ໃນວັນທີ 19 ກໍລະກົດ ທ່ານ ດຣ. ສະໜອງ ທອງຊະນະ ຮອງລັດຖະມົນຕີກະຊວງ ສາທາລະນະສຸກ, ທ່ານ ນາງ ທິບພະກອນ ຈັນທະວົງສາ, ຮອງລັດຖະມົນຕີ, ຮອງຫົວໜ້າຫ້ອງວ່າການສຳນັກງານນາຍົກລັດຖະມົນຕີ, ທ່ານ ດຣ. ນາງ ພອນປະເສີດ ໄຊຍະມຸງຄຸນ ຮອງຫົວໜ້າກົມຄວບຄຸມພະຍາດຕິດຕໍ່ ຕາງໜ້າກອງເລຂາຄະນະສະເພາະກິດ ເພື່ອປ້ອງກັນ, ຄວບຄຸມ ແລະ ແກ້ໄຂການລະບາດຂອງພະຍາດ ໂຄວິດ-19 ທີ່ກະຊວງສາທາລະນະສຸກ.
ທ່ານ ດຣ. ນາງ ພອນປະເສີດ ໄຊຍະມຸງຄຸນ ຮອງຫົວໜ້າກົມຄວບຄຸມພະຍາດຕິດຕໍ່ ກ່າວວ່າ: ຮອດປະຈຸບັນ ສປປລາວ ມີຈຳນວນຜູ້ຕິດເຊື້ອສະສົມທັງໝົດ 3.540 ຄົນ, ເສຍຊີວິດສະສົມ 5 ກໍລະນີ, ກໍາລັງປິ່ນປົວ 1.224 ກໍລະນີ. ສະເພາະວັນທີ 18 ກໍລະກົດ ໄດ້ເກັບຕົວຢ່າງໄປກວດຫາເຊື້ອທັງໝົດ 1.199 ຕົວຢ່າງກວດພົບຜູ້ຕິດເຊື້ອ 114 ກໍລະນີ ຈາກ ນະຄອນຫຼວງວຽງຈັນ 3 ກໍລະນີ, ຈໍາປາສັກ 43 ກໍລະນີ, ສະຫວັນນະເຂດ 65 ກໍລະນີ, ຄໍາມ່ວນ 2 ກໍລະນີ ແລະ ບໍລິຄໍາໄຊ 1 ກໍລະນີ ທັງໝົດແມ່ນກໍລະນີນຳເຂົ້າ, ສ່ວນກໍລະນີຕິດເຊື້ອໃນຊຸມຊົນມື້ນີ້ແມ່ນບໍ່ມີ.
ມີຜູ້ເດີນທາງເຂົ້າມາ ຕາມຈຸດຜ່ານດ່ານຕ່າງໆ ໃນສປປ ລາວ ທັງໝົດ 1.296 ຄົນ ເຊິ່ງທັງໝົດ ແມ່ນຖືກເກັບຕົວຢ່າງກວດຊອກຫາເຊື້ອ ແລະ ເຂ້ົ້າໄປຈຳກັດບໍລິເວນຢູ່ສູນທີ່ຄະນະສະເພາະກິດກຳນົດໄວ້ 14 ວັນ. ວຽກງານການຈຳກັດບໍລິເວນ ປະຈຸບັນທົ່ວປະເທດມີສູນຈໍາກັດບໍລິເວນທີ່ເປີດນຳໃຊ້ຢູ່ທັງໝົດ 48 ສູນ, ມີຜູ້ຈຳກັດບໍລິເວນທັງໝົດ 6.030 ຄົນ.
ສະຖານທີ່ ການເກັບຕົວຢ່າງ ເພື່ອກວດຫາເຊື້ອ ໂຄວີດ-19 ຢູ່ນະຄອນຫຼວງວຽງຈັນ ມີໂຮງໝໍມິດຕະພາບ ແລະ ໂຮງໝໍເສດຖາທິຣາດ ນອກຈາກນັ້ນທີມງານເຝົ້າລະວັງຍັງມີການຄົ້ນຫາກໍລະນີຜູ້ຕິດເຊື້ອໂດຍການເຄື່ອນທີ່ໄປເກັບຕົວຢ່າງຢູ່ສະຖານທີ່ເຊິ່ງມີຜູ້ຕິດເຊື້ອໃໝ່ (ບ້ານເຂດແດງ ສຳນັກງານອົງການ,ສະຖາບັນການສຶກສາ ແລະ ອື່ນໆ ) ແລະ ບ່ອນທີ່ມີຊຸມຊົນແອອັດ ( ຕະຫຼາດສົດ,ໂຮງຈັກ, ໂຮງງານ ແລະ ສະຖານທີ່ ທີ່ມີ ແຮງງານກຳມະກອນຈຳນວນຫຼາຍ ເປັນຕົ້ນ ) ສ່ວນຈຳນວນບ້ານເຂດແດງໃນນະຄອນຫຼວງວຽງຈັນ ບໍ່ມີບ້ານແດງ ແລະ ບ້ານເຫຼືອງ.