ທະນາຄານພັດທະນາອາຊີ ( ADB ) ກຽມຕັ້ງກອງທຶນ – ເລັ່ງປິດໂຮງໄຟຟ້າຖ່ານຫີນໃຫ້ໄວຂຶ້ນ ໂດຍທະວີບອາຊີຄອງສັດສ່ວນປະມານ 60% ຂອງການປ່ອຍອາຍພິດເຮືອນແກ້ວ ແລະ ຍັງເປັນພູມີພາກທີ່ມີຄວາມສ່ຽງສູງທີ່ຈະປະເຊີນກັບໄພພິບັດທາງທຳມະຊາດ ໂດຍ ເອດີບີ ຈະນຳເງິນຈາກກອງທຶນດັ່ງກ່າວນີ້ໄປຊື້ໂຮງງານທີ່ຜະລິດກະແສໄຟຟ້າທີ່ນຳໃຊ້ຖ່ານຫີນເປັນເຊື້ອໄຟໃນຂະບວນການຜະລິດ ເພື່ອປິດໂຮງງານເຫຼົ່ານີ້ໃນພູມີພາກອາຊີຕາເວັນອອກສ່ຽງໃຕ້ໃຫ້ໄວຂຶ້ນຈາກແຜນເດີມບໍ່ເກີນ 10 ປີ.
ທັງນີ້, ເອດີບີ ຈະເຮັດວຽກກັບລັດຖະບານ ແລະ ສະຖາບັນການເງິນໃນບັນດາປະເທດຕ່າງໆ ຕັ້ງກອງທຶນຂຶ້ນໃນປະເທດອິນໂດເນເຊຍ ເຊິ່ງເປັນປະເທດທີ່ເພິ່ງພາຖ່ານຫີນເຂົ້າໃນຂະບວນການຜະລິດໄຟຟ້າຫຼາຍທີ່ສຸດໃນພູມີພາກ ໂດຍມີເປົ້າໝາຍປ່ຽນຖ່າຍຂະບວນການຂອງອິນໂດເນເຊຍ ໃຫ້ເປັນປະເທດມີລະບົບເສດຖະກິດທີ່ປ່ອຍແກັສຄາບອນໄດອ໊ອກໄຊໃນປະລິມານຕ່ຳທີ່ສຸດ.
ທ່ານ ມາຊຶງຸ ອະຊາກາວະ ປະທານເອດີບີ ກ່າວວ່າ: ເອດີບີ ຈະປ່ຽນແປງນະໂຍບາຍໃໝ່ດ້ວຍການຍົກເລີກຂະຫຍາຍເງິນກູ້ ເພື່ອກໍ່ສ້າງໂຮງໄຟຟ້າຖ່ານຫີນແຫ່ງໃໝ່ ແລະ ສ້າງຕັ້ງກອງທຶນຕ່າງໆຂຶ້ນ ເພື່ອຊ່ວຍໃຫ້ໂຮງໄຟຟ້າທີ່ມີຢູ່ໃນຂະນະນີ້ໃຫ້ສາມາດປິດກິດຈະການໄດ້ໄວຂຶ້ນ.
