ສຳນັກຂ່າວຕ່າງປະເທດລາຍງານໃນວັນທີ 14 ຕຸລາ 2021 ວ່າ ກະຊວງການຄ້າ ອຸດສາຫະກຳ ແລະ ພະລັງງານຂອງ ສາທາລະນະລັດເກົາຫຼີເປີດເຜີຍວ່າ ຍອດສົ່ງອອກສິນຄ້າປະເພດເຕັກໂນໂລຊີ ແລະ ການສື່ສານ (ICT) ເພີ່ມຂຶ້ນຈຸລະດັບສູງສຸດໃນປະຫວັດການ ໃນເດືອນກັນຍາ ເນື່ອງຈາກຄວາມຕ້ອງການຂອງຕະຫຼາດໂລກເພີ່ມຂຶ້ນ ຫຼັງຈາກທີ່ເສດຖະກິດໂລກເລີ່ມຟື້ນຕົວ.
ລາຍງານລະບຸວ່າ ຍອດການສົ່ງອອກສິນຄ້າ ໄອຊີທີ ເພີ່ມຂຶ້ນ 21,1% ເມື່ອທຽບໃສ່ໄລຍະດຽວກັນຂອງປີຜ່ານມາ ມີມູນຄ່າ 21,3 ຕື້ກວ່າໂດລາໃນເດືອນກັນຍາ 2021 ເຊິ່ງເປັນມູນຄ່າສູງທີ່ສຸດ ນັບແຕ່ມີການບັນທຶກຂໍ້ມູນມາແຕ່ປີ 1996 ເປັນຕົ້ນມາ ແລະ ເປັນການເພີ່ມຂຶ້ນເກີນ 20 ຕື້ໂດລາເປັນເດືອນທີ່ 2 ຕິດຕໍ່ກັນ.
ນອກຈາກນີ້ ຍອດສົ່ງອອກເຊມີຄອນດັກເຕີ (ຊິບ) ກໍເພີ່ມຂຶ້ນ 27,4% ເມື່ອທຽບກັບໄລຍະດຽວກັນຂອງປີຜ່ານມາ ມູນຄ່າ 12,2 ຕື້ໂດລາ ໃນເດືອນກັນຍາ 2021, ໃນຂະນະດຽວກັນຍອດສົ່ງອອກໂທລະສັບມືຖື, ຄອມພິວເຕີ ແລະ ຊິ້ນສ່ວນ ໄອຊີທີ ອື່ນໆກໍເພີ່ມຂຶ້ນເຊັ່ນດຽວກັນ.
ການສົ່ງອອກສ່ວນໃຫຍ່ໄປຍັງ ສປ ຈີນ ເຊິ່ງເປັນຄູ່ຄ້າລາຍໃຫຍ່ ຂອງ ສ ເກົາຫຼີ ເພີ່ມຂຶ້ນ 24% ມີມູນຄ່າ 10,1 ຕື້ໂດລາ, ຂະນະທີ່ຍອດສົ່ງອອກໄປຍັງສະຫະລັດ, ອີຢູ ແລະ ຫວຽດນາມ ກໍເພີ່ມຂຶ້ນ ມີມູນຄ່າ 2,58 ຕື້ໂດລາ, 1,09 ຕື້ໂດລາ ແລະ 3,59 ຕື້ໂດລາ ຕາລຳດັບ.
