ສຳນັກຂ່າວຣອຍເຕີລາຍງານວ່າ ສາທາລະນະລັດເກົາຫຼີ ໄດ້ທົດລອງປ່ອຍຈະຫຼວດຂຶ້ນສູ່ອາວະກາດເປັນຄັ້ງທຳອິດໃນປະຫວັດສາດ ໃນວັນທີ 21 ຕຸລານີ້ ໂດຍຈະຫຼວດ KSLV-2 ນູຣີ ແບບ 3 ຕອນ ເຊິ່ງບັນທຸກດາວທຽມແບບຈຳລອງ ແລະ ປະດັບດ້ວຍທຸງຊາດ ສ ເກົາຫຼີ ເຊິ່ງຈະປ່ອຍຂຶ້ນໃນເວລາ 16:00 ໂມງຂອງວັນທີ 21 ຕຸລາ 2021 ຕາມເວລາທ້ອງຖິ່ນ.
ທັງນີ້ ຈະຫຼວດ ນູຣີ ຖືກອອກແບບມາ ເພື່ອບັນທຸກສິນຄ້າໜັກ 1,5 ໂຕນ ໄປຍັງວົງໂຄຈອນໂລກ ເປັນໄລຍະທາງ 600-800 ກິໂລແມັດເໜືອພື້ນຜິວໂລກ ແລະ ອະນາຄົດ ສ ເກົາຫຼີວາງແຜນໄວ້ວ່າ ຈະສົ່ງດາວທຽມກວດກາ, ດາວທຽມນຳທາງ ແລະ ດາວທຽມສື່ສານ ຕະຫຼອດຮອດຍານສຳຫຼວດຂຶ້ນສູ່ອາວະກາດ. ຫາກການທົດລອງປ່ອຍຈະຫຼວດຄັ້ງນີ້ ປະສົບຜົນສຳເລັດ ຈະກາຍເປັນປະເທດທີ 7 ຂອງໂລກ ທີ່ສາມາດໃຊ້ຈະຫຼວດເພື່ອບັນທຸກສິນຄ້ານ້ຳໜັກເກີນ 1 ໂຕນໄດ້.