຫະປະຊາຊາດ ວ່າດ້ວຍການປ່ຽນແປງດິນຟ້າອາກາດໂລກ (COP26) ຈະຮ່ວມກັນລົງນາມໃນຂໍ້ຕົກລົງສຳຄັນໃນປະຫວັດສາດໂລກອີກຄັ້ງ ດ້ວຍການໃຫ້ຄຳໝັ້ນສັນຍາ ຈະຢຸດຕິການຕັດໄມ້ທຳລາຍປ່າໃຫ້ໄດ້ພາຍໃນປີ 2030.
ທັງນີ້ ການຕັດໄມ້ທຳລາຍປ່າ ມີສ່ວນສຳຄັນຕໍ່ການປ່ຽນແປງດິນຟ້າອາກາດ ເພາະປ່າໄມ້ຊ່ວຍດູດຊຶມກາກບອນໄດອ໊ອກໄຊຈຳນວນຫຼວງຫຼາຍ ເຊິ່ງເປັນປັດໄຈສຳຄັນທີ່ເຮັດໃຫ້ເກີດພາວະໂລກຮ້ອນ, ນອກຈາກນີ້ ຍັງໃຫ້ຄຳໝັ້ນສັນຍາວ່າ ຈະສະໜັບສະໜູນເງິນ ເພື່ອປົກປັກຮັກສາ ແລະ ຟື້ນຟູປ່າອີກດ້ວຍ.
ລາຍງານລະບຸວ່າ ມີຜູ້ນຳກວ່າ 100 ປະເທດ ໄດ້ເຫັນດີລົງນາມໃນຂໍ້ຕົກລົງດັ່ງກ່າວ ເຊິ່ງຈະຄອບຄຸມປ່າໄມ້ປະມານ 85% ຂອງໂລກ, ຂະນະທີ່ລັດຖະບານອີກ 28 ປະເທດ ໃຫ້ຄຳໝັ້ນສັນຍາວ່າ ຈະຢຸດຕິການຕັດໄມ້ທຳລາຍປ່າເພື່ອທຳການຜະລິດກະສິກຳ ເຊັ່ນ: ປາມນ້ຳມັນ, ປູກຖົ່ວເຫຼືອງ ແລະ ການປູກພືດອື່ນໆທີ່ເປັນການທຳລາຍປ່າໄມ້ເປັນວົງກວ້າງ.
ນາຍົກລັດຖະມົນຕີອັງກິດ ໃນນາມປະທານກອງປະຊຸມ ກ່າວວ່າ: ຂໍ້ຕົກລົງດັ່ງກ່າວ ຖືວ່າມີຄວາມສຳຄັນເປັນຢ່າງຍິ່ງທີ່ຈະຊ່ວຍປົກປັກຮັກສາ ແລະ ຟື້ນຟູປ່າໄມ້ຂອງໂລກ ເຊິ່ງຖືວ່າມີຄວາມສຳຄັນຕໍ່ລະບົບນິເວດ ແລະ ເປັນປອດຂອງໂລກ.