ປະເທດອິນເດຍ ມີຜູ້ເສຍຊີວິດຈາກໂຄວິດ-19 ຢູ່ລະດັບ 4.000 ຄົນ ຂະນະທີ່ ອົງການອະນາໄມໂລກໄດ້ວິພາກວິຈານ ວ່າ ການຈັດກິດຈະກຳທາງການເມືອງ ແລະ ສາສະໜາທີ່ມີການເຕົ້າໂຮມກັນຈຳນວນຫຼາຍເປັນໜຶ່ງໃນປັດໄຈທີ່ເຮັດໃຫ້ອັດຕາການຕິດເຊື້ອ ແລະ ເສຍຊີວິດໃນອິນເດຍເພີ່ມຂຶ້ນຢ່າງຕໍ່ເນື່ອງ.
ສຳນັກຂ່າວຕ່າງປະເທດລາຍງານຈາກນະຄອນຫຼວງນິວເດລີ ປະເທດອິນເດຍ ເມື່ອວັນພະຫັດ ທີ 13 ພຶດສະພາ ວ່າ ກະຊວງສາທາລະນະສຸກອິນເດຍ ລາຍງານ ພົບຜູ້ຕິດເຊື້ອໂຄວິດ-19 ໃໝ່ເພີ່ມ 362.727 ຄົນ ໃນຮອບ 24 ຊົ່ວໂມງຜ່ານມາ. ເຮັດໃຫ້ປັດຈຸບັນ ອິນເດຍມີຜູ້ຕິດເຊື້ອສະສົມຢ່າງໜ້ອຍ 23.703.665 ຄົນ ປິ່ນປົວເຊົາດີ ຢ່າງໜ້ອຍ 19.734.823 ຄົນ ແລະ ຍັງເຫຼືອຜູ້ປິ່ນປົວໃນລະບົບ ຢ່າງໜ້ອຍ 3.710.525 ຄົນ.
ຢ່າງໃດກໍຕາມ, ໃນຮອບວັນດຽວກັນ ໄດ້ຢືນຢັນຜູ້ເສຍຊີວິດໃໝ່ 4.120 ຄົນ ເຮັດໃຫ້ປັດຈຸບັນ ອິນເດຍ ມີຜູ້ເສຍຊີວິດສະສົມຈາກໂຄວິດ-19. ຢ່າງໜ້ອຍ 258.317 ຄົນ.
ທັງນີ້ ໃນເນື້ອໃນຕອນໜຶ່ງຂອງລາຍງານປະຈຳອາທິດຂອງອົງການອະນາໄມໂລກ (WHO) ເຜີຍແຜ່ ເມື່ອວັນພຸດ ຜ່ານມາ ກ່ຽວກັບສະພາບການການແຜ່ລະບາດຂອງໂຄວິດ-19 ວ່າ ວິກິດການແຜ່ລະບາດໃນປະເທດອິນເດຍທີ່ກຳລັງຜະເຊີນຢູ່ໃນປັດຈຸບັນ ຖືເປັນ “ອັດຕາເລັ່ງ” ແລະ “ການຟື້ນຄືນຂອງເຊື້ອ” ທີ່ມາຈາກຫຼາຍປັດໄຈ ທີ່ລວມເຖິງການຈັດກິດຈະກຳທາງການເມືອງ ແລະ ສາສະ ໜາ ເຊິ່ງມີປະຊາຊົນໄປເຕົ້າໂຮມກັນຢ່າງຫຼວງຫຼາຍ ເຮັດໃຫ້ຍາກລຳບາກແກ່ການຕິດຕາມແນວທາງການຄວບຄຸມດ້ານສາທາລະນະສຸກ.
