ໃນວັນທີ 25 ສິງຫາ 2021 ທີ່ ຫ້ອງປະຊຸມຄະນະປະຈຳສະພາແຫ່ງຊາດ ທ່ານ ໄຊສົມພອນ ພົມວິຫານ ປະທານສະພາແຫ່ງຊາດ ພ້ອມດ້ວຍຄະນະຜູ້ແທນຂັ້ນສູງ ຂອງສະພາແຫ່ງຊາດລາວ ໄດ້ສຳເລັດການເຂົ້າຮ່ວມກອງປະຊຸມສະມັດຊາລັດຖະສະພາ ລະຫວ່າງ ຊາດອາຊຽນ ຫລື ໄອປາ(AIPA) ຄັ້ງທີ 42 ແບບທາງໄກ ທີ່ຈັດໂດຍ ສະພານິຕິບັນຍັດ ແຫ່ງ ບຣູໄນ ດາຣູຊາລາມ ທີ່ໄດ້ດຳເນີນມາແຕ່ວັນທີ 23-25 ສິງຫາ 2021 ພາຍໃຕ້ການເປັນປະທານຂອງທ່ານ ເປຮິນ ດາໂຕະ ຮາຈິ ອາດູນ ລາມັນ ຕາອິບ ປະທານສະພານິຕິບັນຍັດ ແຫ່ງ ບຣູໄນ ດາຣູຊາລາມ, ປະທານກອງປະຊຸມໃຫຍ່ໄອປາ ຄັ້ງທີ 42.
ກອງປະຊຸມໃຫຍ່ປະຈຳປີຄັ້ງນີ້, ແມ່ນໄດ້ສຸມໃສ່ຄົ້ນຄວ້າປຶກສາຫາລື ແລກປ່ຽນຄວາມຄິດຄວາມເຫັນ ໃນຫົວຂໍ້: “ເຊື່ອມສານການຮ່ວມມືລັດຖະສະພາ ໃນການນຳໃຊ້ລະບົບດິຈິຕອນຢ່າງເທົ່າທຽມກັນ ເພື່ອກ້າວສູ່ປະຊາຄົມອາຊຽນ 2025”. ໃນມື້ນີ້, ຜູ້ແທນກອງປະຊຸມໄດ້ລົງເລິກຄົ້ນຄວ້າ ແລະປະກອບຄຳເຫັນຕໍ່ບັນດາຮ່າງມະຕິທີ່ສະເໜີໃນກອງປະຊຸມຄະນະກຳມາທິການຕ່າງໆຂອງໄອປາຄື: ກອງປະຊຸມຄະນະສະມາຊິກລັດຖະສະພາເພດຍິງ, ກຳມາທິການການເມືອງ, ກຳມາທິການເສດຖະກິດ, ກຳມາທິການສັງຄົມ ແລະ ກຳມາທິການວຽກງານພາຍໃນຂອງໄອປາ ຊຶ່ງໄດ້ພິຈາລະນາ ແລະຮັບຮອງ ຮ່າງມະຕິທັງໝົດ ຈຳນວນ 28 ສະບັບ ທີ່ປີ່ນອ້ອມຫົວຂໍ້ຂອງກອງປະຊຸມ.
.
ໂດຍສະເພາະແມ່ນ ການສົ່ງເສີມຄວາມສາມາດທາງດ້ານເສດຖະກິດຂອງແມ່ຍິງ, ຄວາມໝັ້ນຄົງທາງໄຊເບີ ແລະການປົກປ້ອງຂໍ້ມູນຂ່າວສານ, ຄວາມໝັ້ນຄົງຂອງມະນຸດ, ການທູດລັດຖະສະພາ, ການສົ່ງເສີມລະບົບເສດຖະກິດຂະໜາດນ້ອຍຂະໜາດກາງ, ການຟື້ນຟູເສດຖະກິດຫຼັງໂຄວິດ-19, ການຫລຸດຜ່ອນຜົນກະທົບຈາກການປ່ຽນແປງດິນຟ້າອາກາດ, ການຫັນເປົ້າໝາຍການພັດທະນາແບບຍືນຍົງລົງສູ່ທ້ອງຖິ່ນ ແລະສົ່ງເສີມການມີສ່ວນຮ່ວມໃນການເລືອກຕັ້ງໃຫ້ຫຼາຍຂຶ້ນ ດ້ວຍລະບົບດີຈິຕອນ.
.
ພ້ອມກັນນີ້, ກອງປະຊຸມຍັງໄດ້ມີການປັບປຸງທໍາມະນູນໄອປາ, ມອບລາງວັນກຽດຕິຄຸນໃຫ້ແກ່ຜູ້ທີ່ມີຜົນງານດີເດັ່ນ 2 ທ່ານ ທີ່ໄດ້ປະກອບສ່ວນເຂົ້າໃນວຽກງານໄອປາ ຈາກລັດຖະສະພາ ກຳປູເຈຍ ແລະອິນໂດເນເຊຍ ແລະ ເຫັນດີຮັບຮອງເອົາ ປະເທດ ອູແກຣນ, ຈໍເຈຍ ແລະປາກິດສະຖານ ເຂົ້າເປັນປະເທດສັງເກດການໄອປາ.
.
ໃນຕອນທ້າຍກອງປະຊຸມຫົວໜ້າຄະນະຜູ້ແທນຂອງແຕ່ລະປະເທດສະມາຊິກ ໄອປາ ໄດ້ເອກະພາບຮັບຮອງ ແລະ ລົງນາມໃນຖະແຫຼງການຮ່ວມກອງປະຊຸມໄອປາ ຄັ້ງທີ 42 ພ້ອມທັງເຫັນດີຮັບຮອງເອົາ ສະພາແຫ່ງຊາດ ແຫ່ງ ຣາຊະອານາຈັກກຳປູເຈຍ ເປັນປະທານໄອປາ ແລະ ເຈົ້າພາບຈັດກອງປະຊຸມໃຫຍ່ໄອປາ ຄັ້ງທີ 43 ໃນປີ 2022.
