ກວດພົບຜູ້ຕິດເຊື້ອໃໝ່ 305 ຄົນ, ດ້ານຄະນະສະເພາະກິດ ສົ່ງທີມວິຊາການ ພ້ອມຊ່ຽວຊານ ລົງຊ່ວຍ 3 ແຂວງ ຕ້ານການລະບາດໂຄວິດ-19

1910

ວັນທີ 22 ສິງຫາ 2021 ສປປລາວ ກວດພົບຜູ້ຕິດເຊື້ອໃໝ່ 305 ຄົນ ໃນນີ້ຈາກຊຸມຊົນພາຍໃນ 81 ຄົນ. ຕໍ່ກັບການເພີ່ມຂຶ້ນຂອງຈໍານວນຜູ້ຕິດເຊື້ອໃນ ແຂວງ ສະຫວັນນະເຂດ, ຄໍາມ່ວນ ແລະ ບໍ່ແກ້ວ, ທາງຄະນະສະເພາະກິດ ກໍຄືກະຊວງສາທາລະນະສຸກ ໄດ້ຈັດສົ່ງທີມວິຊາການ ພ້ອມຊ່ຽວຊານ ຈາກກະຊວງສາທາລະນະສຸກ, ກະຊວງປ້ອງກັນຄວາມສະຫງົບ ລົງໄປສົມທົບກັບແຂວງເພື່ອແກ້ໄຂສະພາບການລະບາດ ໃຫ້ຄວບຄຸມໄດ້ໂດຍໄວ.

ທ່ານ ດຣ. ຣັດຕະນະໄຊ ເພັດສຸວັນ ຫົວໜ້າກົມຄວບຄຸມພະຍາດຕິດຕໍ່, ກະຊວງສາທາລະນະສຸກ ຖະແຫຼງຂ່າວປະຈຳວັນທີ 22 ສິງຫາ 2021 ວ່າ: ວັນທີ 21 ສິງຫາ 2021ໄດ້ກວດວິເຄາະຫາເຊື້ອໂຄວິດ-19ທັງໝົດ 2.723 ຄົນ, ກວດພົບຜູ້ຕິດເຊື້ອໃໝ່ ທັງໝົດ 305 ຄົນ ເຊິ່ງຕິດເຊື້ອໃນຊຸມຊົນເຖິງ 81 ຄົນ ເປັນຜູ້ສຳຜັດໃກ້ຊິດນຳຜູ້ຕິດເຊື້ອທີ່ຜ່ານມາ ຄື:ບໍ່ແກ້ວ (ຕົ້ນເຜິ້ງ) 29 ຄົນ, ສະຫວັນນະເຂດ 52 ຄົນ.ສ່ວນ ກໍລະນີນໍາເຂົ້າ ມີ 224 ຄົນ ຈາກ ຈຳປາສັກ 134 ຄົນ, ສະຫວັນນະເຂດ 33 ຄົນ, ສາລະວັນ 22 ຄົນ, ຄຳມ່ວນ 20 ຄົນ, ນະຄອນຫຼວງ 12 ຄົນ ແລະ ຫຼວງພະບາງ 3 ຄົນ ເຊິ່ງກວດພົບຈາກແຮງງານລາວ ທີ່ກັບມາແຕ່ປະເທດເພື່ອນບ້ານ ເຂົ້າຕາມຈຸດຜ່ານແດນສາກົນ.

["]

ສຳລັບ ແຂວງສະຫວັນນະເຂດ ທີ່ຕິດເຊື້ອໃນຊຸມຊົນ 52 ຄົນນັ້ນ, ໃນນັ້ນ ເປັນຜູ້ຕິດເຊື້ອຢູ່ສະຖານທີ່ຄຸມຂັງ 2 ແຫ່ງ ຈໍານວນ ເຖິງ 43 ຄົນ, ສ່ວນອີກ 7 ຄົນ ແມ່ນເປັນຜູ້ສໍາຜັດໃກ້ຊິດກັບກໍາມະກອນ ສົ່ງນໍ້າ ເພດຊາຍອາຍຸ 33 ປີ ອາຊີບກໍາມະກອນ, ພະນັກງານໂຮງງານ 1 ຄົນ ແລະ ອີກ 1 ຄົນ ທາງທີມແພດແຂວງສະຫວັນນະເຂດກໍາລັງຕິດຕາມພົວພັນຜູ້ກ່ຽວຢູ່.


ສໍາລັບ ແຂວງ ບໍ່ແກ້ວຕິດເຊື້ອໃນຊຸມຊົນ 29 ຄົນ, ໃນນັ້ນ 16 ຄົນ ແມ່ນຈາກບ້ານໃຫຍ່ສີເມືອງງາມ, 1ຄົນຈາກບ້ານນໍ້າເກິ່ງ ເຊິ່ງເປັນແມ່ຄ້າຂາຍເຄື່ອງຢູ່ຕະຫລາດບ້ານໃຫຍ່ສີເມືອງງາມ ແລະ ອີກ 12 ຄົນ ແມ່ນມາຈາກເຂດສາມຫລ່ຽມຄໍາ.
ມາຮອດມື້ນີ້ ສປປລາວ ມີຕົວເລກຜູ້ຕິດເຊື້ອສະສົມທັງໝົດ 12.469 ຄົນ, ຄົນເຈັບເສຍຊີວິດສະສົມ 11 ຄົນ (ໃໝ່ 0 ຄົນ) ແລະ ກໍາລັງປິ່ນປົວ ທັງໝົດ 4.520 ຄົນ.


ກ່ຽວກັບການເພີ່ມຂຶ້ນຂອງຈໍານວນຜູ້ຕິດເຊື້ອ ໃນ ແຂວງ ສະຫວັນນະເຂດ, ຄໍາມ່ວນ ແລະ ບໍ່ແກ້ວ, ທາງຄະນະສະເພາະກິດ ກໍ່ຄື ກະຊວງສາທາລະນະສຸກ ໄດ້ຈັດສົ່ງທີມວິຊາການ ພ້ອມ ຊ່ຽວຊານ ຈາກກະຊວງສາທາລະນະສຸກ, ກະຊວງປ້ອງກັນຄວາມສະຫງົບ ລົງໄປສົມທົບກັບແຂວງເພື່ອແກ້ໄຂສະພາບການລະບາດໃນແຂວງ ໂດຍສະເພາະ ສູນຈໍາກັດບໍລິເວນ ແລະ ຄ້າຍຄຸມຂັງ ໃຫ້ຄວບຄຸມໄດ້ໂດຍໄວ. ນອກນັ້ນກໍ ໄດ້ໄປຊ່ວຍໂຮງໝໍພາກສະໜາມ ເພື່ອປັບປຸງຄຸນະພາບຂອງການປິ່ນປົວໃຫ້ດີຂຶ້ນ ບໍ່ໃຫ້ມີການເສຍຊີວິດ. ພ້ອມນີ້ ກໍໄດ້ສົ່ງນັກລະບາດວິທະຍາພາກສະໜາມຂຶ້ນ ໄປຊ່ວຍແຂວງບໍ່ແກ້ວ.